XCHANOBIL 99
Pas ta yajtsʼaklom Kristo jun jchabichukinab
Li ta Filipose oy jun kiara ti ochem pukuj ta yoʼontone. Li pukuj taje chakʼbe snaʼ li kiara kʼusi chkʼot ta pasel ta tsʼakale. Jaʼ yuʼun ep tajek tspas kanal sventa chakʼbe yajval ta skoj ti jech tspas taje. Kʼalal kʼotik ta Filipos li Pablo xchiʼuk Silase li tsebe te xtijet batel ta spatik, oy jayibuk kʼakʼal jech la spas. Li pukuje tspas ta mantal li kiara yoʼ xiuk tsots x-avane: «¡Jaʼ smosotak Mukʼul Dios li viniketik liʼe!». Jech oxal li Pabloe xi laj yalbe li pukuje: «¡Ta sbi Jesukristo chkalbot mantal ti akʼo xalokʼ ta stojolal li tsebe!». Vaʼun lokʼ li pukuje.
Kʼalal laj yil li yajvaltak kiara ti chʼabal xa tspasik-o kanale, ilinik ta jyalel. Jaʼ yuʼun laj yichʼik tsakel li Pablo xchiʼuk li Silase, vaʼun jochatik batel ta stojolal ajvaliletik li ta jteklume, xi kʼot yalik li yajvaltak kiarae: «Li viniketik liʼe mu xchʼunik li mantale xchiʼuk yakal tajek tsokbeik sjol li krixchanoetike». Vaʼun li ajvaliletike laj yalik mantal ti akʼo smajik xchiʼuk stikʼik ta chukel li Pablo xchiʼuk Silase. Jaʼ yuʼun li jchabichukinabe la stikʼan ochel ta yutil to chukinab ti bu ikʼ tajeke xchiʼuk la slatsʼanbe yokik ta jun latsʼob teʼ.
Pe li Pablo xchiʼuk Silase lik skʼejintaik Jeova, te yakal chaʼiik li yantik jchukeletike. Li ta oʼlol akʼobale, ta anil noʼox tal tsatsal nikel, jech oxal nik li chukinabe. Xchiʼuk jam skotol li stiʼtake, sol yalel skadenailik li jchukeletike xchiʼuk jam li latsʼob teʼ ti latsʼal-o yokike. Vaʼun li jchabichukinabe och batel ta anil kʼalal to ta yutil, kʼalal laj yil ti jamajtik li stiʼtak chukinabe, la snop ti jatavemik xa batel li jchukeletike, jaʼ yuʼun la stsak jun espada yoʼ smil-o sbae.
Kʼalal laj yil Pablo ti tsmil xa ox sba li jchabichukinabe, xi avane: «¡Mu xamil aba, yuʼun liʼ oyunkutik jkotolkutike!». Vaʼun li jchabichukinabe bat ta anil ti bu oyik li Pablo xchiʼuk Silase la skejan sba ta stojolalik xchiʼuk xi la sjakʼe: «¿Kʼusi skʼan jpas yoʼ xikole?». Xi takʼbate: «Chʼunik li Kajvaltik Jesuse, vaʼun chakol xchiʼuk li buchʼutik te ta anae». Jaʼ yuʼun li Pablo xchiʼuk Silase la xchanubtasik ta sventa Jeova li jchabichukinabe xchiʼuk skotol li buchʼutik te ta snae, vaʼun laj yichʼik voʼ.
«Chavichʼik tsakel xchiʼuk chavichʼik kontrainel, chavichʼik akʼel ta kʼabal ta nail tsobobbailetik xchiʼuk ta chukinab. Jech xtok voʼon ta jkoj chavichʼik ikʼel batel ta stojolal bankilal ajvaliletik xchiʼuk ta stojolal itsʼinal ajvaliletik. Taje jaʼ sventa xaʼiik mantal avuʼunik» (Lukas 21:12, 13).
Xuʼ van chakʼupin skʼelel xtok liʼe
LI VIVLIAE, ¿KʼUSITIK CHALBE SKʼOPLAL?
Li spukel lekil aʼyeje
¿Kʼusi kʼot ta pasel kʼalal la xpoxta jun koxo vinik ta Listra li Pabloe? ¿Kʼuxi kʼot ta Roma li Pabloe?
LI VIVLIAE, ¿KʼUSITIK CHALBE SKʼOPLAL?
Skartatak Pablo sventa tsobobbailetik
¿Kʼusi beiltasel chal Pablo sventa lekuk xchapet li tsobobbaile? ¿Kʼusi laj yal ta sventa li nitilulale?
