Kʼalal batik ta vits Olivatik li Jesus xchiʼuk yajtakboltake, te echʼik li ta bevoʼ Sedrone. Mas xa ox ta oʼlol akʼobal xchiʼuk lek sepel li ue. Kʼalal kʼotik li ta nichimaltik Jetsemanie, xi laj yalbe yajtakboltak li Jesuse: «Liʼ to komanike xchiʼuk skʼan vikʼiluk li asatike». Vaʼun namaj batel xchiʼuk la skejan sba yuʼun tsvul tajek yoʼonton, jaʼ yuʼun xi lik skʼopon li Jeovae: «Jaʼuk kʼotuk ta pasel li kʼusi tskʼan avoʼontone». Vaʼun li Jeovae la stak talel jun yaj-anjel yoʼ spatbe yoʼonton li Jesuse. Ta tsʼakale, li Jesuse sut batel yoʼ bu oy li oxvoʼ yajtakboltake, pe vayalik kʼot sta. Jaʼ yuʼun xi laj yalanbee: «¡Julavanik! Yuʼun maʼuk yorail chavayik, kʼelo avilik sta xa yorail ti chkichʼ akʼel ta skʼob li kajkontratake».

Vaʼun te tal li Judase yikʼoj talel epal krixchanoetik ti yichʼoj talel yespadaik xchiʼuk steʼike. Snaʼoj onoʼox Judas ti bu oy li Jesuse yuʼun ep xa onoʼox ta velta ayemik ta vits li Jesus xchiʼuk li yajtakboltake. Li Judase baʼyel xa onoʼox laj yalbe soltaroetik ti kʼuxi xuʼ chakʼ ta ilel buchʼu jaʼ li Jesuse, vaʼun tukʼ bat ta stojolal li Jesuse, xi kʼot yalbee: «¡Liʼote, Jchanubtasvanej!». Vaʼun la tsʼutsʼ. Pe xi laj yal li Jesuse: «Judas, ¿mi jaʼ jech chavakʼun ta kʼabal?».

Vaʼun li Jesuse laj yakʼ sba lek ta baʼyukbe xchiʼuk xi la sjakʼbe li viniketike: «¿Buchʼu ti yakal chasaʼike?» Xi la stakʼik li krixchanoetike: «Jaʼ ta jsaʼkutik li jnasaretal Jesuse». Xi la stakʼ li Jesuse: «Voʼon li Jesusune». Vaʼun li viniketike solel xiʼik tajek, jaʼ yuʼun sutik ta valopat xchiʼuk yalik ta lum. Pe xi la sjakʼ yan velta li Jesuse: «¿Buchʼu van ti chasaʼike?». Xi la stakʼik yan velta li krixchanoetike: «Jaʼ li jnasaretal Jesuse». Xi laj yal li Jesuse: «Pe laj xa kalboxuk ti jaʼ voʼone. Jaʼ yuʼun akʼik akʼo batikuk li viniketik liʼe».

Kʼalal laj yil Pedro li kʼusi yakal chkʼot ta pasele la slokʼes yespada, vaʼun la xtuchʼbe xchikin li Malko ti jaʼ smoso li mero bankilal palee. Pe li Jesuse la spikbe li xchikin Malkoe xchiʼuk la  xpoxtabe. Vaʼun xi laj yalbe li Pedroe: «Tikʼo ochel ta sna li avespadae, yuʼun mi chavakʼ espadae, ta espada chavichʼ milel ek». Vaʼun li soltaroetike la stsakik li Jesuse xchiʼuk la xchukbeik batel skʼob, yan li yajtakboltake jatavik batel. Laje, li epal krixchanoetike laj yikʼik batel ta stojolal li mero bankilal pale Anas yoʼ xichʼ chapanel li Jesuse, kʼalal laj xa ox yichʼ chapanele laj yichʼ takel batel ta sna li mero bankilal pale Kaifase. Pe, ¿kʼusi van kʼot ta stojolalik li jtakboletike?