Li albil kʼopetik ta Vivlia xchiʼuk li kʼusitik kʼotemik ta pasele jamal chakʼ ta ilel ti lik ajvalilajuk ta vinajel ta 1914 li Jesuse, taje jaʼo te lik talel li slajeb sbalumil Satanase. ¿Kʼusi la spas Jesus kʼalal och ta Ajvalile? ¿Mi ta van skolta lokʼel ta anil ta skʼob Mukʼta Babilonia li yajtuneltake? ¿Mi ta van svaʼan «li tukʼil xchiʼuk pʼijil mosoil» li ta sjabilal 1914? ¿Mi jaʼo van tslikes li mukʼta abtelal ta stsobbel sat li tsʼunobile? (Mat. 24:45).

Yaʼeluke muʼyuk. Li jtakbol Pedroe akʼbat snaʼ yuʼun Dios ti te chlik ‹li chapanel ta sna Diose› (1 Ped. 4:17). Koʼoltik jech laj yal li j-alkʼop Malakias eke, yuʼun laj yal bakʼin chtal Jeova ti bu ch-ichʼat ta mukʼe, jmoj chtal xchiʼuk li «j-almantal sventa trato» ti jaʼ li Xnichʼon Diose (Mal. 3:1-5). Li vaʼ orae, jaʼo yorail preva xchiʼuk lekubtasel. ¿Mi kʼot van ta pasel li albil kʼopetik taje?

 Li kʼusitik kʼotanuk ta pasele chakʼ ta ilel ti jaʼ jeche. Li ta sjabilal 1914 kʼalal ta slikebaltik 1919, li stestigotak Jeova ti Jchanolajeletik ta Vivlia toʼox sbiike tsots laj yichʼik akʼel ta preva xchiʼuk laj yichʼik lekubtasel. Epal yajtuneltak Diose chopol laj yaʼi sbaik ta skoj ti muʼyuk tal slajeb li kʼusitik oy ta balumil li ta 1914. Mas to chopol laj yaʼiik kʼalal cham li Charles Russell ta sjabilal 1916, yuʼun ta sjunul yoʼonton la sbeiltas li steklumal Diose. Junantik ermanoetik ti lek tajek xil sbaik xchiʼuk li ermano Russelle lik skontrainik li Joseph Rutherford ti jaʼ kʼot ta xkʼexole. Muʼyuk xa lek tsobolik, jaʼ yuʼun li ta sjabilal 1917 jutuk xa mu la xchʼak sba li organisasione. Li ta 1918, li jnitvanejetik ta relijione la stijbeik yoʼonton li j-abteletik sventa mu tukʼuk xichʼ chapanel li ermano Rutherford xchiʼuk li vukvoʼ xchiʼiltak ta abtele, vaʼun tikʼatik ta chukel. Ta skoj taje, la smakik li smeʼ nail abtelal ta Brooklyne. Jamal xvinaj ti muʼyuk toʼox kolem ta skʼob Mukʼta Babilonia li steklumal Diose.

Li ta sjabilal 1919, oy kʼusitik kʼot ta pasel ta anil ti muʼyuk jech malabile. ¿Kʼusi ti kʼot ta pasele? Ta slikebaltik li jabil taje, lokʼik ta chukel li ermano Rutherford xchiʼuk xchiʼiltake, vaʼun ta anil noʼox oy kʼusitik lik spasik. Ta anil noʼox lik xchapanik jun asamblea ti mu xchʼay-o ta jolale. Jech xtok, laj yichʼ pasel jlik vun ti jaʼ sventa xichʼ pukel li ta kampanya sventa cholmantale, taje jaʼ li revista The Golden Age (avie jaʼ sbi ¡Vikʼiluk me jsatik!). Jech xtok, laj yichʼ vaʼanel jun ermano ta jujun tsobobbail sventa xchapan xchiʼuk sbeiltas li cholmantale. Li vaʼ jabil xtoke, laj yichʼ lokʼesel ta baʼyel velta li Bulletin (avie jaʼ sbi Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj), li vun taje koltavan sventa lekuk chapal xichʼ cholel mantal.

¿Kʼuxi pas yuʼunik skotol taje? Jamal xvinaj ti skoltaoj xa ox lokʼel ta skʼob Mukʼta Babilonia steklumal li Kristoe xchiʼuk ti svaʼanoj xa ox li tukʼil xchiʼuk pʼijil mosoile. Yakal xa chichʼ tsobbel sat li tsʼunobile. Leʼ xa tal ta sjabilal 1919, ep xa tajek li kʼusitik yichʼoj pasele.