Kʼalal ochik ta arka li Noe, yutsʼ yalal xchiʼuk li chonbolometike. Li Jeovae la sbaj li stiʼ arkae, jech te lik yakʼ tsatsal voʼ. Ta sjalile lik kuchatuk muyel ta voʼ li arkae, ta kʼunkʼun noj ta voʼ spʼejel li balumile. Li chopol krixchanoetik ti muʼyuk x-ochik li ta arkae chamik. Pe li Noe xchiʼuk li yutsʼ yalale muʼyuk kʼusi la snuptanik yuʼun te tikʼilik li ta yut arkae. ¿Mi xnop avuʼun kʼu to yepal muyubajik ti la xchʼunbeik smantal li Jeovae?

Toj tsots laj yakʼ li voʼe, jalij 40 kʼakʼal xchiʼuk 40 akʼobal. Vaʼun paj li voʼe, ta jelavele kʼunkʼun lik yaluk li voʼe. Kʼalal yal xa ox jutuke li arkae kajal kom ta jun vits, ta skoj ti muʼyuk ulem skotol li voʼe, li Noe xchiʼuk yutsʼ yalale te to komik li ta yut arkae.

Jelav epal kʼakʼaletik sventa x-ul li voʼe, jaʼ yuʼun li Noe xchiʼuk li yutsʼ yalale mas ta jun jabil te la smalaik li ta yut arkae. Kʼot yorail ti albatik yuʼun Jeova ti xuʼ xa xlokʼike. ¡Xkoʼolaj xa ta jun achʼ balumil yileluk! Solel xmuyubajik tajek ta skoj ti kuxul komike, jaʼ yuʼun laj yakʼbeik smoton li Jeovae.

Li Jeovae la xchʼam li matanal taje xchiʼuk laj yal ti muʼyuk xa ta slajes li kʼusitik kuxajtik ta sba balumil ta jun nojelal ta voʼe. Yoʼ xakʼ ta ilel ti muʼyuk xa bu jech tspas yan veltae laj yakʼ ta ilel jun arkoiris, sba to velta jech laj yakʼ ta ilel. ¿Mi oy aviloj junuk arkoiris?

Jech xtok li Noe xchiʼuk yutsʼ yalale albatik yuʼun Jeova ti akʼo xil yalab xnichʼnabik sventa snojesik li balumile.