Li ta Asiriae oy jun jteklum ti jaʼ sbi Ninivee, li krixchanoetik tee toj ven chopolik tajek. Jaʼ yuʼun li Jeovae la stak batel ta Ninive jun yaj-alkʼop ti Jonas sbie. Yuʼun chbat yalbe krixchanoetik ti skʼan sjel li stalelalike. Pe li Jonase yan-o be la stam batel. Yuʼun la stsak batel li varko ti chbat ta jun jteklum ti Tarsis sbie.

Kʼalal te xa ox oyik ta nabe, tal tsatsal ikʼal voʼ vaʼun li j-abteletik ta varkoe xiʼik tajek. Jech te lik skʼopon li sdiosike xchiʼuk xi la sjakʼbe sbaike: «¿Kʼu yuʼun ti jech chkʼot ta jtojolaltike?». Pe xi laj yal ta tsʼakal li Jonase: «Jaʼ ta jmul yuʼun yakal chijatav ta stojolal li Jeovae. Yuʼun mu jkʼan jpas li kʼusi laj yalbune jaʼ lek jipikun yalel li ta nab yoʼ xpaj li tsatsal ikʼal voʼe». Li buchʼutik ch-abtejik ta varkoe mu skʼan sjipik yalel li Jonase. Pe li stuke te xvulvun-o yoʼ xichʼ jipel yalele jaʼ yuʼun la sjipik yalel, vaʼun paj li tsatsal ikʼal voʼe.

Li Jonase la snop ti te xa ta xchame. Jaʼ yuʼun kʼalal yantik xa x-och batel ta yut nabe, lik skʼopon li Jeovae. Vaʼun li Jeovae la spas ta mantal jkot mukʼta choy sventa sbikʼ li Jonas yoʼ mu xchame. Kʼalal te xa ox oy ta xchʼut choy li Jonase lik skʼopon yan velta li Jeovae, xi laj yalbee: «Jamal chkalbot ti ta jchʼun skotol li amantaltake». Li Jeovae laj yakʼ ti te oyuk ta yut xchʼut choy oxibuk kʼakʼale, vaʼun ta tsʼakale la spas ta mantal li choy yoʼ xbat xeta lokʼel Jonas ta tiʼ nabe.

Ti muʼyuk xakʼ chamuk Jonas li Jeovae, ¿mi jaʼ van skʼan xal ti muʼyuk xa tstak batel li ta Ninivee? Moʼoj. Yuʼun li Jeovae la stak batel yan velta yoʼ xbat  yalbe jun aʼyej li jnaklejetik ta Ninivee. Vaʼun li Jonase la xchʼun, jaʼ yuʼun xi kʼot yalbe li chopol krixchanoetik ta Ninivee: «Jaʼ xa noʼox 40 kʼakʼal skʼan yoʼ slajes Ninive li Jeovae». Vaʼun oy kʼusi kʼot ta pasel ti muʼyuk bu jech malabile, yuʼun lik sutes yoʼontonik li jniniveetike. Jech xtok, li ajvalile xi laj yalbe li jteklume: «Vokoletajanik ta stojolal li Diose xchiʼuk suteso avoʼontonik, yuʼun jech mu slajesutik». Kʼalal laj yil Jeova ti la sutes yoʼonton li krixchanoetike, muʼyuk xa la slajes li jteklume.

Li Jonase chopol laj yaʼi ti muʼyuk la slajes jniniveetik li Jeovae. Nopo avaʼi, li Jeovae kʼuxubaj ta yoʼonton li Jonase xchiʼuk laj yakʼbe ta ilel ti oy smalael yuʼune. Yan li Jonase muʼyuk xkʼuxubaj ta yoʼonton li krixchanoetik ta Ninivee. Yuʼun lokʼ batel li ta jteklume, te bat chotluk ta yaxinal jpets tsu, yuʼun solel toj chopol laj yaʼi sba. Pe li tsue takij, vaʼun te lik ilinuk yan velta li Jonase. Jaʼ yuʼun xi lik albatuk yuʼun li Jeovae: «Jaʼ tsots skʼoplal chavil li uni jpets tsue, jaʼ muʼyuk tsots skʼoplal chavil li jniniveetike. Yan li voʼone kʼuxubaj ta koʼonton li jniniveetike, jaʼ yuʼun muʼyuk la jlajesik». ¿Kʼusi van tskʼan chakʼbe xchan Jonas li Jeovae? Akʼbat xchan ti jaʼ mas tsots skʼoplal li krixchanoetik ta Ninivee, ti jaʼ mu sta jech jpetsuk li teʼe.