XCHANOBIL 11
Laj yakʼ ta ilel li xchʼunel yoʼontone
Li Isaake chanubtasat yuʼun stot yoʼ skʼan li Jeova xchiʼuk ti akʼo spat yoʼonton li ta kʼusitik yaloj spase. Pe kʼalal 25 xa ox van sjabilal li Isaake, li Jeova oy kʼusi la skʼanbe Abraan ti toj vokol ta pasele. ¿Mi xanaʼ kʼusi kʼanbat?
Li Diose jech laj yalbe li Abraane: «Ikʼo batel ta yosilal Moria li akerem Isaak ti jaʼ noʼox stuk anichʼone. Te xamilbun jmotonin ta jol vits Moria». Li Abraane mu snaʼ lek ti kʼu yuʼun jech kʼanbat yuʼun li Jeovae, pe akʼo mi jech la xchʼun.
Ta sob yokʼomal li Abraane laj yikʼ batel li Isaak xchiʼuk chib yajtuneltak li ta vits Moriae. Kʼalal xanavemik xa ox oxib kʼakʼale, te laj yilik batel ta nom li vits taje. Li Abraane laj yalbe li yajtuneltak ti akʼo te xkomike, yuʼun li stukike chbat xchikʼbeik smoton li Diose. Li Isaake albat yuʼun stot ti akʼo xkuch batel li siʼe, yan li stote jaʼ chichʼ batel li kuchiyoe. Vaʼun li Isaake xi la sjakʼbe li stote: «¿Bu oy li chij sventa ta jmilbetik smotonin li Diose?». Xi la stakʼ li Abraane: «Kuni kerem, Jeova chakʼbutik tana li chij sventa matanale».
Kʼalal kʼotik li ta vitse, la spasbeik li skajleb smoton Diose. Laje, li Abraane la xchukbe yok skʼob li skereme, vaʼun la skajan li ta xchikʼobil matanale.
Kʼalal la stsak xa ox xkuchiyo li Abraane, jaʼo kʼopoj talel li yaj-anjel Jeova ta vinajele, xi laj yale: «¡Abraan! ¡Mu me kʼusi xapasbe li akereme! Yuʼun laj xakil ti oy xchʼunel avoʼonton ta stojolal li Diose, yuʼun ta sjunul avoʼonton chavakʼ li jun noʼox akerem oye». Kʼalal joyij li Abraane, te laj yil ti oy jkot chij tsʼotol xulub ta chʼixtike. Jech te bat stsak tal, jaʼ la xchikʼ ta smoton Dios ta sventa xkʼexol li xnichʼone.
Kʼalal jech kʼot ta pasele, li Jeovae laj yal ti kʼot ta yamigo li Abraane. ¿Xanaʼ kʼuchaʼal? Yuʼun li Abraane la spas skotol li kʼusi kʼanbat yuʼun li Jeovae, akʼo mi mu xaʼibe smelolal ti kʼu yuʼun jech chkʼanbate.
Li Jeovae xi la svulesbe ta sjol li Abraane: «Ta xkakʼbot ep bendision ta xkakʼ epajuk amomnichʼnabtak». Koliyal li yutsʼ yalal Abraane xuʼ staik bendision skotol li buchʼutik jaʼ tspasik li kʼusitik lekike.
«Yuʼun skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16).
Xuʼ van chakʼupin skʼelel xtok liʼe
JCHANBETIK LI XCHʼUNEL YOʼONTONIKE
Abraham: «Cʼot ta totil yuʼunic ti buchʼutic jech ta xcʼot ta yoʼntonic ta xchʼunele»
¿Kʼuxi laj yakʼ ta ilel xchʼunel yoʼonton li Abrahame? ¿Kʼutik yelan chakʼan chachanbe xchʼunel yoʼonton li Abrahame?
