XCHANOBIL 13
Li Jakob xchiʼuk Esaue la xchapan li skʼopike
Li Jakobe albat yuʼun Jeova ti ta xchabiate, jech kʼuchaʼal la xchabi li Abraan xchiʼuk Isaake. Li Jakobe te kom ta naklej ta Aran. Te nupun xchiʼuk ayan ep xnichʼnabtak xchiʼuk pas ta jkʼulej.
Ta tsʼakale xi albat yuʼun Jeova li Jakobe: «Sutan batel ta yosilal li atot ameʼe». Jaʼ yuʼun li Jakobe nat tajek xanavik xchiʼuk li yutsʼ yalale. Li ta bee xi tal albatuk yuʼun li yajtuneltake: «Li abankil Esaue chtal xa snupot ta be xchiʼuk chanib sien sviniktak». Li Jakobe xiʼ tajek yuʼun la snop mi oy kʼusi chopol tspasbat xchiʼuk li yutsʼ yalale. Jaʼ yuʼun xi la skʼanbe ta orasion li Jeovae: «Avokoluk mu me xavakʼ smilun li jbankil Esaue». Vaʼun li ta yokʼomale, li Jakobe la stakbe batel smoton li sbankile, la stakbe batel epal chijetik, tentsunetik, vakaxetik, kameyoetik xchiʼuk vuroetik.
Li ta akʼobaltik kʼalal stuk kom li Jakobe, laj yil jun anjel. Te lik spas kʼop xchiʼuk. Jech-o la spasik kʼalal to ta sob yokʼomal. Akʼo me toj lajem kom li Jakobe, muʼyuk bu laj yikta sba. Xi albat yuʼun li anjele: «Koltaun batel». Pe xi takʼav li Jakobe: «Mi muʼyuk chavakʼbun bendisione, muʼyuk ta jkoltaot batel».
Vaʼun li yaj-anjel Jeovae laj yakʼbe bendision li Jakobe. Te laj yakʼ venta Jakob ti chchabiat yuʼun Jeova yoʼ mu kʼusi chopol spasbat yuʼun li sbankile.
Li vaʼ sob taje, li Jakobe te laj yil batel ta nom li Esau ti xchiʼinoj tal li chanib sien sviniktake. Jaʼ yuʼun li Jakobe jaʼ baʼyel bat ta anil yoʼ xbat snup ta be li Esaue, kʼalal la sta sbaike te la skejan sba vukub to velta ta stojolal li sbankile. Vaʼun li Esaue te la smey ek li yitsʼine. Te okʼ xchaʼvoʼalik xchiʼuk la xchapan li skʼopike. ¿Mi lek van laj yil Jeova li kʼusi la spas Jakobe?
Kʼalal laj xa ox yoʼontonike, li Esaue sut batel ta sna. Yan li Jakobe bat li ta yosilal stot smeʼe. Li Jakobe oy 12 xnichʼnab jaʼik, Ruben, Simeon, Levi, Juda, Dan, Neftali, Gad, Aser, Isakar, Sabulon, Jose xchiʼuk Benjamin. Ta mas tsʼakale li Jeovae la stunesbe jun xnichʼon Jakob ti Jose sbi yoʼ tspoj li steklumale. ¿Mi chakʼan chanaʼ kʼuxi ta spas? Jchantik batel li ta yan xchanobile.
«Kʼanik-o me li avajkontratakike xchiʼuk pasik-o me orasion ta stojolal li buchʼutik chilbajinoxuke, sventa jech chavakʼik ta ilel ti jaʼ xnichʼnaboxuk li Atotik ta vinajele» (Mateo 5:44, 45).
