REKUADRO 14A
Li kʼusi chakʼ jchantik li templo laj yil Esekiele
Chichʼ chabiel xchiʼuk toybel skʼoplal li melel yichʼel ta mukʼ Diose
Li templo laj yil Esekiele te laj yichʼ akʼel ta «jpʼej vits ti toyol tajeke» (1). ¿Mi jtoyojbetik skʼoplal li melel yichʼel ta mukʼ Dios xchiʼuk mi tsots skʼoplal chkil ta jkuxlejaltik?
Li muro ta sjoylejal temploe (2) smakoj li smukʼta yosilal templo ti oy ta spat xokone (3), li ta oʼlol osil taje te oy li temploe. Taje oy kʼusi tsots skʼoplal chakʼ jchantik, jaʼ ti mu xkakʼtik ti oyuk kʼusi sokes ti kʼu yelan chkichʼtik ta mukʼ Jeovae. Li kʼusitik muʼyuk chopole mu stakʼ kapel xchiʼuk li melel yichʼel ta mukʼ Diose, jech oxal mas to oy srasonal sventa mu jkaptik li ta melel yichʼel ta mukʼ Dios li talelaletik ti ibalik sbae o ti jaʼ sventa mulivajele (Esek. 42:20).
Bendisionetik ta sbatel osil
Li ta yolon li yochebal temploe lik beinuk lokʼel voʼ ti ta kʼunkʼun pas ta jun mukʼta ukʼum xchiʼuk ti chyaxub batel yuʼun ti bu chbein batele (4). Li ta kapitulo 19 li ta livro liʼe ta jkʼelbetik skʼoplal li bendisionetik taje.
Koʼol li mantal chkichʼtike
Li mukʼta ochebaletike (5) xchiʼuk li yochebal bikʼit amakʼe (9) tsvules ta joltik ti Jeovae yakʼoj mantaletik sventa talelalil ti tsotsik tajek skʼoplal xchiʼuk ti skʼan xchʼunik li buchʼutik tskʼan chichʼik ta mukʼe. Chkakʼtik venta ti koʼol smukʼtikil li ochebaletike. Taje chakʼ ta ilel ti koʼol li mantaletik yakʼoj Jeova ti skʼan xchʼunik li yajtuneltake, mu ventauk li kʼusi sbainojik ta tsobobbaile.
Jmoj chveʼik ta xmexa Jeova
Li veʼebaletike (8) tsvules ta joltik li kʼusi tspasik ta voʼne li judaetike, yuʼun xuʼ jmoj tslajesik jlomuk li matanal ti chichʼik batel ta temploe; xkoʼolaj ti jaʼ chchiʼinik ta veʼel li Jeovae. Avie mu xa jechuk chichʼ pasel. Li yajtsʼaklomutik Kristoe yakal chkichʼtik ta mukʼ Dios ta templo ta mantal ti bu jkoj noʼox laj yichʼ akʼel milbil matanale (Ebr. 10:12). Pe ta to xkakʼtik milbil matanaletik sventa jkʼupil kʼoptatik li Diose (Ebr. 13:15).
Persa chkʼot ta pasel li kʼusi yaloj Diose
Kʼalal la achan skotol li kʼusi laj yichʼ pʼisel li ta templo laj yil Esekiele, xuʼ van mu xavaʼibe smelolal skotol. Pe oy kʼusi tsots skʼoplal chakʼ jchantik, yuʼun chakʼ ta ilel ti persa chchaʼta yav yuʼun Jeova li melel yichʼel ta mukʼe, persa chkʼot ta pasel, xkoʼolaj ti lek pʼisbil kʼuchaʼal li temploe. Li Esekiele muʼyuk laj yil krixchanoetik kʼalal akʼbat yil li temploe, pe laj onoʼox stsʼiba komel ti laj yichʼik tukʼibtasel yuʼun Jeova li paleetik, li bankilaletik xchiʼuk li jteklume. Skotol li yajtuneltak Diose skʼan xchʼunbeik li stukʼil mantaltake.
