Li Elkanae, jaʼ jun j-israelal vinik ti oy chib yajnile. Jaʼik Ana xchiʼuk Penina, pe jaʼ kʼanbil tajek li Anae. Li Peninae oy jayibuk yol, yan li Anae mu snaʼ x-alaj, jaʼ yuʼun chlabanat tajek yuʼun li Peninae. Li Elkanae, nopem xaʼi chikʼ batel yutsʼ yalal ta Silo sventa chbat yichʼik ta mukʼ Jeova li ta chʼulna pasbil ta nukule. Kʼalal te oyik li ta chʼulnae laj yil Elkana ti solel chat yoʼonton li Anae, li yajnil ti skʼanoj tajeke, vaʼun xi laj yalbee: «Ana avokoluk mu xa okʼ yuʼun liʼ jchiʼukote xchiʼuk jkʼanojot tajek».

Ta mas tsʼakal li Anae, bat stuk ta chʼulna sventa spas orasion. Solel mu xpaj yoʼonton ta okʼel, vaʼun xvokolet la skʼanbe koltael li Jeovae, xi laj yalbe ta jamale: «Jeova, mi chavakʼbun junuk kuni kereme, ta xkakʼ akʼo tunuk ta atojolal ti kʼu sjalil kuxule».

Li mero bankilal pale Elie laj yil ti ch-okʼ tajek li Anae xchiʼuk ti yakal chbakʼ li yanal yee, vaʼun la snop ti chyakub li Anae. Pe xi la stakʼ li Anae: «Kajval, muʼyuk chiyakub. Yuʼun yakal ta jkʼopon Jeova yuʼun tsots tajek jvokol». Laj yakʼ venta Eli ti muʼyuk chyakub li Anae, vaʼun xi laj yalbee: «Akʼo yakʼbot Jeova li kʼusi la akʼanbee». Xkuxet xa yoʼonton sut batel li Anae. Vaʼun kʼalal skʼan toʼox  xlokʼ jun jabile, ayan jun yuni kerem, Samuel laj yakʼbe sbi. ¿Mi xnop avuʼun kʼu to van s-elan xmuyubaj li Anae?

Muʼyuk bu xchʼay ta skoj Ana li kʼusi laj yalbe li Jeovae. Kʼalal laj yikta xchuʼ li kʼox Samuele bat akʼatuk yuʼun smeʼ li ta xchʼulna Jeovae. Xi kʼot yalbe li Elie: «La jkʼanbe Jeova ti akʼo xakʼbun li jun kuni kerem liʼe, jaʼ yuʼun li avi une tal kakʼ sventa xtun ta stojolal Jeova ti kʼu sjalil kuxule». Jujun jabil chkʼot skʼel skeremik li Elkana xchiʼuk Anae. Chichʼbeik batel jun achʼ mokan kʼuʼil. Koliyal li Jeovae, laj to yil oxib skerem xchiʼuk chib stsebetak li Anae.