Li Moisese te naki 40 jabil li ta Madiane. Ti kʼu sjalil te nakie, la saʼ yajnil xchiʼuk vokʼ jayvoʼuk xnichʼnab. Jun velta kʼalal te yakal chchabi xchijtak ta stsʼel vits Sinaie, oy kʼusi labal sba laj yil. Laj yil ti xpulpun skʼakʼal jpets chʼixe, jaʼ noʼoxe muʼyuk yakal chkʼakʼ. Kʼalal nopaj batel sventa tskʼel kʼusi chkʼot ta pasele, laj yaʼi oy buchʼu kʼopoj tal li ta chʼixe, xi laj yale: «¡Moises! Mu xa xanopaj talel lokʼo li axonobe, yuʼun chʼul balumil ti bu vaʼalote». ¿Mi xanaʼ buchʼu ti chkʼopoje? Jaʼ Jeova, yuʼun la stunes jun anjel sventa skʼopon li Moisese.

Li Moisese la smak sat, yuʼun xiʼ tajek. Xi laj yal li yechʼomal eile: «Laj xa kakʼ venta ti tsots chil svokolik li j-israeletike. Ta jkoltaik lokʼel sventa mu xa xil svokolik ta skoj li j-ejiptoetike, ta xkikʼik batel ta jun lekil balumil. Jech oxal, voʼot ta jtakot batel sventa xakolta lokʼel ta Ejipto li jteklumale». ¿Kʼu van yelan laj yaʼi sba Moises ti jaʼ chtakat batele?

Xi la sjakʼ li Moisese: «¿Kʼusi ta jtakʼbeik mi la sjakʼik buchʼu la stakun batele?». Xi albat yuʼun li Jeovae: «Albo ti voʼon la jtakot batele, ti voʼon li Sdiosun Abraan, Isaak xchiʼuk li Jakobe». Xi laj yal li Moisese: «Pe, ¿mi mu xchʼunbeikun li jteklum une?». Li Jeovae laj yakʼbe ta ilel jun sprevail ti tskoltae. Laj yalbe ti akʼo sjip ta lum li snamteʼe. Kʼalal jech la spase, ¡kʼataj ta jkot kiletel chon li snamteʼe! Ta tsʼakale, li Moisese la stsakbe sne li chone, vaʼun chaʼkʼataj ta snamteʼ. Xi albat yuʼun li Jeovae: «Mi la apas li skʼelobil juʼelal liʼe, jaʼ jech chchʼunik ti voʼon la jtakot batele».

Xi laj yal li Moisese: «Pe mu xlokʼ lek xikʼopoj kʼalal te oyun ta yeloval krixchanoetike». Xi albat yuʼun li Jeovae: «Voʼon ta xkakʼ ta ave li kʼusi skʼan xavale xchiʼuk ta jtak batel abankil Aaron sventa skoltaot». Kʼalal snaʼoj xa Moises ti chkoltaat yuʼun li Jeovae, sut batel ta Ejipto, laj yikʼ batel yajnil xchiʼuk xnichʼnabtak.