Li jtakboletike la xchʼunik li mantal laj yal komel Jesus ti skʼan xichʼ cholel li lekil aʼyejetik yuʼun Dios ta spʼejel li balumile. Li ta sjabilal 47, li ermanoetik ta Antiokiae la stakik batel Pablo xchiʼuk Bernabe ta yantik lumetik yoʼ xbat xcholik mantale. Solel xmuyubajik noʼox la xcholik mantal ta Asia menor xchiʼuk ta yantik lumetik jech kʼuchaʼal ta Derbe, ta Listra xchiʼuk ta Ikonioe.

Li Pablo xchiʼuk Bernabee skotol krixchano la xcholbeik mantal: jkʼulejetik, li buchʼutik abol sbaike, kerem tsebetik xchiʼuk mol meʼeletik. Ep buchʼutik pasik ta yajtsʼaklom Kristo. Li Pablo xchiʼuk Bernabee la xcholbeik mantal xtok jun ajvalil ta Chipre ti Serjio Paulo sbie, pe pajtsanatik ox yuʼun jun j-akʼchamel. Li Pabloe xi laj yalbe li j-akʼchamele: «Spʼajoj Jeova li kʼusi chapase». Kʼalal jech laj yal li Pabloe, pas ta maʼsat li j-akʼchamele. Kʼalal laj yil kʼusi kʼot ta pasel li ajvalil Sergio Pauloe kʼot ta yajtsʼaklom Kristo.

Li Pablo xchiʼuk Bernabee ta buyuk noʼox la xcholik mantal: la xcholik ta jujupʼej naetik, ta chʼivitetik, ta bebetik xchiʼuk ta snail tsobobbailetik. Oy jun veltae, la xpoxtaik jun vinik ta Listra ti koxo toʼoxe. Kʼalal laj yilik li jnaklejetik ta Listra taje, la snopik ti jaʼik diosetik li Pablo xchiʼuk Bernabee, jaʼ yuʼun lik ichʼatikuk ta mukʼ. Pe li jtakboletike mu skʼanik ti jech tspasbatike, jaʼ yuʼun xi laj yalike: «¡Jaʼ noʼox skʼan xavichʼik ta mukʼ li Diose Li voʼonkutike krixchanounkutik noʼox jech kʼuchaʼal voʼoxuke!». Vaʼun tey kʼot jlom judaetik lik sloʼlabeik sjol li epal krixchanoetik yoʼ skontrainik li Pabloe, vaʼun lik yakʼbeik ton li Pabloe xchiʼuk la xjochik lokʼel li ta jteklume, yuʼun la snopik ti chamem xae. ¡Pe muʼyuk chamem!, vaʼun te tal koltaatuk yuʼun junantik ermanoetik xchiʼuk ikʼat ochel li ta jteklume. Ta tsʼakale sut batel ta Antiokia li Pabloe.

Li ta sjabilal 49, li Pabloe ay svulaʼan li ermanoetik ta Asia menore, pe ta tsʼakale bat xchol mantal ta Europa, ta Atenas, ta Efeso, ta Filipos, ta Tesalonika xchiʼuk ta yantik lumetik. Li Pabloe chiʼinat batel yuʼun Silas, Lukas  xchiʼuk jun kerem ti Timoteo sbie. Jmoj la xcholik mantal yoʼ tslikesik achʼ tsobobbailetik xchiʼuk ti tstsatsubtasik ta mantal li ermanoetike. Li Pabloe te kom ta Korinto jun jabil xchiʼuk oʼlol yoʼ stsatsubtas ta mantal li ermanoetik tee. La xchol mantal, chanubtasvan xchiʼuk la stsʼiba kartaetik sventa li epal tsobobbailetike. Li yabtele jaʼ spasel vakax naetik, ta tsʼakale sut batel ta Antiokia.

Ta tsʼakal xae, ta sjabilal 52 bat ta yoxibal velta ta xcholel mantal ta namal lumetik li jtakbol Pabloe, te la slikes ta Asia Menor, bat ta norte kʼalal ta Filipos vaʼun tsʼakal bat li ta Korintoe. Pe maʼuk noʼox, yuʼun oy jayibuk jabil te kom chanubtasvanuk ta Efeso, la xpoxta krixchanoetik xchiʼuk la skolta li ermanoetik ta tsobobbaile. Jech xtok, skotol kʼakʼal tsjelubtas mantal sventa skotol krixchanoetik li ta jun eskuelae. Epal krixchanoetik la xchʼunik xchiʼuk la sjel li kʼusi nopem toʼox xaʼiik spasele. Ta slajebal xae, kʼalal laj xa ox xchol li lekil aʼyejetik xchiʼuk laj xa ox svulaʼan epal lumetik li jtakbol Pabloe, jaʼo bat ta Jerusalen.