Li ta yosilal Use, te naki jun vinik ti laj yichʼ ta mukʼ li Jeovae. Li vinik taje Job sbi, jkʼulej tajek xchiʼuk ep yutsʼ yalal. Jech xtok, toj lek yoʼonton yuʼun la skolta li buchʼutik povreike, li antsetik ti chamem smalalike xchiʼuk li uni ololetik ti chʼabal stot smeʼike. ¿Kʼusi chanop? ¿Mi muʼyuk van chil svokol ta skoj ti lek yoʼontone?

Akʼo mi mu snaʼ li Jobe, pe kʼelbil yuʼun li Satanase. Jaʼ yuʼun li Jeovae xi laj yalbe li Satanase: «¿Mi laj avil li kajtunel Jobe? Muʼyuk buchʼu yan jech ta balumil. Chchʼun mantal xchiʼuk lek kʼusitik tspas». Xi laj yal li Satanase: «Ta xchʼunbot amantal, yuʼun chachabi, chavakʼbe bendision, chavakʼbe ep yosil xchiʼuk xchonbolomtak. Pojbo avil skotol li kʼusi oy yuʼune, vaʼun muʼyuk xa chichʼot ta mukʼ». Vaʼun li Jeovae xi la stakʼe: «Akʼo avil ta preva, pe jaʼ noʼoxe mu me xamil». Li Jeovae laj yakʼ permiso ti akʼo yakʼ ta preva Job li Satanase. ¿Mi xanaʼ kʼu yuʼun? Yuʼun li Jeovae snaʼoj lek ti chchʼun-o mantal li Jobe.

Li Satanase ep vokoliletik laj yakʼbe li Job sventa xakʼ ta prevae. Baʼyuke, la stak batel jsebaetik sventa xelkʼanbeik li xvakaxtak xchiʼuk svurotake. Laje, kʼakʼ ta kʼokʼ skotol li xchijtake. Jech xtok tal yelkʼanbeik skameyotak Job li jkaldeaetike. Jech xtok, chamik li yajtuneltak ti yakal chchabiik li chonbolometike. Pe oy to kʼusi mas chopol kʼot ta pasel, yuʼun cham skotol xnichʼnabtak li Job ta skoj ti lom yalel ta sbaik li na ti bu yakal chveʼike. Laj yat tajek yoʼonton li Jobe, pe muʼyuk xikta sba ta yichʼel ta mukʼ li Jeovae.

Li Satanase tskʼan chakʼbe to mas svokol li Jobe, jaʼ yuʼun la syayijesbe sjunul li sbekʼtale. Toj kʼux tajek laj yaʼi li Jobe xchiʼuk  mu snaʼ kʼuchaʼal ti ep kʼusitik chopol chkʼot ta stojolale, pe muʼyuk onoʼox laj yikta sba ta yichʼel ta mukʼ li Jeovae. Li Diose laj yil li kʼusitik kʼot ta pasele, jaʼ yuʼun muyubaj tajek ta skoj ti jech la spas li Jobe.

Laje, li Satanase la stak batel oxvoʼ viniketik sventa xakʼ ta preva li Jobe. Xi laj yal li viniketike: «Yuʼun la asaʼ amul maʼ leʼe, pe chakʼan chamuk li amule. Jaʼ yuʼun chakʼbot kastigo li Diose». Xi la stakʼ li Jobe: «Muʼyuk kʼusi chopol jpasoj». Ta tsʼakal une, la snop ti jaʼ ta smul Dios skotol li svokole xchiʼuk laj yal ti muʼyuk lek li kʼusi tspas Dios ta stojolale.

Oy jun kerem ti Eliu sbie te tsʼijil chchikinta li kʼusi yakal chalike. Vaʼun lik kʼopojuk xchiʼuk xi laj yale: «Mu meleluk li kʼusi chavalike. Toj echʼem mukʼ li Jeovae, mu xlaj kojtikintik. Mi jsetʼuk tspas li kʼusitik chopole. Yiloj skotol li kʼusitik chkʼot ta pasele xchiʼuk tskolta li buchʼutik chil svokolike».

Li Jeovae la skʼopon li Jobe. Vaʼun xi laj yalbee: «¿Bu oyot kʼalal la jmeltsan li vinajel xchiʼuk balumile? ¿Kʼu yuʼun chanop ti muʼyuk tukʼ li kʼusi ta jpasbote? Oy kʼusitik chaval, pe mu xanaʼ kʼuchaʼal ti oy kʼusitik chkʼot ta pasele». Li Jobe laj yakʼ venta ti oy kʼusi chopol la spase, jaʼ yuʼun xi laj yale: «Muʼyuk lek li kʼusi laj kale, pasun ta perton. Jaʼ noʼox kaʼioj akʼoplal, pe li avie laj xa kojtikinot lek. Jech xtok, jnaʼoj xa ti spas avuʼun skotole».

Kʼalal ep xa ox laj yichʼ svokol li Jobe, poxtaat yuʼun li Jeovae. Jech xtok, mas to ep kʼusitik akʼbat, jaʼ mu sta li kʼusitik oy toʼox yuʼun ta baʼyele. Jal kuxi li Jobe xchiʼuk xmuyubaj noʼox. Akʼbat bendision yuʼun Jeova ta skoj ti la xchʼun mantal skotol orae, akʼo mi vokol laj yaʼi bakʼintik. Li voʼot une, ¿mi jech chapas kʼuchaʼal la spas li Jobe? ¿Mi jech-o van chavichʼ ta mukʼ Jeova akʼo mi xavil avokol?