Xi albat yuʼun Jeova li Samuele: «Batan ta sna Jese, yuʼun jaʼ la jtʼujbe jun xnichʼon sventa x-och ta ajvalil li ta Israele». Jaʼ yuʼun bat ta sna Jese li Samuele kʼalal laj yilbe li bankilal skereme, xi la snope: «Ta melel jaʼ stʼujoj Jeova maʼ leʼe». Pe li Jeovae laj yalbe Samuel ti maʼuk stʼujoj li bankilal skerem Jesee. Xi to laj yalbee: «Li voʼone jaʼ ta jkʼelbe li yut yoʼontone, maʼuk li spat xokone».

Li Jesee laj yikʼ tal li yan vakib skeremtak yoʼ xakʼbe yil li Samuele. Pe xi laj yal li Samuele: «Muʼyuk tʼujbilik yuʼun Jeova li akeremtak liʼe, ¿mi muʼyuk xa yan akerem?». Xi takʼav li Jesee: «Jaʼ xa noʼox jun kuni kʼox kerem David, pe muʼyuk liʼe yuʼun yakal chchabi jchijkutik». Vaʼun kʼalal kʼot li kʼox Davide, xi albat yuʼun Jeova li Samuele: «¡Leʼe jaʼ jtʼujoj!». Jaʼ yuʼun li Samuele la smalbe aseite ta sjol li Davide. Jaʼ jech la stʼuj yoʼ jaʼuk xkʼot ta ajvalil li ta Israele.

Ta mas tsʼakal li j-israeletike la spasik kʼop xchiʼuk li jfilistaetike. Li jfilistaetike oy jun bankilal soltaro yuʼunik ti toj nate, jaʼ sbi Goliat. Skotol velta tsnaʼle li j-israeletike xchiʼuk xi tsots ch-avane: «Tʼujik junuk achiʼilik yoʼ jpaskʼop xchiʼuke. Mi jaʼ la spas kanale, chikʼotkutik ta amosoik. Yan mi voʼon la jpas kanale, voʼoxuk chakʼotik ta jmosokutik».

Jun velta li Davide bat yakʼbe sveʼel sbankiltak ti bu spasoj skarpanaike, yuʼun jaʼik soltaroetik. Kʼalal kʼote laj yaʼi ti tsots ch-avan li Goliate, vaʼun xi laj yal li Davide: «Voʼon chbat jtsak ta kʼop li Goliate». Pe xi la stakʼ li ajvalil Saule: «Uni keremot to». Vaʼun xi la stak li Davide: «Jaʼ tskoltaun li Jeovae».

 Vaʼun li Saule laj yakʼbe David li yabtejebtak sventa paskʼope. Pe xi la stakʼ li Davide: «Mu stak xixanav xchiʼuk li kabtejeb sventa paskʼope». Jaʼ yuʼun li Davide la stsak li xjimichʼe, taje xkoʼolaj kʼuchaʼal jun uliʼ ti chichʼ tunesel sventa xichʼ jipel batel jpʼejuk tone. Vaʼun li Davide bat ta jun ukʼum ay saʼ tal voʼpʼej ton ti lek xchʼulete, te la stikʼ tal ta snutiʼ. Vaʼun ay snup ta be li Goliat sventa stsak ta kʼope. Kʼalal ilat yuʼun Goliate, xi albate: «¡Laʼ liʼe uni kʼox kerem, ta xkakʼbe stiʼik abekʼtal li mutetik ta vinajel xchiʼuk li jtiʼval chonbolometike!». Ta skoj ti mu snaʼ xiʼ li Davide, xi la stakʼbe li Goliate: «Li voʼote avichʼoj tal avuni espada, alansa, pe li voʼone tal jkontrainot ta sbi Jeova. Yuʼun maʼuk yakal chatsakunkutik ta kʼop, jaʼ yakal chatsak ta kʼop li Jeovae. Skotol li buchʼutik liʼ oyike ta xilik tana ti jaʼ mas tsots yipal li Jeovae, ti jaʼ mu jechuk li avespada xchiʼuk li alansae. Avie chakʼoxuk ta jkʼobkutik li Jeovae».

Jaʼ yuʼun li Davide laj yakʼ jpʼej ton li ta xjimichʼe, vaʼun la sjipbe batel ta stojolal li Goliate. Ta skoj ti koltavan li Jeovae, li tone lek tukʼ kʼot ta stiba li Goliate. Vaʼun toj chamel kʼot. Kʼalal laj yilik li jfilistaetike jatavik batel ta anil yoʼ mu xmilatik eke. ¿Mi chapat avoʼonton ta stojolal Jeova jech kʼuchaʼal la spas li Davide?