Voʼoxuk ti akʼanojik li Jeovae:

Li ta sjabilal 1971, echʼ li asamblea ta distrito ti xi sbie: «Nombre divino». Li vaʼ asamblea ti ta inglés jelave muyubajik tajek ti laj yichʼik junantik achʼ vunetike. Xi laj yal li Anuario ta 1972: «Toj ep vunetik laj yichʼ akʼel ti muʼyuk bu jech malabile». Xi laj yal jun ermano ta sventa li jlik vune: «Toj labal sba kʼu yelan chchapbe smelolal li kʼusi chkʼot ta pasel ta jelavele. ¡Muʼyuk bu jech kichʼojkutik-o akʼbel!». ¿Kʼusi vunal yakal chalbe skʼoplal? Jaʼ li livro “Las naciones sabrán que yo soy Jehová”... ¿cómo? ¿Kʼu yuʼun ti stuk noʼox jech li livroe? Yuʼun chchapbe smelolal li kʼusitik achʼ yichʼoj aʼibel smelolal li ta slivroal Esekiele xchiʼuk chal kʼusi chkʼot ta stojolal li krixchanoetik ta jelavele.

Ti kʼuxi lik yichʼ pukel li livro “Las naciones sabrán” epajem talel li yajtuneltak Jeovae, yuʼun oy toʼox van jun miyon xchiʼuk oʼlol, pe avie oy mas ta vaxakib miyon (Is. 60:22). Li ta steklumal Jeovae oy mas ta mil jeltos kʼopetik xchiʼuk junantike muʼyuk toʼox bu yilojik jlikuk vun ti tsjambe lek smelolal li albil kʼop akʼbat yil Esekiele (Sak. 8:23).

Leʼ xa tal ta sjabilal 1971, mas xa yichʼoj aʼibel smelolal li chanubtaseletik ta Vivliae (Prov. 4:18). Li ta 1985, lik yichʼ aʼibel smelolal ti tukʼ laj yichʼ albel skʼoplal li yan chijetike (Juan 10:16; Rom. 5:18; Sant. 2:23). Li ta 1995, te laj yichʼ aʼibel smelolal ti jaʼo chichʼik chapanel li chijetik xchiʼuk tentsunetik kʼalal jaʼo xyaket li mukʼta tsatsal vokolile (Mat. 24:21; 25:31, 32). Skotol taje koltavan sventa xichʼ aʼibel smelolal li slivroal Esekiele.

Li ta jabiletik echʼem talele, mas to yichʼoj aʼibel smelolal. Jnopbetik skʼoplal kʼusi chakʼ jchantik li lokʼolkʼopetik laj yal Jesuse. Junantike lek xa xkaʼibetik smelolal xchiʼuk chkʼot ta koʼontontik. Oy lokʼolkʼopetik ti jaʼ chalbe skʼoplal li kʼusi chkʼot ta pasel li ta mukʼta tsatsal vokolil ti xkoʼolaj ti te xa jkʼelojtike. Avie, xkaʼibetik xa smelolal junantik albil kʼopetik ta slivroal Esekiel jech kʼuchaʼal li Gog ta Magogue (kapitulo 38 xchiʼuk 39), li vinik ti yichʼoj batel yav tinta sventa sekretarioe (kapitulo 9), li stenlejaltik ti noj ta takin baketike xchiʼuk li chaʼtel teʼ ti chichʼ lotele (kapitulo 37). Ta skoj ti ep kʼusi laj yichʼ aʼibel smelolale, laj yichʼ achʼubtasel li kʼusi laj yichʼ alel li ta livro “Las naciones sabrán”.

Jaʼ yuʼun, mu labaluk sba ta aʼiel ti oy junantik yajtuneltak Dios la sjakʼbe sbaik kʼusi ora chlokʼ jlikuk vun ti chal li kʼusi achʼ yichʼoj aʼibel smelolal ta sventa li albil kʼopetik laj yal Esekiele. Jech oxal, laj yichʼ lokʼesel li livro ¡Tsta yorail ti jaʼ xa noʼox Jeova chichʼ ichʼel ta mukʼe! Kʼalal chachan batel li 22 skapituloale xchiʼuk mi la anopbe skʼoplal li lokʼoletike, chavakʼ venta ti ep laj yichʼ sabel skʼoplale. La jpaskutik tajek orasion xchiʼuk la jnopbekutik smelolal sventa jnaʼkutik kʼusi tskʼan chakʼ ta chanel Jeova li ta slivroal Esekiele. Laj yichʼ takʼel li sjakʼobiltak liʼe: ¿Kʼusi akʼbat xchanik slivroal Esekiel li buchʼutik kuxiik li vaʼ orae? ¿Kʼusi chakʼ jchantik li avi eke? ¿Kʼusi albil kʼopetik muʼyuk to kʼotemik ta pasel? Xchiʼuk ¿mi persa skʼan jsabetik smelolal li albil kʼop chal ta Esekiele? Li stakʼobiltake tskoltautik sventa xkaʼibetik smelolal li albil kʼopetik ta Esekiel ti jaʼ li livro ti ta jkʼupintik skʼelele.

Mi la jchantik batel li slivroal Esekiele, labal sba chkiltik li jvokʼ s-organisasion Jeova ti te oy ta  vinajele. Jech noxtok, ta jtatik ta kʼelel li mantaletik yakʼoj Jeova sventa xichʼ ichʼel ta mukʼ ta vinajel xchiʼuk ta balumil jech kʼuchaʼal oy ta yoʼontone. Li livro Yichʼel ta mukʼ Jeovae tskoltaot sventa masuk ep sbalil xavil li kʼusi spasoj Jeova ta stojolal li yajtuneltake xchiʼuk li kʼusi tspas ta jelavele. Chavakʼ venta ti oy chaʼtos kʼusi mas chalbe skʼoplale. Baʼyel, sventa lek chilutik li Diose, skʼan xkojtikintik xchiʼuk ti jnaʼtik ti jaʼ li Mukʼul Jpasmantal ta vinajel balumile. Xchibal, skʼan xkichʼtik ta mukʼ jech kʼuchaʼal tskʼane xchiʼuk ti jkuxlebintik li smantaltake.

Li kʼusi oy ta koʼontonkutike jaʼ ti akʼo skoltaoxuk li livro sventa jaʼuk noʼox xavichʼik ta mukʼ li Jeovae xchiʼuk ti xachʼultajesbeik li xchʼul bie. Jech xtok, tskoltaoxuk sventa xamalaik tsta yorail tsnaʼik jteklumetik buchʼu jaʼ li Jeovae (Esek. 36:23; 38:23).

Akʼo yakʼboxuk bendision li Jtotik Jeova ti jech chavakʼ avipalik ta yaʼibel smelolal li kʼusi chalbutik li ta slivroal Esekiele.