1-3. 1) ¿Buchʼutik chakʼbe ta ilel skʼakʼal yoʼonton li Jeovae? 2) ¿Kʼusi ta jkʼeltik batel?

 JMOJ chkʼejinik ta bikʼit ta mukʼ ta jpʼej na. Ta tsʼakale, jun mol ta tsobobbail ta sjunul yoʼonton tskʼanbe Jeova ti akʼo xchabiatike. Akʼo mi snaʼoj skotolik ti chchabi stsobobbail li Jeovae, pe tskʼanik to patbel yoʼontonik xchiʼuk koltael. Chaʼiik kʼu to stsatsal xvochlajetik ta paskʼop li ta spate. ¡Lik xa li paskʼop ta Armajedone! (Apok. 16:14, 16).

² Kʼalal mi tal slajes krixchanoetik ta Armajedon li Jeovae, jaʼ ta skoj ti likem skʼakʼal yoʼontone (kʼelo Esekiel 38:18). Maʼuk noʼox tslokʼes skʼakʼal yoʼonton ta stojolal jtsop soltaroetik o ta jun jteklum li Jeovae, yuʼun jech tspas ta stojolal epal krixchanoetik li ta spʼejel balumile. «Li vaʼ kʼakʼale, ep tajek li buchʼutik chamem chkom yuʼun Jeova ta jujujot stiʼil balumile» (Jer. 25:29, 33).

³ Li Vivliae chal ti jaʼ kʼanelal li Jeovae, ti oy xkʼuxul yoʼontone, ti oy slekil yoʼontone xchiʼuk ti oy smalael yuʼune. Pe mi jaʼ jeche, ¿kʼu yuʼun ti jech chlik spase xchiʼuk ti chlik skʼakʼal yoʼontone? (Eks. 34:6; 1 Juan 4:16). Jtakʼtik batel, yuʼun tspat koʼontontik,  chakʼ stsatsal koʼontontik xchiʼuk chakʼ kipaltik yoʼ jechuk-o jcholtik batel mantal.

4, 5. ¿Kʼu yuʼun mu xkoʼolaj skʼakʼal yoʼonton Jeova xchiʼuk li krixchanoetike?

⁴ Skʼan teuk ta joltik ti mu xkoʼolaj skʼakʼal yoʼonton Jeova xchiʼuk li krixchanoetike. Kʼalal chkap tajek sjol jun krixchanoe, mu xa snaʼ kʼusi tspas, vaʼun muʼyuk kʼusi lek chkʼot ta pasel. Kalbetik skʼoplal li sba xnichʼon Adan ti Kain sbie, kap tajek sjol ta skoj ti muʼyuk chʼambat yuʼun Jeova li matanal laj yakʼe, yuʼun jaʼ chʼambat li Abele. ¿Kʼusi la spas li Kaine? Jaʼ ti la smil li yitsʼin ti tukʼ yakʼoj sbae, li Abele (Jen. 4:3-8; Ebr. 11:4). Jaʼ xa kalbetik skʼoplal li David ti tsmuyubtabe yoʼonton li Jeovae (Ech. 13:22). Akʼo mi lek kʼusi oy ta yoʼonton li Davide tsmil xa ox li Nabal ti ep yosiltake, yuʼun laj yaʼi ti chopol kʼusi albat ta stojolal xchiʼuk li sviniktake. Tsan tajek skʼakʼal yoʼonton li David xchiʼuk yajsoltarotake, jaʼ yuʼun la xchukin yespadaik sventa smilik li Nabal xchiʼuk li sviniktake. Pe li yajnil Nabal ti Abigail sbie, ay slajesbe yoʼonton David xchiʼuk sviniktak sventa mu spak skʼoplalike (1 Sam. 25:9-14, 32, 33). Jaʼ yuʼun, xi laj yakʼ ta tsʼibael ta skarta Santiago li Jeovae: «Yuʼun maʼuk tspas kʼusi tukʼ ta sat Dios kʼalal ch-ilin li jun krixchanoe» (Sant. 1:20).

⁵ Li Jeovae mu xkoʼolaj kʼuchaʼal li krixchanoetike, yuʼun snaʼ spajes li skʼakʼal yoʼontone. Oy lek srasonal yuʼun mi kap sjole. Akʼo mi kapem tajek sjol, tukʼ-o li kʼusi tspase. Jech xtok, mi la slajesbe skʼoplal li yajkontratake mu teuk kapal «tslajesbe skʼoplal li buchʼu tukʼ xchiʼuk li buchʼu toj chopole» (Jen. 18:22-25). Jaʼ yuʼun chaʼa, oy lek srasonal yuʼun mi kap sjole. Jkʼeltik batel chaʼtos srasonal ti kʼu yuʼun ch-iline xchiʼuk ti kʼusi chakʼ jchantike.

6. ¿Kʼu yelan chaʼi sba Jeova kʼalal ch-ikʼubtasbat sbie?

⁶ Srasonal: Kʼalal chichʼ sokesbel skʼoplal sbi li Jeovae. Li buchʼutik chalik ti chtunik ta stojolal Jeovae, pe ti chopol kʼusi tspasike chikʼubtasbeik li xchʼul bie xchiʼuk oy srasonal ti chlik-o skʼakʼal yoʼonton yuʼunike (Esek. 36:23). Jech kʼuchaʼal la jchantik li ta yan kapituloetik echʼe, li jteklum Israele laj yikʼubtasbeik li sbi Jeovae. Jaʼ yuʼun, ti kʼu yelan la spas stalelalik xchiʼuk li kʼusitik la spasike, jaʼ kap-o sjol yuʼunik li Jeovae. Akʼo mi jech, maʼuk ti chʼabal smelolal ti kʼu yelan ch-iline, yuʼun ta smelolal noʼox la stukʼibtas ti bu kʼalal staik-oe (Jer. 30:11). Kʼalal mi laj xa ox slokʼes skʼakʼal yoʼontone, muʼyuk te xkapet-o chkom (Sal. 103:9).

7, 8. ¿Kʼusitik chakʼ jchantik ti kʼu yelan la spas stalelal Jeova ta stojolal li j-israeletike?

⁷ Li kʼusi chakʼ jchantike: Kʼalal ta jkʼeltik kʼu yelan la spas stalelal Jeova ta stojolal li j-israeletike, oy kʼusi chakʼ jchantik ti toj tsots skʼoplale. Xijkoʼolaj kʼuchaʼal li j-israeletik ti kichʼojbetik sbi li Jeovae, yuʼun jaʼutik stestigotak (Is. 43:10). Li krixchanoetike  xuʼ lek o chopol kʼusi tsnopik ta stojolal Jeova ta skoj li kʼusi chkaltik xchiʼuk li kʼusitik ta jpastike. Mu yolbajuk kʼusi chopol ta jpastik ti chkikʼubtasbetik-o sbi li Jeovae, yuʼun mi jech ta jpastike, jaʼ noʼox chijloʼlavan xchiʼuk chlik-o skʼakʼal yoʼonton li Jeovae. Melel onoʼox ti tsta yorail chchʼultajes li sbie (Ebr. 3:13, 15; 2 Ped. 2:1, 2).

⁸ Ti jnaʼojtik ti xuʼ xlik skʼakʼal yoʼonton li Jeovae, ¿mi ta van xijnamaj ta stojolal? Muʼyuk, yuʼun oy smalael yuʼun xchiʼuk ta sjunul yoʼonton ch-akʼvan ta perton (Is. 55:7; Rom. 2:4). Melel onoʼox ti toj lek yoʼontone, pe ta onoʼox xtukʼibtasvan mi jtatik-o chile. Jech xtok, ta xkichʼtik ta mukʼ, yuʼun jnaʼojtik ti jaʼ noʼox ch-ilin ta stojolal li buchʼutik batem ta yoʼontonik spasel kʼusi chopole xchiʼuk muʼyuk chakʼ ti te oyuk ta steklumale (1 Kor. 5:11-13). ¿Kʼusi skʼan jpastik ti jnaʼojtik kʼusi chopol chil li Jeovae? Jaʼ ti mu jpastik li chopol talelaletike xchiʼuk li kʼusitik xuʼ xkap-o sjol kuʼuntike (Juan 3:36; Rom. 1:26-32; Sant. 4:8).

9, 10. ¿Kʼusi tspas Jeova kʼalal xibal sba kʼusi xuʼ snuptan li steklumale? Albo skʼelobil.

⁹ Srasonal: Kʼalal xibal sba kʼusi xuʼ snuptan li steklumal Jeovae. Chkap-o tajek sjol Jeova kʼalal tstsakbat ta kʼop li yajtuneltak ti tukʼ yakʼoj sbaik ta stojolale. Kalbetik junuk skʼelobil, kʼalal lokʼik xa ox ta Ejipto li j-israeletike, li faraon xchiʼuk li yajsoltarotake ay sjoyobtaik li steklumal Jeovae, yileluke muʼyuk buchʼu xuʼ xpojatik kʼalal te oyik li ta stiʼil Tsajal nabe. Kʼalal ochik batel ta yut nab li soltaroetik yoʼ xbat snutsik li j-israeletike, li Jeovae la sokesbe li skaretaike xchiʼuk te la smutʼian komel. «Mi junuk xa kuxul kom yuʼun» (Eks. 14:25-28). Li Jeovae oy «tukʼil kʼanelal» yuʼun ta stojolal li steklumale, jaʼ yuʼun lik skʼakʼal yoʼonton ta stojolal li j-ejiptoetike (kʼelo Eksodo 15:9-13).

¹⁰ Ta skoj li «tukʼil kʼanelal» yuʼun Jeovae, la skʼel kʼuxi xuʼ spoj steklumal li ta skʼakʼalil ajvalil Esekiase. Li j-asiriaetik ti jaʼik soltaroetik ti muʼyuk xkʼuxul yoʼontonik xchiʼuk ti toj tsotsik li vaʼ orae te xa ox oyik ta Jerusalen sventa stsakik ta kʼop. Li yajtuneltak Jeovae xuʼ ox kʼusi xibal sba tsnuptanik, yuʼun xuʼ xichʼik joyobtael, vaʼun ta kʼunkʼun chchamik batel (2 Rey. 18:27). Jech oxal, li Jeovae la stak batel jun anjel sventa xbat smil 185 mil soltaroetik ta jun noʼox akʼobal (2 Rey. 19:34, 35). ¡Nopo xa noʼox avaʼi kʼu yelan kom ti bu spasoj skarpanaik li j-asiriaetike! Li lansaetike, li s-eskudoike xchiʼuk li yespadaike te oy ta yavil skotol. Mu xkaʼitik mi oy buchʼu tsjupan yokʼes o buchʼu chal mantal. Mu staleluk ti tsʼijil tajeke xchiʼuk buyuk noʼox telajtik li animaetike.

11. ¿Kʼu yuʼun tspat koʼontontik xchiʼuk chakʼ stsatsal koʼontontik li skʼelobil laj xa jkʼeltike?

¹¹ Li kʼusi chakʼ jchantike: Ti kʼu yelan la spoj steklumal Jeova kʼalal xibal sba kʼusi tsnuptanike, oy kʼusi ch-akʼbat xchanik li  kajkontratike jaʼ ti «toj xibal me sba kʼalal chij-och ta skʼob li kuxul Diose» (Ebr. 10:31). Oy kʼusi chakʼ jchantik ek li skʼelobil laj xa jkʼeltike, yuʼun tspat koʼontontik xchiʼuk chakʼ stsatsal koʼontontik. Xkuxet to koʼontontik ti jnaʼojtik ti muʼyuk tspas kanal li Satanase. Jutuk xa skʼan xlaj li yorail akʼbile (Apok. 12:12). Jaʼ yuʼun, tsots koʼontontik xijtun ta stojolal Jeova xchiʼuk jpʼel ta koʼontontik ti mi junuk krixchano, junuk organisasion o junuk ajvalil xuʼ smakutik ta spasbel li kʼusi tskʼan yoʼonton Diose (kʼelo Salmo 118:6-9). Taje jech xchʼunoj li Pablo eke, yuʼun xi laj yale: «Mi liʼ oy ta jtojolaltik li Diose, ¿buchʼu xa onoʼox xuʼ tskontrainutik?» (Rom. 8:31).

12. Li ta mukʼta tsatsal vokolile, ¿kʼu yuʼun ta xlik skʼakʼal yoʼonton li Jeovae?

¹² Li Jeovae chchabiutik li ta mukʼta tsatsal vokolil ti nopol xa xtale, jech kʼuchaʼal la xchabi j-israeletik kʼalal laj yichʼik joyobtael yuʼun li j-ejiptoetike xchiʼuk ti laj yichʼik joyobtael yuʼun j-asiriaetik li judaetik ta Jerusalene. Ta skoj ti skʼanojutik tajek li Jeovae, chlik skʼakʼal yoʼonton kʼalal tskʼan tstupʼ jkʼoplaltik li kajkontratike. Kʼalal mi la stsakutik ta kʼope xkoʼolaj ti «jaʼ tstaik ta  tijel li yuninal» sat Jeovae, vaʼun ta anil noʼox oy kʼusi tspas (Sak. 2:8, 9). Ta xlik jun paskʼop ti muʼyuk bu jech ilbil-oe. Kʼalal mi laj yakʼ ta ilel skʼakʼal yoʼonton Jeova ta stojolal li yajkontratake, mu me xuʼ xalik ti chʼayal yoʼonton taatike. ¿Kʼu yuʼun ti jech chkaltike? Jkʼeltik batel.

13. ¿Kʼusitik pʼijubtasel yakʼoj li Jeovae?

¹³ Li Jeovae oy smalael yuʼun xchiʼuk ep ta velta yaloj ti tslajes li buchʼutik chkontrainat xchiʼuk ti chkontrainbat li steklumale (Eks. 34:6, 7). Li Jeovae laj yakʼbe snaʼ Jeremias, Esekiel, Daniel, Jesukristo, Pedro, Pablo xchiʼuk Juan ti chtal jun paskʼop ti toj tsots skʼoplale (kʼelo li rekuadro «Li pʼijubtasel yakʼoj Jeova ta sventa li mukʼta paskʼop chtale»).

14, 15. ¿Kʼusi spasoj talel li Jeovae, xchiʼuk kʼu yuʼun?

¹⁴ Li Jeovae laj yakʼ ti teuk tsʼibabiluk xkom ta Vivlia li pʼijubtaseletik laj yakʼe. Jaʼ yuʼun, jaʼ li livro ti mas jelubtasbil ta yan kʼopetik xchiʼuk ti pukbil ta spʼejel balumile. Li Jeovae oy yajsoltarotak ta spʼejel balumil ti tskoltaik yan krixchanoetik sventa lekuk  xil sbaik yan velta xchiʼuk li Diose xchiʼuk chalik batel ti nopol xa «li smukʼta kʼakʼalil Jeovae» (Sof. 1:14; Sal. 2:10-12; 110:3). Stijojbe yoʼonton steklumal sventa sjelubtasik ta sienal no’ox jeltos kʼopetik li vunetik sventa jchantik li Vivliae. Jech xtok, stijojbe yoʼonton yajtuneltak sventa xalik batel li kʼusi tspas ta jelave xchiʼuk li pʼijubtasel ti te chal ta Vivliae, yuʼun ta smiyonal xa onoʼox ora jech tspasik jujun jabil.

¹⁵ Li Jeovae jech spasoj, yuʼun «mu skʼan ti oy buchʼu xbat ta lajelal junuke; moʼoj, li kʼusi tskʼane» jaʼ ti tsutes yoʼonton skotolike (2 Ped. 3:9). Li jkʼanvanej Dios ti oy smalael yuʼune tstunesutik sventa xkaltik batel li smantale xchiʼuk jaʼ jun matanal chkaʼitik ti xuʼ jkolta jbatike. Pe jutuk xa me skʼan xlajik li buchʼutik mu skʼan xchikintaik li kʼusi chal Jeovae.

16, 17. ¿Kʼuxi snaʼoj Jeova bakʼin chichʼ tsakel ta kʼop li steklumale?

¹⁶ Li Jeovae yakʼojbe xa yorail bakʼin chlik li paskʼop ta Armajedone. Jech xtok, snaʼoj xa kʼusi ora chichʼ tsakel ta kʼop li yajtuneltake (Mat. 24:36). Pe ¿kʼuxi snaʼoj taje?

 ¹⁷ Jech kʼuchaʼal laj xa jchantik li echʼ kapituloe, li Jeovae xi laj yalbe li Gogue: «Ta jtikʼ xotxot takʼin li ta sbakil avee». Jaʼ tstikʼbe ta yoʼonton jtsop jteklumetik sventa slikesik jun kʼop ti stuk noʼox jeche (Esek. 38:4). ¿Mi jaʼ skʼan xal ti jaʼ tslikes Jeova li paskʼope? Moʼoj, yuʼun chakʼbe snop stuk yajkontratak li kʼusi tspasike. ¿Kʼusi skʼan xal taje? Jaʼ ti xil kʼusi oy ta yoʼonton yajkontratak li Jeovae xchiʼuk snaʼoj kʼusi tspasik kʼalal oy kʼusi chkʼot ta pasele (Sal. 94:11; Is. 46:9, 10; Jer. 17:10).

18. Li krixchanoetike, ¿kʼuxi ti tsaʼik ta kʼop li Dios ti Buchʼu skotol xuʼ yuʼune?

¹⁸ Mi maʼuk Jeova tslikes li paskʼope xchiʼuk mi muʼyuk tsuj yajkontratak sventa spasik kʼope, ¿kʼuxi ti tsaʼik ta kʼop li Buchʼu skotol xuʼ yuʼune? Yuʼun li vaʼ orae, xuʼ van jpʼel xa ta yoʼontonik ti chʼabal Diose xchiʼuk ti mu stikʼ sba ta skoltael li krixchanoetike. ¿Kʼu yuʼun ti jech tsnopike? Yuʼun li vaʼ orae, yakʼojbeik xa ox slajeb skotol li jecheʼ relijionetike. Yikʼaluk xi tsnopike: «Ti oyuk ta melel li Diose, la skolta jechuk li organisasionetik ti chalik ti chtunik ta stojolale». Muʼyuk yakʼojik venta ti jaʼ Dios akʼbat ta yoʼontonik ti xakʼbeik slajeb li relijionetik ti la sokesbeik skʼoplal li Diose (Apok. 17:16, 17).

19. ¿Kʼusi van xuʼ xkʼot ta pasel kʼalal mil laj xa ox li jecheʼ relijionetike?

 ¹⁹ Kʼalal oy xa ox kʼuk sjalil slajel li jecheʼ relijionetike, li Jeovae xuʼ van chalbe steklumal ti akʼo yalik batel jun aʼyej ti toj kʼux ta aʼiele. Li ta Apokalipsise tskoʼoltas ta mukʼtik bot ti 20 kilo yalal jujupʼeje (Apok. 16:21, tsʼib ta yok vun). Xuʼ van xkaltik batel ti jutuk xa tajek skʼan xlaj li politikae xchiʼuk li pʼolmajebaletike. Li krixchanoetike chlik xchopol kʼoptaik Dios, yuʼun chopol chaʼiik li aʼyeje. ¿Kʼusi chkʼot ta pasel ta skoj li aʼyeje? Jaʼ ti xuʼ van chtijbat yoʼontonik jtsop jteklumetik sventa xakʼbeik slajeb ta j-echʼel li steklumal Diose. Yalojik ti muʼyuk buchʼu tspak jkʼoplaltike. Pe ¡mu snaʼik bu yakal tstikʼ sbaik!

20, 21. ¿Buchʼu skʼoplal li Gogue, xchiʼuk kʼusi chkʼot ta stojolal?

²⁰ Jech kʼuchaʼal la jchantik ta kapitulo 17, li Esekiele laj yalbe skʼoplal «li Gog ta yosilal [Magog]» sventa xalbe skʼoplal li jtsop jteklum ti tstsakutik ta kʼope (Esek. 38:2). Li jtsop jteklumetike muʼyuk tsots yipik. Akʼo mi jmoj sjolik yileluk, pe jech-o tskontrain sbaik li jteklumetike, muʼyuk lek chil sbaik xchiʼuk stoyoj-o sbaik. Li Jeovae xuʼ chakʼ ti xlik «smil sba ta s-espada stukik ta jujuntal, akʼo mi xchiʼil noʼox sbaik» (Esek. 38:21). Akʼo mi jech, maʼuk krixchanoetik chakʼbeik slajeb li jtsop jteklumetike.

²¹ Kʼalal skʼan toʼox xlaj li jtsop jteklumetike, ta xilbeik «li senyail Xnichʼon Krixchanoe» ti xuʼ van jaʼ skʼelobil juʼelal chakʼ iluk li Jeova xchiʼuk Jesuse (Mat. 24:30). Li kajkontratike solel chiʼik ta jyalel xchiʼuk mu xa snaʼik kʼusi tspasik. Xi xa onoʼox yaloj li Jesuse: «Chbat xchʼulelik ta xiʼel li krixchanoetike xchiʼuk ta skoj ti tsmalaik kʼusitik chkʼot ta pasel li ta sba balumile» (Luk. 21:25-27). Pe solel chʼayal to chkʼot yoʼontonik ta xiʼel kʼalal mi la stsakik ta kʼop li yajtuneltak Diose, ¡yuʼun muʼyuk kʼusi lek chkʼot ta stojolalik! Jaʼ to te chakʼik venta ti jaʼ Jeova li bankilal yuʼun soltaroetike (Sal. 46:6-11; Esek. 38:23). Li Jeovae tstunes sjuʼel xchiʼuk chalbe yaj-anjeltak ti akʼo xchabiik li yajtuneltak ti tukʼ yakʼoj sbaike xchiʼuk ti xakʼbeik slajeb li yajkontratake (kʼelo 2 Pedro 2:9).

22, 23. 1) ¿Buchʼutik chchabiik li steklumal Diose? 2) ¿Kʼu van yelan chaʼi sbaik mi laj xa ox spasik li abtelal akʼbatike?

²² Nopo xa noʼox avaʼi liʼe, li Jesuse oy xa tajek ta yoʼonton stsakel ta kʼop li yajkontratak Diose xchiʼuk ti xchabi li buchʼutik skʼanojik li Stote xchiʼuk ti chtunik ta stojolale. Nopo avaʼi xtok ti kʼu to yelan xkuxet yoʼontonik li buchʼutik tʼujbil chbatik ta vinajele. ¿Kʼusi chkʼot ta stojolal li buchʼutik tʼujbil chbatik ta vinajel ti liʼ to oyik ta balumile? Kʼalal jutuk xa ox skʼan xlik li Armajedone, chichʼik ikʼel muyel ta vinajel yoʼ stsʼaki li 144 mil sventa xtal spasik kʼop xchiʼuk li Jesuse (Apok. 17:12-14). Ep buchʼutik ti tʼujbil chbatik ta vinajele koʼol abtejemik xchiʼuk li yan chijetik li ta slajebaltik kʼakʼale, ta skoj taje lek yamigo sbaik. Li ta Armajedone,  li buchʼutik tʼujbil batik ta vinajele yichʼoj xa ox tsots yabtelik xchiʼuk sjuʼelik, vaʼun tspojik li yan chijetik ti la skolta sbaike (Mat. 25:31-40).

²³ Li anjeletike te skʼoplalik li ta yajsoltarotak Jesuse (2 Tes. 1:7; Apok. 19:14). Yuʼun skoltaojik xa Jesus kʼalal la sjipik yalel tal ta balumil li Satanas xchiʼuk spukujtake (Apok. 12:7-9). Jech xtok, skoltaoj sbaik ta saʼel li krixchanoetik ti tskʼan chtunik ta stojolal Jeovae (Apok. 14:6, 7). Jaʼ yuʼun, li Jeovae chalbe yaj-anjeltak ti akʼo xchabi li yajtuneltak ti tukʼ yakʼoj sbaike. Pe maʼuk noʼox, yuʼun tskolta sbaik ta slajesel li yajkontratak Jeovae, skotol li yajsoltarotake chchʼultajesbeik li sbie xchiʼuk tstoybeik skʼoplal (Mat. 6:9, 10).

24. ¿Kʼu van yelan chaʼi sbaik li epal krixchanoetike?

²⁴ Muʼyuk srasonal ti chiʼik li epal krixchanoetike, jaʼ xkaltik li yan chijetike, yuʼun li yajsoltarotak Jeovae ep tajek sjuʼelik xchiʼuk oy lek srasonal yuʼunik sventa xchabiatik. Vaʼun, li yan chijetike tukʼ chvaʼiik xchiʼuk tstoy muyel satik, yuʼun nopol xa li skolebalike (Luk. 21:28). Pe yoʼ to mu xlik li skʼakʼal yoʼonton Jeovae, ta sjunuluk koʼonton jkoltatik epal krixchanoetik yoʼ xojtikinik xchiʼuk ti skʼanik li Jtotik ti oy tajek xkʼuxul yoʼontone, li Dios ti chchabi li yajtuneltake (kʼelo Sofonias 2:2, 3).

25. ¿Kʼusi ta jkʼelbetik skʼoplal li ta yan kapituloe?

²⁵ Li paskʼop tspasik li krixchanoetike muʼyuk smelolal komem yuʼunik li balumile. Kʼalal mi echʼ xa ox li Armajedone, oy xa ox smelolal li jkuxlejaltike xchiʼuk xkuxet noʼox koʼontontik. Kʼalal mi laj xa ox yakʼ tal skʼakʼal yoʼonton li Jeovae, mi laj xa ox stikʼ ochel ta snail s-espadaik li yajsoltarotake xchiʼuk mi stsʼijlan xa ox ta skoj ti laj xa ox li paskʼope, ¿kʼu van yelan li kuxlejale? Taje ta jkʼelbetik skʼoplal ta yan kapitulo.