JOEL 3:18. Li albil kʼope chal ti te chlik tʼomuk tal voʼ li ta sna Jeovae xchiʼuk ti jaʼ «chatʼes li Stenlejaltik yuʼun Akasia [Teʼetik]» ti takin tajeke. Jaʼ yuʼun, li Joel xchiʼuk Esekiele laj yilik jun ukʼum ti chatʼes jun osil ti takin tajeke. Xchiʼuk laj yalik ti te chtʼom talel voʼ li ta sna Jeovae.

SAKARIAS 14:8. Li j-alkʼop Sakariase laj yil ti chbein lokʼel tal ta Jerusalen «li voʼ ti chakʼ kuxlejale». Pas ta chaʼchʼak li ukʼume, li j-oʼlole te kʼot ta nab ta slokʼeb kʼakʼal, li nab Muertoe. Li yan j-oʼlole te kʼot ta nab ta smaleb kʼakʼal, nab Mediterraneo. Li Jerusalene «jaʼ steklumal li mukʼul Ajvalile», jaʼ xkaltik, li Jeovae (Mat. 5:35). Kʼalal chkiltik kʼusi sbi laj yakʼbe Sakarias li jteklume, chakʼ jnoptik kʼusi chkʼot ta pasel ta tsʼakal kʼalal mi tsventain xa ox balumil li Jeovae. ¿Kʼu yelan kaʼiojbetik smelolal li albil kʼop laj yal Sakarias ta sventa li voʼe? Jaʼ ti Jeovae chakʼbe bendision ta Paraiso chaʼtsop krixchanoetik ti tukʼ yakʼoj sbaike: li buchʼutik kuxul chjelavik ta mukʼta tsatsal vokolile xchiʼuk li buchʼutik chchaʼkuxiik ta tsʼakale.

APOKALIPSIS 22:1, 2. Li jtakbol Juane laj yil jun ukʼum ti xkoʼolaj kʼuchaʼal laj yil li Esekiele. Pe oy sjelbenal, yuʼun li ukʼum laj yil Juane maʼuk te chlokʼ talel li ta temploe, jaʼ te chlik talel li ta chotlebal ti bu tspas mantal Diose. Li kʼusi laj yil Juan xchiʼuk Sakariase jaʼ mas chalbe skʼoplal li bendision chichʼ talel li Ajvalilal yuʼun Dios li ta Jmil Jabile.

Melel onoʼox ti oy sjelbenal jujune, pe li ukʼum laj yalbe skʼoplal Juan xchiʼuk Esekiele jaʼ skʼoplal li bendisionetik chakʼ talel Jeova ta stojolal li buchʼutik tukʼ chakʼ sbaike.

SALMO 46:4. Yileluke chaʼtos kʼusi chalbe skʼoplal li versikulo liʼe: li yichʼel ta mukʼ Diose xchiʼuk li pasob mantal yuʼune. Li ukʼume «xkuxet noʼox yoʼonton yuʼun li slumal Diose» ti xuʼ van jaʼ skʼoplal junuk ajvalilal, jech xtok xkuxet noʼox yoʼonton yuʼun «li axibalna ti chʼul xchiʼuk jun yutsil ti jaʼ yuʼun li Buchʼu toj toyol oye» ti xuʼ van jaʼ skʼoplal li melel yichʼel ta mukʼ Diose.

Li tekstoetik liʼe jamal chakʼ ta ilel ti oy chaʼtos kʼuxi chakʼbe bendision Jeova li krixchanoetik ti tukʼ yakʼoj sbaike. Baʼyel, ta jtabetik sbalil ti k’u yelan tspas mantale. Xchibal, ta jtabetik sbalil li kʼusi xchapanoj sventa xichʼ ichʼel ta mukʼ li melel Diose, taje ta jtabetik sbalil ta sbatel osil. Jaʼ yuʼun, jsaʼtik-o li voʼ ti chakʼ kuxlejal ti te chlik talel ta stojolal Jeova xchiʼuk li Jesuse, jaʼ xkaltik, li kʼusi yakʼojbutik ta slekil yoʼonton yoʼ jtatik li kuxlejal sbatel osile (Jer. 2:13; Juan 4:10).