Kʼalal jaʼo te oy ta vits Sinai li Moisese, albat yuʼun Jeova ti akʼo spas jun axibalnae. Li axibalnae jaʼ jun karpana ti stuk noʼox jeche, yuʼun jaʼ te chichʼik ta mukʼ Dios li j-israeletike. Jech xtok, li axibalna taje xuʼ xkuchik batel ti bu chbatike.

Li Jeovae xi laj yalbe li Moisese: «Albo jteklum ti akʼo yichʼik talel kʼusitik x-ayan yuʼunik sventa xichʼ pasel li axibalnae». Jaʼ yuʼun li j-israeletike laj yichʼik talel oro, plata, kovre, alakʼ sba tonetik xchiʼuk yan kʼusitik kʼupilik sba. Jech xtok, laj yichʼik talel tsotsil chij, lino pokʼ, snukulil chonbolometik xchiʼuk yan kʼusitik. Ep tajek kʼusitik laj yakʼik ta slekil yoʼontonik, jaʼ yuʼun persa xi laj yal ta tsʼakal li Moisese: «Xlokʼ-o xa liʼe, mu xa xavichʼik talel».

Ep antsetik xchiʼuk viniketik ti lek xtojobik ta abtele la skolta sbaik ta spasel li axibalnae. Li Jeovae laj yakʼbe spʼijilik sventa lek xbat li yabtelike. Li jlome naunajik, jalavik o tsʼisumajik. Li jlom xtoke laj yabtelanik oro, la svokʼik ton xchiʼuk la xtuchʼik teʼetik.

Li jteklume jech tajek la spasik li axibalna jech kʼuchaʼal albatik yuʼun Jeovae. La spasik jlik kʼupil sba kortina sventa sjokʼanik ta yut li axibalnae, vaʼun chib xa kuarto kom: jaʼ li bu Chʼule xchiʼuk li Batsʼi Lekil Chʼul Kuartoe. Ta yut li Batsʼi Lekil Chʼul Kuartoe te oy li xkaxail trato ti pasbil ta akasia teʼ xchiʼuk ta oroe. Ta yut li bu Chʼule te oy jun kandelero ti pasbil ta oroe, te oy jkot mexa xchiʼuk te oy jun skajleb matanal ti bu chchikʼik pome. Li ta yamakʼil axibalnae te oy jun perol ti pasbil ta kovree xchiʼuk te oy jun mukʼta skajleb matanal. Kʼalal chilik jujukoj li xkaxail tratoe, li j-israeletike chvul ta sjolik ti yakʼoj yeik chchʼunbeik smantal li  Jeovae. ¿Mi xanaʼ kʼusi jaʼ li jun tratoe? Jaʼ kʼalal oy kʼusi chkakʼ ketik pasele.

Li Jeovae la stʼuj Aaron xchiʼuk xnichʼnabtak sventa xtunik ta paleal xchiʼuk teuk x-abtejik li ta axibalnae. Li Aaron xchiʼuk xnichʼnabtake skʼan xchabiik li axibal nae xchiʼuk skʼan te xchikʼbeik smoton li Jeovae. Pe li Aaron ti jaʼ mero bankilal palee jaʼ noʼox xuʼ x-och li ta Batsʼi Lekil Chʼul Kuartoe. Jkoj ta jabil xuʼ x-och batel, yuʼun te chbat yakʼ milbil matanal sventa smul stuk, sventa smul yutsʼ yalal xchiʼuk sventa smul sjunul li jteklum Israele.

Kʼalal jun xa ox jabil slokʼelik talel ta Ejipto li j-israeletike, jaʼo tsuts yuʼunik spasel li axibalnae. Li avi une, oy xa bu stakʼ xichʼik ta mukʼ li Jeovae.

Sventa xakʼ ta ilel Jeova ti xmuyubaj tajeke, te laj yakʼ jvol tok ta sba li axibalnae xchiʼuk la snojes ta yutsilal. Mi te noʼox oy ta sba axibalna li jvol toke, te noʼox chkomik ek li j-israeletike. Pe mi laj yilik toy li jvol toke, snaʼojik ti yan xa-o bu chbatik ta nakleje. Jaʼ yuʼun tstukiik li axibalnae, vaʼun jaʼ tstsʼakliik batel li jvol toke.