Jonatan sbi li bankilal skerem Saule, jech xtok jaʼ jun bankilal soltaro ta paskʼop. Jaʼ yuʼun jun velta li Davide laj yal ti jaʼ mas tsots ch-anilaj jech kʼuchaʼal chvil jkot aguila xchiʼuk jaʼ mas tsots yipal jech kʼuchaʼal jkot leon li Jonatane. Jun velta li Jonatane, laj yil batel ti oy jayibuk jfilista soltaroetik ta jun vitse. Vaʼun xi laj yalbe li jun yajkoltaobba ti jaʼ li buchʼu ch-ichʼbat batel li yabtejebtake: «Muyanik tal liʼe mi xiike jaʼ svinajeb ti yakʼojbutik xa ta jkʼobtik li Jeovae, vaʼun xuʼ xbat jtsaktik ta kʼop unbi». Vaʼun li jfilistaetike xi laj yalike: «Muyanik tal liʼ yoʼ bu oyunkutike». Vaʼun li Jonatane muyik batel xchiʼuk la smilik 20 jfilistaetik.

Ta skoj ti jaʼ bankilal li Jonatane jaʼ ch-och jechuk ta ajvalil kʼalal mi cham li stote. Pe li Jonatane snaʼoj ti jaʼ yichʼoj tʼujel David yoʼ xkʼot ta ajvalile, jaʼ yuʼun muʼyuk x-itʼixaj yoʼonton li Jonatane. Li kʼusie jaʼ ti lek tajek laj yamigoin sbaik li Jonatan xchiʼuk Davide. Jech xtok laj yalbe sbaik ti chchabi sbaik ta jujuntale. Yoʼ chakʼ ta ilel ti jaʼ yamigo David li  Jonatane, la skʼelanbe jlik skʼuʼ, jun yespada, jun stʼilesobil flecha xchiʼuk jlik xchuk.

Kʼalal jatav batel David ta skoj ti chichʼ nutsel yuʼun li Saule, li Jonatane bat skʼel li Davide xchiʼuk xi laj yalbee: «Skʼan tsotsuk avoʼonton xchiʼuk oyuk avipal. Li jtote snaʼoj ti jaʼ la stʼujot Jeova sventa xa och ta ajvalile». ¿Mi chakʼan junuk avamigo jech kʼuchaʼal li Jonatane?

Li Jonatane ep ta velta laj yakʼ ta vokol xkuxlejal ta skoj ti tskʼan tskolta li yamigoe. Yuʼun li stote tskʼan tsmil li Davide, jaʼ yuʼun xi laj yalbe stot li Jonatane: «Mi chamil li Davide jaʼ noʼox chasaʼ tsots amul, yuʼun li stuke muʼyuk kʼusi chopol spasoj». Pe li Saule ilin tajek ta stojolal Jonatan ta skoj ti jech laj yale. Kʼalal echʼ jayibuk jabile li Saul xchiʼuk Jonatane chamik ta jun paskʼop.

Kʼalal chamem xa ox li Jonatane, li Davide ay skʼoponbe li skerem Jonatan ti Mefiboset sbie. Kʼalal laj xa ox stae xi laj yalbee: «Voʼon ta jchabiot ti kʼu sjalil kuxulote yuʼun li atot Jonatane jaʼ toʼox jlekil amigo. Te chanaki li ta jpasobmantale xchiʼuk ta jchiʼin jbatik ta veʼel ta jmexa skotol kʼakʼal». Li Davide muʼyuk bu xchʼay ta sjol li Jonatan ti jaʼ li slekil amigoe.