1-3. ¿Kʼusi oy ta yoʼonton Jeova ti akʼo xil Esekiel li ta temploe, xchiʼuk kʼu yuʼun? (Kʼelo ti bu chal kʼusi ta jkʼeltik ta xchaʼvokʼale).

 LI J-ALKʼOP Esekiele jaʼ xnichʼon jun pale, jaʼ yuʼun xojtikin lek li Smantal Moisese, li templo ta Jerusalen xchiʼuk ti kʼu yelan skʼan ichʼel ta mukʼ ta templo li Jeovae (Esek. 1:3; Mal. 2:7). Li ta sjabilal 612 kʼalal muʼyuk toʼox talem Jesuse, oy kʼusi lik kʼotuk ta pasel ta templo ti chopol chil li tukʼil judaetik ti chichʼik ta mukʼ li melel Diose xchiʼuk ti te skʼoplal li Esekiel eke.

² Li kʼusi oy ta yoʼonton Jeovae jaʼ ti akʼo xil Esekiel li kʼusi chopol yakal chkʼot ta pasel ta templo sventa xalbe li moletik ta Juda ti chukbilik batel eke xchiʼuk ti te tsobolik ta sna Esekiele (kʼelo Esekiel 8:1-4; Esek. 11:24, 25; 20:1-3). Li Jeovae la stunes xchʼul espiritu sventa oy kʼusi xakʼbe yil li Esekiele. Akʼbat yil ti te toʼox oy ta sna ta Tel-Abib ti te xkom ta xokon li ukʼum Kebar ta Babiloniae xchiʼuk laj yil ti ikʼat batel ta Jerusalen ti te xkom ta stukʼil smaleb kʼakʼale, ti ta sienal noʼox kilometro snamale. Li Esekiele laj yil ti ikʼat batel yuʼun Jeova li ta temploe, kʼalal te xa ox oy li ta tiʼ na ti te xkom ta norte ta bikʼit amakʼe, akʼbat yil sjunul li temploe.

³ Li Esekiele laj yil chantos kʼusitik ti batsʼi chopolik tajek ti chakʼ ta ilel ti sokemik ta mantal li jun jteklume. ¿Kʼusi kʼot ta stojolal li  melel yichʼel ta mukʼ Diose? ¿Kʼusi chakʼ jchantik li kʼusi laj yil Esekiele? Jmojuk jkʼeltik batel xchiʼuk Esekiel li kʼusi akʼbat yil ta temploe. Pe baʼyel jkʼeltik kʼusi oy ta yoʼonton Jeova ti akʼo spasik li buchʼutik chtunik ta stojolale.

4. Li Jeovae, ¿kʼusi tskʼanbe li buchʼutik chtunik ta stojolale?

⁴ Kʼalal skʼan toʼox van 900 jabil xkuxi li Esekiele, li Jeovae jamal laj yal kʼusi oy ta yoʼonton akʼo spasik li buchʼutik chichʼik ta mukʼe. Xi chal li xchibal mantal laj yakʼbe j-israeletik ti te skʼoplal li ta Lajuneb Mantale: «Li Jeova Diosun avuʼune, jaʼ Diosun ti jtuk noʼox ta jkʼan ichʼel ta mukʼe» (Eks. 20:5). * Kʼalal laj yal ti ‹jtuk noʼox ta jkʼan ichʼel ta mukʼ› xie, laj yakʼ ta naʼel ti muʼyuk chchʼam ti xichʼuk ichʼel ta mukʼ yan diose. Jech kʼuchaʼal laj kiltik li ta xchibal kapitulo ta livro liʼe, jtos ti kʼusi skʼan jpastik yoʼ xkichʼtik ta mukʼ Diose jaʼ ti xkichʼtik ta mukʼ stuk li Jeovae. Li yajtuneltake skʼan jaʼuk mas tsots skʼoplal xil ta xkuxlejalik (Eks. 20:3). Jaʼ xkaltik, li Jeovae tskʼan ti sakikuk ta mantal li buchʼutik chtunik ta stojolale xchiʼuk ti mu skapik ta jecheʼ yichʼel ta mukʼ dios li kʼusi tspasike. Li ta 1513 kʼalal muʼyuk toʼox talem Jesuse, li j-israeletike la xchʼamik li trato la spas Jeova ta stojolalike, vaʼun jaʼ jech jamal laj yalik ti stuk noʼox Jeova chichʼik ta mukʼe (Eks. 24:3-8). Li Jeovae chkʼot ta pasel yuʼun li tratoetik chale xchiʼuk oy ta yoʼonton ti jechuk spasik ek li buchʼutik chtunik ta stojolale (Deut. 7:9, 10; 2 Sam. 22:26).

5, 6. ¿Kʼu yuʼun jaʼ noʼox stuk Jeova skʼan xichʼik ta mukʼ li j-israeletike?

⁵ ¿Mi mu spas yuʼun j-israeletik kʼalal laj yal Jeova ti jaʼ noʼox stuk skʼan ichʼel ta mukʼe? ¿Mi yuʼun van toj tsots li kʼusi tskʼan Jeovae? Muʼyuk. Li Jeovae jaʼ li Dios ti skotol xuʼ yuʼune, jaʼ li Ajvalil ta vinajel balumile, «li snioʼal kuxlejale», yuʼun jaʼ j-akʼ kuxlejal (Sal. 36:9; Ech. 17:28). Jaʼ Jeova li buchʼu la skolta li j-israeletike xchiʼuk xi la svulesbe ta sjol steklumal kʼalal laj yakʼ li Lajuneb Mantale: «Voʼon Jeova Diosun avuʼun ti la jlokʼesot ta yosilal Ejipto ti bu toʼox tikʼilot ta mosoile» (Eks. 20:2). Jamal xvinaj ti jaʼ noʼox Jeova skʼan xichʼik ta mukʼ li j-israeletike.

⁶ Mu snaʼ xjel li Jeovae (Mal. 3:6). Li stuke ep ta velta yaloj ti jaʼ noʼox stuk skʼan ichʼel ta mukʼe. Jaʼ yuʼun, jnopbetik skʼoplal kʼu van yelan laj yaʼi sba Jeova kʼalal laj yil li chantos kʼusitik chopole xchiʼuk ti laj yakʼbe yil Esekiele.

7. 1) ¿Kʼusi yakal tspasik li judaetik ti te toʼox oyik ta snorteal stiʼ temploe? ¿Kʼu yelan laj yaʼi sba Jeova ta skoj taje? (Kʼelo li lokʼol ta slikebal kapituloe). 2) ¿Kʼu yuʼun chopol laj yaʼi sba li Jeovae? (Kʼelo li tsʼib ta yok vune, 2).

⁷ (Kʼelo Esekiel 8:5, 6). ¡Chʼayal to kʼot yoʼonton Esekiel ta skoj li kʼusi laj yile! Laj yil ti te oy ta snorteal stiʼ templo junantik judaetik ti svalopatinojik li Jeovae xchiʼuk ti yakal chichʼik ta mukʼ jun lokʼole. Yikʼaluk jaʼ jun chʼul poste ti jaʼ skʼoplal li meʼ dios Asera yuʼun jkanaanetike xchiʼuk ti tsnopik ti jaʼ yajnil li Baale. Mu ventauk kʼusi diosal yakal chichʼik ta mukʼ, yuʼun muʼyuk yakal chchʼunik li trato la spasik xchiʼuk Jeovae. Kʼalal laj yichʼik ta mukʼ li lokʼol taje, chopol  laj yaʼi sba li Jeovae xchiʼuk la sabeik skʼakʼal yoʼonton (Deut. 32:16; Esek. 5:13). * Skʼan teuk ta joltik ti mas ta chanib sien jabil te naki Jeova ti bu chʼul li ta temploe (1 Rey. 8:10-13). Pe li avie, jaʼ xa chichʼik ta mukʼ jecheʼ diosetik ta templo li judaetike. Ta skoj taje, li Jeovae laj yikta ti bu chʼule.

8. ¿Kʼusi xkoʼolaj-o avi li lokʼol laj yil Esekiel ti chopol chaʼi sba-o li Diose?

⁸ ¿Kʼusi xkoʼolaj-o avi li lokʼol laj yil Esekiel ti chopol chaʼi sba-o li Diose? Li jteklum Juda ti la svalopatin komel li Jeovae jaʼ tsvules ta joltik li buchʼutik chtunik ta stojolal Dios ta alele, li relijionetik ti tskuy sbaik ta yajtsʼaklom Kristoe. Taje tstunesik santoetik, jaʼ yuʼun akʼo mi chalik ti chichʼik ta mukʼ li Diose, muʼyuk chchʼambatik. Jnaʼojtik ti mu xjel li Jeovae, jaʼ yuʼun jpʼel ta koʼontontik ti oy srasonal ti likem skʼakʼal yoʼontone, jech kʼuchaʼal ilin ta stojolal li voʼneal Judae (Sant. 1:17). ¡Li Jeovae nom yakʼoj sba ta stojolal li buchʼutik jech tspasik ti tskuy sbaik ta yajtsʼaklom Kristoe!

9, 10. ¿Kʼu yelan tspʼijubtasutik li kʼusi la spasik judaetik ti lik yichʼik ta mukʼ yan diosetik li ta temploe?

⁹ ¿Kʼu yelan tspʼijubtasutik li kʼusi la spasik judaetik ti lik yichʼik ta mukʼ yan diosetik li ta temploe? Mi ta jkʼantik stuk noʼox chkichʼtik ta mukʼ li Jeovae, skʼan jchʼuntik li mantal liʼe: «Mu me xavichʼik ta mukʼ jsetʼuk li santoetike» (1 Kor. 10:14). Pe xuʼ van xi ta jnoptike: «¡Mi jsetʼuk chlokʼ ta koʼonton stunesel lokʼoletik o santoetik sventa xkichʼ ta mukʼ li Jeovae!». Pe li yichʼel ta mukʼ yan kʼusie, ep kʼusi smakojbe skʼoplal xchiʼuk bateltike mu jamaluk ta kʼelel. Xi chal jlik livro ti chalbe skʼoplal Vivliae: «Li yichʼel ta mukʼ yan kʼusie, te skʼoplal jtosuk kʼusi ti oy sbalil, ti tsots skʼoplal, ti oy sjuʼele o ti jaʼ chbat-o koʼontontik yuʼune, jaʼ li kʼusi mas toyol skʼoplal chkiltik ti jaʼ xa muʼyuk tsots skʼoplal chkiltik li Diose». Jech oxal chaʼa, li yichʼel ta mukʼ kʼusi yane te smakojbe skʼoplal ti chbat ta koʼontontik skʼanel tajek li kʼusi x-ayan kuʼuntike, skʼanel takʼin, chiʼinejbail ta vayel xchiʼuk li chʼayob oʼontonaletike... Ti melel xkaltike, te smakojbe skʼoplal skotol li kʼusi baʼyel chkakʼ ta jkuxlejaltike ti jaʼ xa muʼyuk tsots skʼoplal chkiltik li yichʼel ta mukʼ Jeovae (Mat. 6:19-21, 24; Efes. 5:5; Kol. 3:5). Skʼan jkʼel jbatik lek yoʼ mu yanuk xa kʼusi chlik kichʼtik ta mukʼ, yuʼun jaʼ noʼox Jeova ti mas tsots skʼoplal skʼan xkiltik xchiʼuk ti xkichʼtik ta mukʼe (1 Juan 5:21).

¹⁰ Li kʼusi baʼyel akʼbat yil yuʼun Jeova li Esekiele laj yil ‹kʼusitik toj chopol tspasik xchiʼuk ti toj ibal sbae›. Li Jeovae xi laj yalbe li tukʼil yaj-alkʼope: «Oy to kʼusitik chavil ti mas to toj ibalik sbae». Pe ¿mi oy to van yan kʼusi toj ibal sba ti jaʼ xkom to li yichʼel ta mukʼ jun lokʼol ta temploe?

11. ¿Kʼusitik toj chopol laj yil Esekiel kʼalal och li ta bikʼit amakʼ te ta sna Jeova ti te oy ta yeloval li kajleb matanale?

¹¹ (Kʼelo Esekiel 8:7-12). Li Esekiele la sjom li muroe xchiʼuk och li ta «bikʼit amakʼ te ta sna Jeovae» ti te oy ta yeloval li kajleb matanale, jaʼ to laj yile, te lokʼtabil ‹ep ta tos slokʼoltak chonbolometik  ti xkilet chanavike, slokʼoltak ibal sba chonbolometik xchiʼuk slokʼoltak skotol li ibal sba santoetike›. * Li kʼusitik te lokʼtabile jaʼ skʼoplal li jecheʼ diosetike. Pe oy to kʼusi laj yil Esekiel ti mas to toj chopole, yuʼun laj yil «70 ta voʼ moletik yuʼun jteklum Israel» «ta ikʼal osil» xchiʼuk ti yakal chchikʼbeik pom li jecheʼ diosetike. Li Smantal Moisese chal ti xkoʼolaj ta xchʼailal muil pom li orasionetik ti lek chaʼi li Diose ti jaʼ tspasik li buchʼutik tukʼ yakʼoj sbaike (Sal. 141:2). Pe ta sat Jeovae muʼyuk chʼul chil li pom yakal chchikʼik li 70 ta voʼ moletike, yuʼun xtuet yikʼ chaʼi ti xkoʼolaj ti sokem li orasion tspasike (Prov. 15:8). Pe sloʼlaoj sba stukik, yuʼun xi tsnopike: «Muʼyuk yilojutik li Jeovae», pe yiloj skotol li kʼusi yakal tspasik li ta temploe xchiʼuk lek xchapet laj yakʼbe yil li Esekiele.

12. ¿Kʼu yuʼun skʼan tukʼ xkakʼ jbatik akʼo mi ta «ikʼal osil» oyutik? ¿Buchʼutik ti skʼan masuk lek ta chanbel stalelalike?

¹² ¿Kʼusi chakʼ jchantik li kʼusi laj yil Esekiel ta sventa li 70 moletik ta Israel ti chchikʼbeik pom jecheʼ diosetike? Li voʼotik eke skʼan tukʼ xkakʼ jbatik ta stojolal Jeova akʼo mi ta «ikʼal osil» oyutik. Taje jaʼ sventa xkichʼtik ta mukʼ Jeova kʼuchaʼal tskʼane xchiʼuk ti xchikinta li j-orasiontike (Prov. 15:29). Jvules ta joltik ti chajal ta sat skotol li Jeovae xchiʼuk ti skʼeloj lek li kʼusi ta jpastike. Jaʼ yuʼun, mi kuxul chkiltik li Jeovae mu yolbajuk ta jpastik kʼusitik chopol akʼo mi jtuk oyutik (Ebr. 4:13). Mas to jech skʼan spas li moletik ta tsobobbaile,  yuʼun skʼan lekuk ta chanbel li stalelalike (1 Ped. 5:2, 3). Li buchʼutik chkʼotik ta tsobobbaile tskʼanik ti yakʼojuk ta xkuxlejal li beiltaseletik ta Vivlia li mol ta tsobobbail ti chchanubtasvan ta plataformae o ti tsbeiltas li yichʼel ta mukʼ Diose akʼo mi ta «ikʼal osil» oyik, jaʼ xkaltik, mi muʼyuk bu kʼelbilike (Sal. 101:2, 3).

13. ¿Kʼusi laj yil Esekiel ti yakal tspasik li antsetik ta jun yochebal temploe?

¹³ (Kʼelo Esekiel 8:13, 14). Kʼalal laj xa ox yil Esekiel li chaʼtos kʼusitik toj chopole, xi to albat yuʼun li Jeovae: «Oy to kʼusitik chavil ti yakal tspasik ti mas to toj ibalik sbae». ¿Kʼusi to ch-akʼbat yil li j-alkʼope? Li ‹ta yochebal stiʼ sna Jeova ti te xkom ta nortee, laj yil ti te chotajtik antsetik ti yakal chokʼitaik li dios Tamuse›. Yaʼeluke, jaʼ sdiosik ta Mesopotamia ti Dumuzi tstsʼibaik ta Sumeriae xchiʼuk ti xchʼunojik ti jaʼ yan smalal li Istar ti jaʼ meʼ dios sventa lekuk x-alaj xnichʼnaj li krixchanoetike. * Yaʼeluk ti jech ch-okʼik tajek li antsetike jaʼ ta skoj ti jech nopem xaʼiik spasel ta srelijionik ti te nitil skʼoplal xchiʼuk li slajel Tamuse. Li antsetike te yakal ch-okʼik ta templo ti bu chichʼ ichʼel ta mukʼ li Jeovae, te yakal tspasik li kʼusi nopem xaʼiik spasel li jecheʼ relijionetike. Pe taje maʼuk skʼan xal ti lek ta xil Jeova ta skoj ti te tspasik li ta stemploe. ¡Chopol tajek kʼusi yakal spasik! Li antsetik ti la svalopatinik Jeovae yakal tspasik li kʼusitik ‹mas to toj ibalik sba› ta sat li melel Diose.

14. ¿Kʼusi chakʼ jchantik ti kʼu yelan laj yil Jeova li kʼusi la spasik li antsetike?

¹⁴ ¿Kʼusi chakʼ jchantik ti kʼu yelan laj yil Jeova li kʼusi la spasik li antsetike? Mi ta jkʼan chkichʼtik ta mukʼ Jeova jech kʼuchaʼal oy ta yoʼontone, skʼan mu jkaptik jsetʼuk xchiʼuk li kʼusi tspasik li jecheʼ relijionetike. Mu jtikʼ jbatik ta spasel li kʼinetik ti slikesojik li krixchanoetik ti muʼyuk chtunik ta stojolal Diose. ¿Mi tsots van skʼoplal ti jnaʼtik bu likem tal junuk kʼine? Tsots skʼoplal. Bateltike ta jnoptik ti muʼyuk chopol li kʼinetik jech kʼuchaʼal li Svokʼel Ninyoe (Navidad), skʼinal Achʼ Jabil, Kʼin Kuxel xchiʼuk li kumpleanyoetike. Teuk ta joltik ti laj yil stuk Jeova kʼuxi la slikesik talel kʼinetik li jecheʼ relijionetike xchiʼuk ti lek xa ojtikinbil avi li kʼinetik taje. Li Jeovae chopol chil-o li kʼinetik ti tspasik li buchʼutik muʼyuk chtunik ta stojolal Dios akʼo mi voʼne xa ti la slikesike o ti skapojik xchiʼuk li melel yichʼel ta mukʼ Diose (2 Kor. 6:17; Apok. 18:2, 4).

15, 16. 1) ¿Kʼusi la spasik li 25 viniketik li ta bikʼit amakʼ ta temploe? 2) ¿Kʼu yuʼun chopol tajek laj yaʼi sba yuʼunik Jeova li viniketik taje?

¹⁵ (Kʼelo Esekiel 8:15-18). Li Jeovae lik yakʼbe yil Esekiel li xchanibal kʼusi chkʼot ta pasele, ti xi xa onoʼox yaloje: «Oy to kʼusitik chavil ti mas to toj ibalik sbae». Xuʼ van xi la sjakʼbe sba li j-alkʼope: «¿Mi oy to kʼusi mas to toj chopol ta jkʼel?». Li Esekiele jaʼo te oy li ta bikʼit amakʼ li ta temploe, vaʼun laj yil 25 ta voʼ viniketik ta yochebal templo ti «te nijajtik ta yeloval kʼakʼal li ta slokʼeb kʼakʼale», yuʼun chichʼik ta mukʼ. Toj echʼ xa noʼox chopol kʼusi la spasik ta stojolal li Jeovae, ¿kʼu yuʼun jech chkaltik?

 ¹⁶ Jnopbetik skʼoplal kʼu yelan kʼot ta pasel. Li yochebal temploe jaʼ skʼeloj batel li slokʼeb kʼakʼale, jech oxal mi oy buchʼu ch-och batele jaʼ tskʼel batel li smaleb kʼakʼale jaʼ chkom ta svalopatik li slokʼeb kʼakʼale. Pe li 25 viniketike jaʼ «svalopatinojik komel li stemplo Jeovae» xchiʼuk jaʼ «skʼelojik batel li slokʼeb kʼakʼale; te nijajtik ta yeloval kʼakʼal», yuʼun chichʼik ta mukʼ. Kʼalal jech la spasike laj yakʼik ta ilel ti tsvalopatinik komel li Jeovae, yuʼun jaʼ toʼox sna li temploe (1 Rey. 8:10-13). Li 25 viniketik taje svalopatinojik li Jeovae, la skontrainik xchiʼuk muʼyuk la xchʼunik li mantal ta Deuteronomio 4:15 kʼalal ta 19. ¡Chopol tajek kʼusi la spasik ta stojolal li Dios ti stuk noʼox skʼan ichʼel ta mukʼe!

17, 18. 1) ¿Kʼusi chakʼ jchantik li viniketik laj yil Esekiel ti chichʼik ta mukʼ li kʼakʼale? 2) ¿Kʼusi sok yuʼunik li j-israeletike, xchiʼuk kʼu yuʼun jech kʼot ta pasel?

¹⁷ ¿Kʼusi chakʼ jchantik li viniketik laj yil Esekiel ti chichʼik ta mukʼ li kʼakʼale? Mi ta jkʼantik chkichʼtik ta mukʼ Jeova jech kʼuchaʼal oy ta yoʼontone, skʼan jkʼanbetik koltael sventa jnaʼtik kʼuxi ta ichʼel ta mukʼ o sventa jkʼanbe jpʼijiltik. Jvules ta joltik ti «jaʼ kʼakʼal [...] li Jeova Diose» xchiʼuk li Skʼope jaʼ «sakjaman» yuʼun li jbetike (Sal. 84:11; 119:105). Li Jeovae jaʼ tstunes li Skʼop xchiʼuk li vunetik slokʼesoj li s-organisasion sventa lek sakjamanuk li jnopbentik xchiʼuk li koʼontontike. Maʼuk noʼox, yuʼun chakʼ kiltik kʼusi skʼan jpastik sventa xijmuyubaj ta melel li avie, ti junuk noʼox koʼontontike xchiʼuk ti jtatik li kuxlejal sbatel osil ta jelavele. Pe mi jaʼ ta jtijlutik li balumil sventa chchanubtasutik xchiʼuk chakʼbutik ta ilel kʼusi skʼan jpas ta jkuxlejaltike, xkoʼolaj ti ta jvalopatintik komel li Jeovae, chopol chaʼi sba kuʼuntik xchiʼuk chat tajek yoʼonton. ¡Pe mu jkʼan jech jpasbetik li Jdiostike! Oy to kʼusi jamal chakʼbutik ta ilel li kʼusi laj yil Esekiele, ti mu stakʼ jchiʼintik li buchʼutik tsvalopatinik komel li Jeovae (Prov. 11:9).

¹⁸ Laj xa kiltik chantos kʼusitik laj yil Esekiel ti toj echʼ noʼox chopol la spasik ta Judae, laj yil kʼu yelan chichʼik ta mukʼ jecheʼ diosetik xchiʼuk ti maʼuk chichʼik ta mukʼ li melel Diose. Taje jamal laj yakʼ ta ilel ti sokik tajek ta mantal li jvalopatinej mantaletik ta Judae. Kʼalal sokik ta mantal li j-israeletike, muʼyuk xa lek laj yil sbaik xchiʼuk Jeova sjunul li jteklume. Mi oy buchʼu muʼyuk lek ta mantale tsok li stalelal eke, taje jamal vinaj ta stojolal li j-israeletik ti la svalopatinik mantale. Ta skoj ti lik spasik li kʼusitik toj ibalik sba sventa mulivajele, muʼyuk xa lek laj yil sbaik xchiʼuk Jeova mi jaʼuk xa lek laj yil sbaik xchiʼuk li yantike. Oy kʼusi yan akʼbat snaʼ yuʼun Jeova li Esekiele, yuʼun jaʼ xa lik yalbe skʼoplal xchopol talelal li jvalopatinej mantal j-israeletike. Jkʼeltik kʼusi laj yal.

19. ¿Kʼu yelan laj yalbe skʼoplal Esekiel stalelal li jteklum ti spasoj toʼox jun trato xchiʼuk li Jeovae?

¹⁹ (Kʼelo Esekiel 22:3-12). Sok stalelalik skotol li jnaklejetik ta Judae, yuʼun jaʼ jech lik spasik li ajvaliletike. Ta skoj ti tsots yabtel  «li bankilaletik yuʼun Israele», chakʼik ta milel li buchʼutik muʼyuk smulike, jaʼ jech la xchanik ek li jnaklejetike xchiʼuk muʼyuk xa la xchʼunik li Mantaletik yakʼoj Diose. Li alab nichʼnabiletike muʼyuk chichʼik ta mukʼ li stot smeʼike xchiʼuk nopem tajek xaʼiik ti chchiʼin sbaik ta vayel ti yutsʼ yalal noʼox sbaike. Ta sjunul li jteklume, li jtoyba j-israeletike chopol kʼusi tspasbeik li jyanlumetike, li buchʼu chamem stot smeʼike xchiʼuk li antsetik ti chamem smalalike. Jech xtok, li viniketike chchiʼinik ta vayel antsetik ti oy smalalike. Batsʼi mu x-echʼ yoʼontonik ta skʼanel kʼusitik. Chchon sbaik ta takʼin, tsloʼlaik yantik sventa spasik kanal takʼin xchiʼuk tskʼanbeik sjol stakʼinik akʼo mi abol sba li buchʼu la xchʼamune. ¡Chopol tajek laj yaʼi Jeova ti muʼyuk yakal chchʼunik li Mantaletik li j-israeletik ti spasoj toʼox trato xchiʼuke! Li Jeovae laj yakʼbe Mantaletik li j-israeletik ta skoj ti skʼanojane, pe li stukike mu xakʼik venta taje. Muʼyuk ichʼbil ta mukʼ laj yaʼi sba Jeova kʼalal laj yil ti sok ta jyalel li stalelalike. Jaʼ yuʼun, la stunes Esekiel sventa xi chalbe li jteklume: «Ta j-echʼel la achʼayun ta ajol».

20. ¿Kʼusi chakʼ ta ilel li xchopol talelalik li judaetike?

²⁰ ¿Kʼusi chakʼ ta ilel li xchopol talelalik li judaetike? Li xchopol talelalike tsvules ta joltik li xchopol talelal balumil avie. Li ajvaliletike tspas kʼusi xal yoʼontonik ta skoj ti tsots yabtelike xchiʼuk chakʼbeik svokol li krixchanoetike. Li jnitvanejetik ta relijione, mas to li jbabeetik yuʼun li buchʼutik tskuy sbaik ta yajtsʼaklomtak Kristoe  chakʼbeik bendision li buchʼutik chbatik ta paskʼope akʼo mi ta smiyonal noʼox lajemik ta paskʼopetik. Li jnitvanejetik ta relijione chakʼik ta ilel ti muʼyuk mas tsots skʼoplal li mantaletik ta Vivlia ta sventa li chiʼinejbail ta vayele akʼo mi jamal kʼusi chal li Vivliae xchiʼuk ti chʼulik li mantaletike. Ta skoj taje, batsʼi sokem tajek li stalelal krixchanoetik ta spʼejel balumile. Li Jeovae xuʼ koʼol kʼusi chalbe li jnitvanejetik ta relijion avi jech kʼuchaʼal laj yalbe li Juda ta voʼnee: «Ta j-echʼel la achʼayun ta ajol».

21. ¿Kʼusi chakʼ jchantik li xchopol talelal li judaetike?

²¹ Voʼotik ti te jkʼoplaltik ta steklumal li Jeovae, ¿kʼusi chakʼ jchantik li xchopol talelal li judaetike? Sventa xkichʼtik ta mukʼ Jeova jech kʼuchaʼal oy ta yoʼontone, skʼan sakuk jtalelaltik skotol ora. Taje mu kʼunuk ta pasel ta skoj ti kuxulutik ta jun balumil ti sokem ta jyalele (2 Tim. 3:1-5). Teuk ta joltik ti muʼyuk lek chil Jeova skotol li kʼusi muʼyuk tukʼe (1 Kor. 6:9, 10). Skʼan jchʼunbetik smantal Jeova ta skoj ti jkʼanojtike xchiʼuk ti jkʼanojbetik li smantaltake (Sal. 119:97; 1 Juan 5:3). Muʼyuk yakal ta jtojbetik ta vokol Jeova mi chkakʼtik sokuk jutebuk li jtalelaltike, yuʼun li stuke sak stalelal xchiʼuk chʼul tajek. Mi jsetʼuk ta jkʼantik ti xi chalbutike: «Ta j-echʼel la achʼayun ta ajol».

22. 1) Ta skoj ti anaʼoj xa kʼusi akʼbat yil Esekiel ta sventa li Judae, ¿kʼusi jpʼel ta avoʼonton spasel? 2) ¿Kʼusi ta jkʼeltik li ta yan kapituloe?

²² Ep kʼusi chakʼ jchantik li kʼusi laj yal Jeova ta sventa ti kʼu yelan sokik ta mantal xchiʼuk ta stalelalik li Judae. Skotol li kʼusi laj xa jkʼeltike tskoltautik yoʼ jpʼeluk ta koʼontontik ti jaʼ noʼox xkichʼtik ta mukʼ Jeova jech kʼuchaʼal oy ta yoʼontone. Sventa spas kuʼuntik taje, skʼan jkʼel jbatik sventa mu yanuk kʼusi xlik kichʼtik ta mukʼ xchiʼuk ti sakuk jtalelaltike. Pe ¿kʼusi la spasbe Jeova li steklumal ti la stoy sbaike? Kʼalal akʼbat xa ox yil sjunul templo li Esekiele, xi jamal albate: «Oy kʼusi ta jpasbeik ta skʼakʼal koʼonton» (Esek. 8:17, 18). Oy ta koʼontontik snaʼel kʼusi la spasbe Jeova li jtoyba jteklum Judae, yuʼun xkoʼolajtik li kʼusi chichʼ pasbel li chopol balumil avie. Li ta yan kapituloe, ta jkʼeltik kʼuxi akʼbat stoj smulik yuʼun li Jeovae.