Xi jamal yaloj li Jeovae: «Muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel. Xchiʼuk muʼyuk xa bu ta xvul ta ajolik li kʼusitik chopol toʼoxe».

Yoʼ xmuyubajikuk noʼox xkuxiik xchiʼuk ti junuk noʼox yoʼontonik li Adan xchiʼuk Evae li Jeovae te laj yakʼ nakiikuk ta nichimaltik Eden. Pe skʼan jaʼuk noʼox xichʼik ta mukʼ li Jeovae xchiʼuk ti snojesik spʼejel balumil ta yalab xnichʼnabike. Akʼo mi muʼyuk la xchʼunik mantal li Adan xchiʼuk Evae, pe ta onoʼox xkʼot ta pasel li kʼusi yaloj Jeovae. Yuʼun jech kʼuchaʼal laj xa jchantik li ta livro liʼe, skotol li kʼusi chal Jeovae persa chkʼot ta pasel. Vaʼun li Ajvalilal yuʼune ta xakʼ tal epal bendisionetik liʼ ta balumile. Jaʼ jech chkʼot ta pasel li kʼusi yalojbe onoʼox li Abraane.

Jutuk xa tajek skʼan xichʼ lajesel li Satanas, spukujtak xchiʼuk li chopol krixchanoetike. Vaʼun skotol li lekil krixchanoetike, jaʼ xa noʼox chichʼik ta mukʼ li Jeovae. Muʼyuk xa chij-ipaj, muʼyuk xa chijcham, yuʼun  jujun kʼakʼale oy lek kipaltik xchiʼuk xkuxet noʼox koʼontontik. Vaʼun ta kʼunkʼun chkʼataj ta jun paraiso spʼejel li balumile. Maʼuk noʼox yuʼun naka xa muil veʼliletik ta jlajestik xchiʼuk xuʼ jpastik kʼupil sba jnatik. Muʼyuk xa me chopol krixchanoetik. Jech xtok muʼyuk xa bu chijxiʼutik yuʼun li chonbolometike xchiʼuk muʼyuk chiʼik kuʼuntik ek.

Toj labal sba kʼalal mi lik xchaʼkuxesan skotol animaetik li Jeovae. Ta muyubajel ta jchʼamtik kʼalal chchaʼkuxiik talel li buchʼutik kuxiik ta voʼnee, jech kʼuchaʼal Abel, Noe, Abraan, Sara, Moises, Rut, Ester xchiʼuk li Davide. Yuʼun mi chaʼkuxiike jaʼ tskoltautik ta skʼatajesel ta paraiso spʼejel li balumile. Xchiʼuk toj ep kʼusitik ta jpastik.

Li Jeovae tskʼan ti xakuxi li ta paraisoe. Tee ep tajek kʼusi achʼ ta xachan ta sventa Jeova ti labalik sbae. Jaʼ yuʼun, ¡nopajkutik mas ta stojolal Jeova jujun kʼakʼal li avie xchiʼuk ta sbatel osil!