Li Esekiele oy xa onoʼox yiloj slokʼoltak tot vakaxetik xchiʼuk leonetik ti oy xikʼik ti yichʼojbeik sat krixchano xchiʼuk ti te oyik ta yochebal li pasob mantaletik xchiʼuk ta temploetike. Li ta voʼneal Asiria xchiʼuk Babiloniae, oy toʼox jech slokʼobaltak. Li buchʼutik xilik li slokʼobaltak taje xuʼ van labal sba chaʼiik xchiʼuk jech van laj yaʼi sba ek li Esekiele. Li lokʼoletik taje te van vakib metro staylej xchiʼuk toj tsots sjuʼelik yilel, pe muʼyuk xkuxlejalik, yuʼun pasbilik ta ton.

Toj jelel li chanvoʼ anjeletik laj yil li Esekiele, ¡yuʼun kuxajtik laj yil! Jech oxal, ta skoj ti toj labal sba laj yil li j-alkʼope, mas ta lajuneb ta velta laj yalbe skʼoplal li anjeletik li ta slikebal slivroe o kuxlejaletik jech kʼuchaʼal chal li tsʼib ta yok vune (Esek. 1:5-22). Kʼalal laj yil Esekiel ti koʼol bu chbatik li chanvoʼ anjeletik xchiʼuk ti chbatik bu chal Diose, jaʼ koltaat Esekiel yoʼ teuk ta snopben ti jaʼ noʼox Jeova tspas ta mantal skotol li kʼusitik spasoje. Taje toj labal sba chkiltik ek, yuʼun chakʼbutik ta ilel ti toj tsots sjuʼel xchiʼuk smukʼulal li Jeovae xchiʼuk ti jun yutsil li pasob mantal yuʼune (1 Kron. 29:11).