Kʼalal 40 xa ox sjabilal li Isaake nupun xchiʼuk li Rebekae, solel skʼanoj tajek. Ta mas tsʼakale ayan skeremik ti jaʼ vachetike.

Li bankilale Esau sbi, li itsʼinale Jakob. Li Esaue tskʼupin tajek ti xbat ta paxyal ta osiltike xchiʼuk xchanoj lek nutsolajel. Pe yan li Jakobe lek chaʼi ti tey noʼox chkoltavan li ta snaike.

Li vaʼ kʼakʼaletik taje, kʼalal mi cham li totile jaʼ mas ep ch-akʼbat komel osil xchiʼuk takʼin li baʼyel nichʼonile, jaʼ mu sta jech yepal tsta li itsʼinaletike. Taje yichʼoj ojtikinel kʼuchaʼal, sparteik o xrextoik. Jaʼ yuʼun kʼalal mi yichʼ sparteik li yutsʼ yalal Isaake, tey tsakal skʼoplal ek li kʼusi yaloj chakʼbe Abraan li Jeova. Pe li Esaue muʼyuk sbalil laj yil li kʼusi yaloj Jeovae, yan li Jakobe snaʼoj ti toj tsots skʼoplale.

Jun velta li Esaue toj lubem kʼot ta snaik, yuʼun sjunul kʼakʼal nutsolaj. Vaʼun kʼalal laj yaʼi ti toj lek mu yikʼ li veʼlil yakal tsmeltsan li yitsʼine, xi laj yale: «Avokoluk akʼbun jutuk li aveʼel chameltsane, yuʼun chicham xa ta viʼnal». Xi la stakʼ li Jakobe: «Lek, jaʼ noʼoxe albun kaʼi baʼyuk me ta jeltik-o xchiʼuk li aparte chavichʼe». Pe xi takʼav li Esaue: «Mu kʼusi stu kuʼun li jparte chkichʼe yuʼun chiviʼnaj xa tajek, xuʼ voʼot xavichʼ komel». ¿Mi lek van li kʼusi la spas Esaue? ¡Muʼyuk!, muʼyuk lek li kʼusi la spase. Yuʼun la sjel ta veʼlil li kʼusi toj ep sbalile.

 Kʼalal mol xa ox li Isaake, la snop chakʼbe bendision li bankilal skereme. Li Rebekae la skolta Jakob yoʼ jaʼ akʼo yichʼ li bendisione, akʼo mi jaʼ itsʼinal li Jakobe. Pe kʼalal laj yaʼi li Esaue, kap tajek sjol xchiʼuk la snop kʼuxi tsmil li yitsʼine. Li Isaak xchiʼuk Rebekae, xi laj yalbeik li Jakob sventa mu xmilate: «Jaʼ lek batan chiʼino li atio Labane. Te oyan-o jayibuk kʼakʼal. Jaʼ to xasut tal mi laj xa ox skʼakʼal yoʼonton li abankile». Li Jakobe la xchʼun li kʼusi albat yuʼun stot smeʼe, jaʼ yuʼun jatav batel sventa mu xmilat yuʼun li sbankile.