Li yajtakboltak Jesuse sutik tal ti bu nom ay xcholik mantale, taje jutuk xa ox skʼan xlik spasik li Kʼin koltael ta sjabilal 32. Ta skoj ti lubemik tajeke, li Jesuse laj yikʼanan batel ta jun kanova yoʼ xbat xkuxik ta Betsaidae. Kʼalal jutuk xa ox skʼan xkʼotik li ta stiʼ ukʼum ta Betsaidae, li Jesuse laj yakʼ venta ti te xa ox tsobol epal krixchanoetike. Akʼo mi tskʼan ox stuk oy Jesus xchiʼuk li yajtakboltake pe kʼuxubaj ta yoʼonton li krixchanoetike, jech oxal la xpoxta li jchameletike xchiʼuk ep kʼusitik laj yakʼ ta chanel. Yuʼun sjunul kʼakʼal laj yalbe skʼoplal li Ajvalilal yuʼun Diose. Pe kʼalal bat xa ox kʼakʼale, xi laj yalbeik Jesus li jtakboletike: «Yikʼaluk chviʼnajik xa, jaʼ lek albo ti akʼo xbat sman sveʼelike».

Pe li Jesuse xi la stakʼe: «Mu persauk chbatik, makʼlinik voʼoxuk». Vaʼun xi la stakʼik li jtakboletike: «¿Mi chakʼan chbat jmanbekutik tal sveʼelike?». Xi to laj yal jun yajtakbol ti Felipe sbie: «Akʼo mi ep jtakʼinkutik mu xman-o sveʼel kuʼunkutik stekel li krixchanoetike».

Xi to la sjakʼ li Jesuse: «¿Kʼu yepal veʼlil oy kuʼuntik?». Xi laj stakʼ li Andrese: «Oy voʼob pan xchiʼuk chaʼkot uni choy pe uni juteb tajek, mu xlokʼ-o sventa skotol li krixchanoetike». Xi laj yal li Jesuse: «Ichʼbeikun tal li panetike xchiʼuk li choyetike». Vaʼun ta tsʼakale, li Jesuse laj yalbe li krixchanoetik ti akʼo chotiikuk ta tsʼiʼleltike xchiʼuk ti akʼo xchʼak sbaik ta 50 jujutsop xchiʼuk ta sien jujutsop. Vaʼun li Jesuse la stsak li panetike xchiʼuk li uni choyetike, la skʼel muyel vinajel xchiʼuk la spas orasion. Kʼalal laj xa ox yoʼonton spasel orasione laj yakʼbe yajtakboltak li veʼlil  yoʼ tspukbeik li krixchanoetike. Vaʼun veʼik li voʼmil viniketik ti te oyike ti parte li ololetike xchiʼuk li antsetike, lek noj xchʼut kom stekelik. Kʼalal laj yoʼontonike, li jtakboletike la stsobbeik skomenal li veʼlile. ¡Kom to 12 ta moch! ¿Mi mu jechuk ti toj labal sba li skʼelobil juʼelal taje?

Li krixchanoetike toj labal sba laj yilik li kʼusi kʼot ta pasele, jaʼ yuʼun tskʼan ox stikʼik ta ajvalil li Jesuse. Pe li Jeova xchiʼuk li Jesuse snaʼojik lek ti maʼuk to yoraile. Ta tsʼakale la stakanan batel ta snaik li krixchanoetike xchiʼuk laj yalbe yajtakboltak ti akʼo batikuk ta jot to stiʼ Nab Galileae. Li jtakboletike batik li ta kanovae yan li Jesuse muy batel ta vits pe, ¿kʼu yuʼun? Yuʼun tskʼan stuk oy sventa skʼopon li Stote. Yuʼun nopem onoʼox xaʼi ti chchʼakbe yorail yoʼ skʼopon Stot akʼo mi toj ep kʼusitik tspase.