Li ta tsobobbail ta Listrae oy jun kerem ti Timoteo sbie. Li smeʼe jaʼ juda ants pe li stote jaʼ jgresia vinik. Li smeʼe jaʼ sbi Eunise yan li syayae jaʼ Loida, xchaʼvoʼalik la xchanubtasik ta smantal Jeova li Timoteoe.

Kʼalal bat svulaʼan ta xchibal velta Listra li Pabloe, laj yakʼ venta ti skʼanoj tajek ermanoetik li Timoteoe xchiʼuk ti oy tajek ta yoʼonton skoltaane. Jaʼ yuʼun li Pabloe laj yalbe Timoteo ti akʼo bat chiʼinatuk ti bu chbat xchol mantale. Jaʼ jech ta kʼunkʼun laj yichʼ lek chanubtasel yuʼun Pablo li Timoteoe yoʼ jaʼuk jun lekil jchanubtasvanej xkʼot ta sventa li skʼop Diose.

Buyuk noʼox xbatik li Pablo xchiʼuk Timoteoe jaʼ beiltasatik yuʼun li chʼul espiritue. Pe jun akʼobale, oy kʼusi akʼbat yil li Pabloe yuʼun laj yil jun vinik ti xi chale: «Laʼ ta Masedonia, laʼ koltaunkutik». Jaʼ yuʼun li Pabloe bat xcholik mantal ta Masedonia la xchiʼin batel Silas, Timoteo xchiʼuk Lukas vaʼun la slikesik achʼ tsobobbailetik.

Li ta Tesalonikae oy ep viniketik xchiʼuk antsetik ti kʼotik ta yajtsʼaklom Kristoe. Pe oy junantik judioetike, lik itʼixajuk yoʼontonik ta stojolal li Pablo xchiʼuk li xchiʼiltak ta cholmantale. Jaʼ yuʼun lik stsobik epal chopol krixchanoetik yoʼ xikʼik batel ta stojolal ajvaliletik ta jteklum li ermanoetike. Xi tsots kʼot avanikuk li judioetike: «¡Li viniketik liʼe, jaʼik yajkontra li ajvalil ta Romae!». Oy tajek ta vokol xkuxlejalik li jtakbol Pablo xchiʼuk Timoteoe. Jaʼ yuʼun jatavik batel ta akʼobaltik yoʼ xbatik li ta Bereae.

Li krixchanoetik ta Bereae oy tajek ta yoʼontonik chaʼiik li lekil aʼyejetik yuʼun Jeovae, jaʼ yuʼun ep jgriegoetik xchiʼuk judioetik kʼotik ta yajtsʼaklom Kristo. Pe oy junantik judioetik ti likemik ta Tesalonikae, kʼotik ta Berea sventa tal sokbeik sjol li krixchanoetike. Jaʼ yuʼun bat ta Atenas li Pabloe. Yan li Timoteo xchiʼuk Silase te komik ta Berea yoʼ stsatsubtasbeik yoʼonton li ermanoetike. Ta mas tsʼakal li Pabloe la stak batel yan velta ta Tesalonika li Timoteoe, taje jaʼ sventa skolta li  ermanoetik yoʼ xkuch yuʼunik li tsatsal nutsel ti yakal tsnuptanike. Vaʼun ta mas tsʼakal li Pabloe la stak batel yan velta li Timoteo li ta yantik epal tsobobbail yoʼ xbat svulaʼanan xchiʼuk spatbe yoʼontonike.

Xi albat yuʼun Pablo li Timoteoe: «Li buchʼutik tskʼan chichʼik ta mukʼ li Jeovae ta xichʼik kontrainel». Jaʼ yuʼun li Timoteoe laj onoʼox yichʼ kontrainel xchiʼuk laj yichʼ tikʼel ta chukel ta skoj li xchʼunel yoʼontone. Pe akʼo mi jech xmuyubaj noʼox, yuʼun jaʼ jech laj yakʼ ta ilel ti tukʼ chakʼ sba ta stojolal li Jeovae.

Li Pabloe xi laj yalbe batel li ermanoetik ta Filipose: «Ta jtakboxuk talel li Timoteoe. Jaʼ ta xchanubtasoxuk kʼuxi ta cholel mantal xchiʼuk ti kʼuxi xuʼ tukʼ chavakʼ abaike». Li Pabloe solel spatoj yoʼonton ta stojolal li Timoteoe. Vaʼun ep jabiletik koʼol la xcholik mantal xchiʼuk lek laj yamigoin sbaik.