1, 2. 1) ¿Kʼusi lik spas Esekiel ti toj yan-o ta kʼelel laj yilike? (Kʼelo li lokʼol ta slikebal kapituloe). 2) ¿Kʼu yuʼun jech la spas li j-alkʼope?

 SKOTOL li krixchanoetike toj yan-o ta kʼelel laj yilik li kʼusitik yakal tspas li Esekiele. Li judaetik ti chukbilik batel ta Babiloniae te yakal tskʼelik. Oy xa ta vukub kʼakʼal ti jun-o yavile, mu xa snaʼ kʼusi tspas xchiʼuk muʼyuk kʼusi laj yal. Pe jaʼ to laj yilike, tots ta anil xchiʼuk la sbaj sba ta sna. Li slakʼnatake mu snaʼik kʼu yuʼun jech yakal tspas. Kʼalal lokʼ talel ta sna li Esekiele, la stsak jun ladriyo xchiʼuk laj yakʼ ta yeloval. Te lik spasbe slokʼol jun jteklum. Te tsʼijil-o li j-alkʼope xchiʼuk lik sjoy ta bikʼit teʼetik o la spasbe jun smuroal li ladriyoe (Esek. 3:10, 11, 15, 24-26; 4:1, 2).

² Ep buchʼu chkʼot tskʼel kʼusi yakal tspas li j-alkʼope, xuʼ van xi tsjakʼbe sbaike: «¿Kʼu chaʼal ti jech yakal tspase?». Li judaetik ti ikʼbilik batel ta Babiloniae chaʼibeik smelolal ta tsʼakal kʼu yuʼun toj yan-o ta kʼelel li kʼusi la spas li j-alkʼope, yuʼun ta xakʼik venta ti oy kʼusi toj chopol ta xkʼot ta pasel ti jaʼ svinajeb ti oy lek srasonal ti ilinem li Jeovae. ¿Kʼusi ti chkʼot ta pasele? ¿Kʼu yelan tsta svokol li jteklum Israele? ¿Mi oy kʼuxi xuʼ jtabetik sbalil avi li yajtunelutik Jeovae?

3, 4. 1) ¿Kʼusi oxtos laj yakʼ ta ilel Esekiel ta sventa li chapanele? 2) ¿Kʼu yelan laj yakʼ ta ilel Esekiel ti chichʼ joyobtael li Jerusalene?

³ Te van ta sjabilal 613 kʼalal muʼyuk toʼox talem Jesuse, li Jeovae oy oxtos kʼusitik tspas sventa chchapan li Jerusalene xchiʼuk laj yalbe Esekiel ti akʼo xakʼ ta ilele. Laj yakʼ ta ilel kʼu yelan chichʼ setuel li jteklume, kʼu yelan chil svokolik li jnaklejetike xchiʼuk kʼu yelan chichʼ lajesel li jteklum xchiʼuk li jnaklejetike. * Kalbetik mas skʼoplal li oxtos kʼusitik tspas yoʼ xchapan li jteklume.

⁴ Chichʼ setuel li Jerusalene. Li Jeovae xi laj yalbe li Esekiele: «Tsako junuk ladriyo xchiʼuk akʼo ta aveloval. Te xapasbe slokʼol jun jteklum [...]. Akʼo ta ilel kʼuxi ta xichʼ setuel li jteklume» (kʼelo Esekiel 4:1-3). Li ladriyoe jaʼ skʼoplal li jteklum Jerusalene, li Esekiele jaʼ skʼoplal li yajsoltarotak Babilonia ti poʼot xa ox tstunesatik yuʼun Jeovae. Albat ti akʼo spasbe jun smuroal o ti sjoy ta bikʼit teʼetik li ladriyoe, ti akʼo spas junuk tekʼobal sventa xichʼ tsakel ta kʼop li jteklume xchiʼuk ti sjoyobta ta abtejebaletik sventa paskʼope. * Li Esekiele laj yakʼ skotol li abtejebaletik sventa paskʼop ta sjoyobal li ladriyoe, taje jaʼ sventa xakʼ ta ilel ti jaʼ tstunesik li jbabiloniaetik sventa sjoyobtaik li lume xchiʼuk stsakik ta kʼope. Sventa xakʼ ta ilel Esekiel ti toj tsotsik li yajkontraike xchiʼuk ti xkoʼolajik ta tsatsal takʼine, albat ti akʼo stsak junuk pechpech takʼin xchiʼuk ti akʼo stselan ta oʼlol sventa xchʼak li Esekiel xchiʼuk li jteklume. Vaʼun, skʼan tukʼ skʼel batel li jteklume. Li kʼusitik laj yakʼ ta ilel Esekiel ti jaʼ svinajeb paskʼope jaʼ «senyail ta sventa li jteklum Israele», yoʼ snaʼik ti oy kʼusi poʼot xa chkʼot ta pasele. Li Jeovae jutuk xa ox skʼan stunes li yajsoltarotak Babilonia sventa sjoyobtaik li Jerusalen ti jaʼ te vaʼanbil li stemplo Jeovae.

5. ¿Kʼuxi laj yakʼ ta ilel Esekiel li kʼusi tsnuptanik li jnaklejetik ta Jerusalene?

⁵ Li vokoliletik la snuptanik li jnaklejetik ta Jerusalene. Li Jeovae xi la skʼanbe li Esekiele: «Skʼan xatsob trigo, sevada, javax, lenteja, mijo xchiʼuk jtos-o ta trigo [...], vaʼun jaʼ xapas-o apan». Xi to albate: «Skʼan xapʼis ti kʼu yepal chalajese, jaʼ 20 siklo jujun kʼakʼal», jaʼ xkaltik, 230 gramo. Li Jeovae laj yal ti muʼyuk xa chakʼ ochuk veʼlil li ta Jerusalene (Esek. 4:9-16). Li Esekiele maʼuk xa skʼoplal li soltaroetik ta Babiloniae, yuʼun jaʼ xa skʼoplal li jnaklejetik ta Jerusalene. Li kʼusi la spas li j-alkʼope jaʼ sventa xilik ti chlaj sveʼelik ta skoj ti chichʼik joyobtael yuʼun li jbabiloniaetike. Li Esekiele la spas li spane, pe toj yantik-o tajek li skap laj yakʼbee. Taje jaʼ sventa xakʼ ta ilel ti kʼusuk xa noʼox chlik slajesik ta tsʼakale. ¿Mi tsots van tajek chil svokolik ta viʼnal? Xkoʼolaj ti te skʼelojbe sat jnaklejetik ta Jerusalen kʼalal xi laj yal Jeova ta stojolal li Esekiele: «Jaʼ yuʼun, li totiletik te oy ta atojolale ta  stiʼ li xnichʼnabike xchiʼuk li alab nichʼnabiletik eke ta stiʼ li stotike». Vaʼun, laj yal ti chtal tsatsal viʼnal ti xkoʼolaj kʼuchaʼal flechaetik xchiʼuk ti chchamik-oe. Tsots ta xil svokolik ta viʼnal, yuʼun ta kʼunkʼun chlajik batel (Esek. 4:17; 5:10, 16).

6. 1) ¿Kʼusi smelolal li chaʼtos kʼusi laj yakʼ ta ilel Esekiele? 2) ¿Kʼusi smelolal kʼalal albat Esekiel ti akʼo spʼis xchiʼuk ti akʼo xchʼak li stsotsil sjol xchiʼuk yisime?

⁶ Chichʼ lajesel li Jerusalen xchiʼuk li jnaklejetike. Oy chaʼtos kʼusi laj yakʼ ta ilel Esekiel ta sventa li albil kʼope. Li baʼyele jaʼ li kʼusi tspas Jeovae, yuʼun xi albate: «Tsako junuk espada ti oy lek ye sventa xatunes kʼuchaʼal slokʼobil jolil. Juxo lokʼel li ajole xchiʼuk li avisime» (kʼelo Esekiel 5:1, 2). Li skʼob ti la stsak-o espada li Esekiele jaʼ smelolal li skʼob Jeovae, jaʼ xkaltik, ti kʼu yelan tstunes Jeova li soltaroetik ta Babilonia sventa xakʼbe kastigo li jteklume. Li xchibal kʼusi laj yakʼ ta ilel Esekiele jaʼ ti kʼu yelan chil svokol li judaetike, xi albat yuʼun li Jeovae: «Juxo lokʼel li ajole xchiʼuk li avisime». ¿Kʼusi smelolal taje? Jaʼ ti chichʼik tsakel ta kʼop li judaetike xchiʼuk ti ep tajek chchamike. Xi to albat li j-alkʼope: «Laje saʼo junuk akilo sventa xapʼis-o xchiʼuk chʼako ta oxvokʼ». Taje chakʼ ta ilel ti snopoj lek Jeova kʼu yelan chakʼbe kastigo li Jerusalene xchiʼuk ti tslajesbe skʼoplale.

7. Li Jeovae, ¿kʼu yuʼun laj yalbe Esekiel ti akʼo xchʼak ta oxvokʼ li stsotsil sjole, li yisime xchiʼuk ti jelajtik kʼusi tspasbe jujuvokʼe?

 ⁷ Li Jeovae, ¿kʼu yuʼun laj yalbe Esekiel ti akʼo xchʼak ta oxvokʼ li stsotsil sjole, li yisime xchiʼuk ti jelajtik kʼusi tspasbe jujuvokʼe? (Kʼelo Esekiel 5:7-12). Jtos kʼusi la spas Esekiel sventa xakʼik venta li buchʼutik te skʼelojik ti oy junantik te chchamik ta Jerusalene jaʼ ti la xchikʼ jvokʼ stsotsil sjol xchiʼuk yisim ta yut li jteklume. Li xchaʼvokʼale te la xtuchʼilan ta espada ta spat jteklum, taje jaʼ sventa xilik junantik ti te chichʼik milel ta spat li jteklume. Li yoxvokʼale la stani batel sventa xbat ta ikʼ, taje jaʼ smelolal ti junantike tsnutsatik batel ta jun espada ta yantik lumetik. Mu ventauk bu chbatik, pe mu junuk yoʼonton chkuxiik.

8. 1) ¿Kʼusi spatobil oʼontonal laj yakʼ ta ilel li Esekiele? 2) ¿Kʼuxi kʼot ta pasel li albil kʼop ta sventa li jaypʼej stsotsil jolal xchiʼuk isimale?

⁸ Li kʼusi la spas Esekiele chakʼ ta ilel ti oy spatobil yoʼontonike. Kʼalal laj xa ox slokʼ stsotsil sjol xchiʼuk yisim li j-alkʼope, xi to albat yuʼun li Jeovae: «Jech xtok, skʼan xatsak jaypʼejuk li stsotsil ajol xchiʼuk avisime xchiʼuk te xakʼej li ta xpuxbenal akʼuʼ apokʼe» (Esek. 5:3). Taje chakʼ ta ilel ti oy junantik judaetik ti tanpuk batik ta yan lumetik ti muʼyuk chmilatike. Jech xtok, te skʼoplalik ek li buchʼutik tsutik ta Jerusalen ti chukbil batik ta Babilonia 70 jabile (Esek. 6:8, 9; 11:17). ¿Mi kʼot ta pasel li albil kʼop taje? Kʼot, yuʼun kʼalal jelav xa ox jayibuk jabil ti lokʼik ta Babiloniae, li j-alkʼop Ajeoe laj yal ti te xa ox nakalik ta Jerusalen junantik judaetike. Taje jaʼik «li moletik ti laj yilik li baʼyel sna Diose», jaʼ xkaltik, li stemplo Salomone (Esd. 3:12; Ajeo 2:1-3). Li Jeovae la spas li kʼusi laj yale, yuʼun muʼyuk laj yakʼ ti chlaj skʼoplal li melel yichʼel ta mukʼ Diose. Li ta kapitulo 9 li ta livro liʼe, ta jkʼeltik kʼu yelan la xchaʼta yav li melel yichʼel ta mukʼ Diose (Esek. 11:17-20).

9, 10. Li kʼusitik laj yal Esekiele, ¿kʼusitik tsots skʼoplal tsvules ta joltik xchiʼuk ti chkʼot ta pasel ta tsʼakale?

⁹ Li kʼusitik la spas Esekiele tsvules ta joltik li kʼusitik labalik sba chkʼot ta pasel ta jelavele. ¿Kʼusitik chkʼot ta pasel? Li Jeovae tspas li kʼusi muʼyuk smalaojik jech kʼuchaʼal la spas ta stojolal li Jerusalene, yuʼun tstunes li buchʼutik tsots sjuʼelik ta politika sventa tstsakik ta kʼop skotol li jecheʼ relijionetike (Apok. 17:16-18). Mu kʼusi xkoʼolaj-o ti kʼu yelan laj yichʼ lajesel li Jerusalene, pe li «mukʼta tsatsal vokolil» ti jaʼ to te tstsuts li ta paskʼop ta Armajedone; muʼyuk chkʼot ta pasel yan velta (Esek. 5:9; 7:5; Mat. 24:21).

¹⁰ Mi kʼot skʼakʼalil chichʼ lajesel skotol li jecheʼ relijionetike, li Vivliae jamal chal ti kuxul chkomik jutuk mu skotoluk li krixchanoetik ti te toʼox skʼoplalik li ta jecheʼ relijione. Pe ta skoj ti chtʼelik noʼox ta xiʼel li buchʼutik kuxul chkomike, tspas ta jmoj skʼopik xchiʼuk yan krixchanoetik sventa spoj sbaik (Sak. 13:4-6; Apok. 6:15-17). Taje tsvules ta joltik li krixchanoetik ti muʼyuk te kapal lajik ta Jerusalene xchiʼuk ti tanpuk batik ta ikʼe. Jech kʼuchaʼal laj kiltik li ta  parafo 7, oy onoʼox muʼyuk xlajik ta milel ta ora, pe li Jeovae la slokʼes «jun espada sventa snutsatik batel» (Esek. 5:2). Taje jaʼ jech chkʼot ta stojolalik li buchʼutik kuxul chkomik mi laj yichʼ lajesel li jecheʼ relijionetike, yuʼun muʼyuk bu xuʼ snakʼ sbaik; persa chlajik ta s-espada li Jeovae. Te kapal chlajik ta Armajedon xchiʼuk li buchʼutik jaʼik kʼuchaʼal «tentsunetike» (Esek. 7:4; Mat. 25:33, 41, 46; Apok. 19:15, 18).

11, 12. 1) Avi ti jnaʼojtik xa kʼu yelan laj yichʼ joyobtael li Jerusalene, ¿kʼu yelan skʼan xkiltik li cholmantale? 2) ¿Kʼusitik van xuʼ xjel ta sventa li cholmantal xchiʼuk li kʼusi chkalbetik skʼoplale?

¹¹ Kʼalal chkaʼibetik smelolal li albil kʼop taje, jelel kʼu yelan chlik jnoptik ta sventa li cholmantale xchiʼuk ti anil xa noʼox skʼan jpastike. Chkakʼtik venta ti skʼan xa noʼox jkoltatik li krixchanoetik sventa xtunik ta stojolal Jeovae, ¿kʼu yuʼun? Yuʼun jutuk xa yorail kuʼuntik sventa jpastik ta «jchankʼop li krixchanoetik ta skotol jteklumetike» (Mat. 28:19, 20; Esek. 33:14-16). Kʼalal mi lik stsak ta kʼop relijionetik li «vachʼe», jaʼ xkaltik, li buchʼutik tsots yabtelik ta politikae, muʼyuk xa chkaltik batel ti oy kolebale (Esek. 7:10). Jaʼ jech chkʼot ta jtojolaltik kʼuchaʼal li Esekiele, yuʼun li stuke xkoʼolaj ti «umaʼ» kome, jaʼ xkaltik, muʼyuk xa laj yal batel aʼyejetik. Jaʼ jech li voʼotik eke, yuʼun muʼyuk xa chkaltik batel lekil aʼyejetik (Esek. 3:26, 27; 33:21, 22). ¿Kʼusi chkʼot ta pasel mi laj xa ox yichʼ lajesel li jecheʼ relijionetike? Ta skoj ti mu xa snaʼ kʼusi tspasik li krixchanoetike, «chbatik ta stojolal j-alkʼopetik sventa x-albatik li kʼusi ch-akʼbat yilike», pe muʼyuk buchʼu xuʼ x-albatik kʼusi xuʼ spasik yoʼ spoj sbaik (Esek. 7:26). Maʼuk xa ox me yorail sventa xichʼik beiltasel xchiʼuk ti tspasik ta yajtsʼaklom Kristoe.

¹² ¿Mi te xa van laj skʼoplal li xcholel mantale? Muʼyuk, ¿kʼu yuʼun jech chkaltik? Yuʼun mi lik li mukʼta tsatsal vokolile, xuʼ van chlik kaltik batel aʼyejetik sventa chapanel ti xkoʼolaj kʼuchaʼal chyal tal  «mukʼtik bot ta vinajel». Li aʼyejetik taje jamal ta xakʼ ta ilel ti chlaj xa li chopol balumile (Apok. 16:21).

13. Li Jeovae, ¿kʼu yuʼun laj yalbe Esekiel ti akʼo stsʼeʼan sba ta stsʼetkʼob xchiʼuk ta sbatsʼikʼobe?

¹³ ¿Mi jaʼ noʼox laj yakʼ ta ilel Esekiel kʼu yelan chichʼ lajesel li Jerusalene? Moʼoj, yuʼun laj yakʼ ta ilel xtok kʼusi ora chkʼot ta pasel. Albat yuʼun Jeova ti akʼo stsʼeʼan sba 390 kʼakʼal li ta stsʼetkʼobe xchiʼuk ti jaʼ 40 kʼakʼal li ta sbatsʼikʼobe. Taje xuʼ van maʼuk sjunul kʼakʼal jech la spas li j-alkʼope. Kʼalal jun kʼakʼal xie, jaʼ skʼoplal jun jabil (kʼelo Esekiel 4:4-6; Num. 14:34). Li kʼusi albat akʼo spase jamal chakʼ ta ilel kʼusi jabilal chichʼ jinesel li Jerusalene. Li ta sjabilal 997 kʼalal muʼyuk toʼox talem Jesuse, jaʼo la xchʼak sba ta chaʼvokʼ li 12 ta vokʼ nitilulaletike xchiʼuk jaʼo te lik yichʼ chapel talel li 390 jabil ti la saʼ smulik li Israele (1 Rey. 12:12-20). Li 40 jabil ti la saʼ smul li Judae te van lik ta sjabilal 647 kʼalal muʼyuk toʼox talem Jesuse. Li vaʼ jabile, laj yichʼ albel Jeremias ti jamaluk xalbe  li snitilulal Juda ti poʼot xa chichʼik lajesele (Jer. 1:1, 2, 17-19; 19:3, 4). Jech oxal chaʼa, li 390 jabil xchiʼuk li 40 jabil laj yal Esekiele te kʼot ta tsutsel ta sjabilal 607, li vaʼ jabile jaʼo laj yichʼ jinesel Jerusalen jech kʼuchaʼal yaloj xa onoʼox li Jeovae. *

14. 1) ¿Kʼuxi laj yakʼ ta ilel Esekiel ti spatoj yoʼonton ti ta yorail tspas li kʼusi yaloj Jeovae? 2) ¿Kʼusi chkʼot ta pasel kʼalal skʼan toʼox xichʼ lajesel li Jerusalene?

¹⁴ Kʼalal albat Esekiel li albil kʼop ta sventa li 390 kʼakʼal xchiʼuk 40 kʼakʼale, yikʼaluk muʼyuk la snaʼ ta ora kʼusi jabilal chichʼ lajesel li Jerusalene. Pe kʼalal jun chib xa noʼox jabil skʼan xichʼ lajesel li jteklume, li Esekiele ep ta velta laj yalbe judaetik ti mu xa jaluk skʼan xichʼik chapanel yuʼun li Jeovae, xi chale: «Vul xa ta atojolal li lajebale» (kʼelo Esekiel 7:3, 5-10). Li Esekiele jpʼel ta yoʼonton ti ta yorail noʼox tspas Jeova li kʼusi yaloje (Is. 46:10). Xchiʼuk oy kʼusitik laj yal ti chkʼot ta pasel kʼalal skʼan toʼox xichʼ lajesel li Jerusalene, xi laj yale: «Xtal-o xtal-o svokolik». Li vokoliletik tsnuptanike chakʼbe slajeb li relijionetike, li ajvaliletike xchiʼuk li jnaklejetike (Esek. 7:11-13, 25-27).

15. Li ta sjabilal 609, ¿kʼuxi lik kʼotuk ta pasel li kʼusitik laj yal Esekiel li ta albil kʼope?

¹⁵ Kʼalal mu toʼox jaluk yechʼel ti laj yal Esekiel ti chichʼ jinesel li Jerusalene, oy kʼusitik lik kʼotuk ta pasel ta sventa li albil kʼope. Li j-alkʼope laj yakʼ venta ti lik kʼotuk ta pasel li albil kʼop ta sjabilal 609 kʼalal muʼyuk toʼox talem Jesuse. Li vaʼ jabile, la sjupanik okʼes sventa xlokʼ spojik li Jerusalene, pe kʼot ta pasel li kʼusi xi xa onoʼox yaloj li j-alkʼope: «Muʼyuk buchʼu chbat ta paskʼop» (Esek. 7:14). Li jnaklejetik ta Jerusalene muʼyuk la stsob sbaik sventa tspoj slumalik ta stojolal li jbabiloniaetike. Junantik judaetike yalojik mi jaʼ chkoltaatik yuʼun li Jeovae. Oy xa onoʼox koltabilik yuʼun Jeova kʼalal laj yichʼ tsakel ta kʼop yuʼun j-asiriaetik li jteklum Jerusalene, yuʼun la stunes jun yaj-anjel yoʼ smil jutuk mu skotoluk li soltaroetike (2 Rey. 19:32). Pe avi une, muʼyuk chkoltaatik yuʼun li yaj-anjel Jeovae. Mu ta sjaliluke laj yichʼ joyobtael li jteklume xchiʼuk xkoʼolajik yilel ta jpʼej pʼin ti kajal ta kʼokʼ ti noj ta «bekʼet ti bikʼitik bojbile» (Esek. 24:1-10). Kʼalal echʼ 18 u ti te sjoyobtaojik li Jerusalene, laj yichʼ lajesel.

16. ¿Kʼuxi chkakʼtik ta ilel ti jchʼunojtik ti ta yorail noʼox tspas li kʼusi yaloj Jeovae?

¹⁶ ¿Kʼusi chakʼ jchantik li albil kʼop laj yal Esekiele? ¿Mi te van tsakal skʼoplal li cholmantal ta jpastike xchiʼuk ti kʼu yelan chchʼamik li krixchanoetike? Li Jeovae snopoj xa lek kʼusi ora tslajes li jecheʼ relijione xchiʼuk chakʼ ta ilel yan velta ti ta yorail noʼox tspas li kʼusi snopoje (2 Ped. 3:9, 10; Apok. 7:1-3). Akʼo mi mu jnaʼtik kʼusi ora chkʼot ta pasel taje, jaʼ jech ta jpastik kʼuchaʼal li Esekiele, yuʼun ep ta velta chkalbetik skotol krixchanoetik li kʼusi chtale, xi chkaltik eke: «Vul xa ta atojolal li lajebale». ¿Mi oy srasonal ti ep ta velta xkaltik li aʼyej taje? Oy, yuʼun xuʼ jech chkʼot ta pasel kʼuchaʼal ta skʼakʼalil Esekiel. * Li epal krixchanoetik ti albatik yuʼun  Esekiel ti chichʼ lajesel li Jerusalene, muʼyuk la xchʼunik (Esek. 12:27, 28). Pe ta tsʼakale, junantik judaetik ti chukbil batik ta Babiloniae oy xa ox ta yoʼontonik spasel li kʼusi tukʼ ta sat Jeovae, vaʼun sutik yan velta li ta slumalike (Is. 49:8). Jaʼ jech chkʼot ta pasel li avie, yuʼun oy epal krixchanoetik ti mu skʼan xchʼunik ti chichʼ lajesel li chopol krixchanoetike (2 Ped. 3:3, 4). Pe yoʼ to oy jutuk yoraile, skʼan jkoltatik li krixchanoetik ti oy ta yoʼontonik mantal sventa xchʼunik kʼusi chal li Jeovae xchiʼuk ti staik li kuxlejal sbatel osile (Mat. 7:13, 14; 2 Kor. 6:2).

17. ¿Kʼusi chkiltik chkʼot ta pasel mi tal li mukʼta tsatsal vokolile?

¹⁷ ¿Kʼusi tsvules ta joltik li albil kʼop laj yal Esekiele? Li buchʼutik te skʼoplalik ta jecheʼ relijionetike muʼyuk tspoj srelijionik kʼalal mi laj yichʼik tsakel ta kʼope. Kʼajomal xi x-avet tskʼanik koltaele: «Kajval, Kajval». Pe ta skoj ti chʼabal buchʼu chkoltaatike, «chʼabal xa yip te majajtik chkom li skʼobike», yuʼun kʼajomal chnikik xa ta xiʼel (Esek. 7:3, 14, 17, 18; Mat. 7:21-23). ¿Kʼusi yan tspasik? (Kʼelo Esekiel 7:19-21). Xi laj yal Jeova ta sventa li jnaklejetik ta  Jerusalene: «Ta sjipik batel ta kaye li splataike». Taje jamal chakʼ ta ilel li kʼusi chkʼot ta pasel mi tal li mukʼta tsatsal vokolile, yuʼun skotol li krixchanoetike chakʼik venta ti mu xuʼ xpojatik-o yuʼun li skʼulejalike.

18. Li albil kʼop yuʼun Esekiele, ¿kʼuxi chakʼ ta ilel ti skʼan jnoptik li kʼusi mas tsots skʼoplal skʼan xkil ta jkuxlejaltike?

¹⁸ ¿Mi chavakʼ venta kʼusi chakʼ jchantik li albil kʼop laj yal Esekiele? Chakʼbutik ta ilel ti tsots skʼoplal skʼan xkakʼtik venta kʼusi mas tsots skʼoplal ta jkuxlejaltike. Nopbo skʼoplal liʼe, kʼalal laj yakʼik venta li jnaklejetik ta Jerusalen ti chlaj slumalike, ti chchamike xchiʼuk ti mu xuʼ xpojatik yuʼun li skʼulejalike, jaʼ to te lik sjel ta anil xkuxlejalik. La sjipik li kʼusi x-ayan yuʼunike xchiʼuk batik ta «stojolal j-alkʼopetik sventa x-albatik li kʼusi ch-akʼbat yilike». Pe muʼyuk xa la stabeik sbalil ti jech la spasike (Esek. 7:26). Jelelutik li voʼotike, yuʼun te ta joltik ti jutuk xa skʼan xlaj li choplejale. Ta skoj ti jchʼunojtik li kʼusi yaloj tspas Diose, tskoltautik sventa xkiltik li kʼusi mas tsotsik skʼoplal skʼan xkil ta jkuxlejaltike. Koliyal ti jech ta jpastike, jaʼ batem ta koʼontontik stsobel li jkʼulejaltik ta vinajel ti mu xlaj sbalil xchiʼuk ti muʼyuk ta jiptik «batel ta kaye» (kʼelo Mateo 6:19-21, 24).

19. ¿Kʼusi tstij koʼontontik spasel li albil kʼop laj yal Esekiel ti chichʼ lajesel li Jerusalene?

¹⁹ Jvules ta joltik li kʼusi la jkʼeltike, ¿kʼusi tstij koʼontontik spasel li albil kʼop laj yal Esekiel ti chichʼ lajesel li Jerusalene? Tsvules ta joltik ti skʼan xa noʼox jkoltatik li krixchanoetik yoʼ xkʼotik ta yajtuneltak Jeovae, yuʼun jutuk xa yorail kuʼuntik. Jaʼ yuʼun, tsots skʼoplal chkiltik ti anil xa noʼox skʼan jpastik ta yajtsʼaklom Kristo li krixchanoetike. Chijmuyubaj tajek kʼalal chkiltik ti chlik yichʼik ta mukʼ li Jtotik Jeova li krixchanoetik ti oy ta yoʼontonik mantale xchiʼuk muʼyuk chkiktatik spʼijubtasel akʼo mi mu xchʼamik, jech-o chkaltik batel kʼuchaʼal li Esekiele: «Vul xa ta atojolal li lajebale» (Esek. 3:19, 21; 7:3). Ta jkʼan ti jech-o jpatoj koʼontontik ta stojolal li Jeovae xchiʼuk ti jaʼ mas tsots skʼoplal chkil ta jkuxlejaltik li yichʼel ta mukʼ Jeova jech kʼuchaʼal oy ta yoʼontone (Sal. 52:7, 8; Prov. 11:28; Mat. 6:33).