Kʼalal chamem xa ox li Saule, jaʼ och ta ajvalil li David ti 30 xa ox sjabilale. Kʼalal echʼ xa ox jayibuk jabile oy kʼusi kʼot ta pasel, jun akʼobal kʼalal jaʼo te oy ta sjol snail spasob mantal li Davide, te laj yil batel jun alakʼ sba ants. Jaʼ yuʼun lik sjakʼilan kʼusi sbi li ants taje, vaʼun la snaʼ ti Batseba sbie xchiʼuk ti nupunem xchiʼuk jun soltaro ti Urias sbie. Ta tsʼakale, li Davide la stak ta ikʼel li Batsebae, kʼalal te xa ox oy li ta spasob mantale la xchiʼin sbaik ta vayel vaʼun la xchiʼin yol li Batsebae. Li Davide muʼyuk laj yal ta anil li kʼusi la spase. Jaʼ yuʼun laj yalbe li bankilal soltaro ti jaʼ akʼo yakʼ ta baʼyuk be li Urias li ta paskʼope xchiʼuk ti akʼo xiktaik komel stuke. Kʼalal jech la spasike te cham li Uriase, vaʼun li Davide nupun xchiʼuk li Batsebae.

Li Jeovae laj yil skotol li kʼusitik chopol kʼot ta pasele. Pe, ¿kʼusi van tspas li Jeovae? La stak batel li j-alkʼop Natan yoʼ xbat skʼopon li Davide. Vaʼun li Natane xi kʼot yalbe li Davide: «Oy chib viniketik, li june jkʼulej yuʼun oy ep xchij xchiʼuk xvakax. Yan li meʼon vinike jkot noʼox yuni meʼ chij ti skʼanoj tajeke, pe li jkʼulej vinike bat spojbe tal». Kʼalal laj yaʼi li Davide tsots ilin, vaʼun xi laj yalbe li Natane: «¡Skʼan xichʼ milel li jkʼulej vinike!». Pe li Natane xi la stakʼe: «¡Jaʼ jechot kʼuchaʼal li vinik taje!». Vaʼun li Davide laj yat tajek yoʼonton xchiʼuk xi laj yale: «Laj xa jta jmul ta stojolal li Jeovae». Ta skoj li mulil la spas li Davide la sta-o ep svokol xchiʼuk li yutsʼ yalale. Jaʼ yuʼun li Jeovae laj yakʼbe stoj smul li Davide, pe ta skoj ti jamal laj yal li smule xchiʼuk ti bikʼit laj yakʼ sbae, akʼbat to jal xkuxlejal yuʼun li Jeovae.

Li Davide oy tajek ta yoʼonton spasbel stemplo li Jeovae. Pe li Jeovae jaʼ la stʼuj li skerem David ti jaʼ li Salomon yoʼ jaʼuk smeltsan li temploe. Jaʼ  yuʼun li Davide lik xchapan li kʼusitik tstunes li Salomone, vaʼun xi laj yale: «Li stemplo Jeovae tskʼan lek mukʼ xchiʼuk tskʼan ven lek. Pe li jnichʼon Salomone toj kerem to. Jaʼ yuʼun ta jkolta xchapanel li kʼusitik chtune». Vaʼun li Davide laj yakʼ epal takʼin. La saʼ j-abteletik ti lek xtojobike, la stsob epal plata, oro xchiʼuk epal cedro teʼ ti te yichʼojik tal ta Sidon xchiʼuk ta Tiroe. Kʼalal jutuk xa ox skʼan xcham li Davide, laj yakʼbe komel Salomon li svunal ti bu chal kʼu yelan chichʼ vaʼanel li temploe xchiʼuk xi laj yalbe li skereme: «Li Jeovae laj yakʼbun jlokʼta xchiʼuk ti akʼo xkakʼbot li svunale. Jaʼ tskoltaot, jaʼ yuʼun tsotsan me xchiʼuk junuk me avoʼonton abtejan, mu me xaxiʼ».