1, 2. 1) ¿Kʼusi oy ta jbatik snopel ta jujuntal? 2) ¿Kʼu yelan laj yaʼi jun anjel kʼalaluk ch-ichʼat xa ox ta mukʼ yuʼun Juane?

 TSOTS skʼoplal skʼan xi jakʼbe jbatike: «¿Buchʼu ta xkichʼ ta mukʼ?». Ta skoj ti oy epal relijionetike, vokol chaʼiik stakʼel epal krixchanoetik. Oy noʼox chaʼtos ti kʼusi xuʼ jpastike, jaʼ ti chkichʼtik ta mukʼ li Jeovae o li Satanase.

² Li kʼusi oy ta yoʼonton Satanase jaʼ ti jaʼuk xkichʼtik ta mukʼe. Jaʼ jech laj yakʼ ta ilel kʼalal laj yakʼ ta preva li Jesuse. Jech kʼuchaʼal la jchantik li ta kapitulo 1 li ta livro liʼe, li Diabloe laj yakʼbe iluk skotol li ajvalilal ta balumile. ¿Kʼu yuʼun ti jech la spase? Yuʼun tskʼan ti akʼo x-ichʼat ta mukʼ junuk veltae (Mat. 4:9). Yan li anjel ti oy kʼusi laj yakʼbe yil jtakbol Juane muʼyuk lek laj yaʼi ti x-ichʼat ta mukʼe (kʼelo Apokalipsis 22:8, 9). Li anjele bikʼit laj yakʼ sba xchiʼuk xi la stakʼbe Juan kʼalal ch-ichʼat xa ox ta mukʼe: «¡Mu xapas jech!». Yuʼun xi laj yal li anjele: «Jaʼ ichʼo ta mukʼ li Diose».

3. 1) ¿Kʼuxi la skoltautik li livro liʼe? 2) ¿Kʼusi to yan ta jkʼelbetik batel skʼoplal?

³ Li ta livro liʼe, la skoltautik sventa jpʼeluk ta koʼontontik li kʼusi laj yal li anjel liʼe: «Jaʼ noʼox skʼan xavichʼ ta mukʼ li Jeova Dios avuʼune» (Deut. 10:20; Mat. 4:10). Jkʼeltik kʼusi chakʼ jchantik li albil kʼopetik xchiʼuk li kʼusitik laj yil Esekiel ta sventa li  melel yichʼel ta mukʼ Diose. Laje, ta jkʼeltik kʼusi chkʼot ta pasel ta jelavel kʼalal chichʼik akʼel ta preva ta slajebal velta li krixchanoetike. Li buchʼutik chkuch yuʼunik li prevae ta xilik kʼuxi chchaʼta yav ta sbatel osil li melel yichʼel ta mukʼ Diose.

4. ¿Kʼusi oxtos chakʼ jchantik li slivroal Esekiele?

⁴ Li ta slivroal Esekiele, chakʼ jchantik kʼusi smakojbe skʼoplal li yichʼel ta mukʼ melel Diose, yuʼun 1) skʼan jaʼ noʼox xkichʼtik ta mukʼ li Jeovae, 2) ti jmojuk-o tsobolutik li ta melel yichʼel ta mukʼ Jeovae xchiʼuk 3) ti xkakʼbetik ta ilel yantik ti jkʼanojtike. Li albil kʼopetik xchiʼuk li kʼusitik laj yil Esekiele, ¿kʼuxi chakʼ ta ilel ti tsots skʼoplal li oxtos taje? Jkʼeltik.

5-9. ¿Kʼusi chakʼ jchantik ti stuk noʼox skʼan xkichʼtik ta mukʼ li Jeovae?

⁵ Kapitulo 3. * Jvules ta joltik liʼe, li Esekiele laj yil ti «xojobinaj ta spat xokon» Jeova jun vaknakʼobale xchiʼuk ti yakal tsbeiltas anjeletik ti tsots tajek sjuʼelike. Taje oy kʼusi tsots skʼoplal chakʼ jchantik: jaʼ noʼox sta-o xkichʼtik ta mukʼ li Buchʼu skotol xuʼ yuʼune (Esek. 1:4, 15-28).

⁶ Kapitulo 5. ¡Li Esekiele laj yil kʼusitik chopolik tajek yakal tspasik li j-israeletik ti jaʼ tsokesik-o li temploe! Li kʼusi laj yichʼ ilele chakʼ ta ilel ti mu kʼusi stakʼ mukbel li Jeovae. Jaʼ yuʼun, chil mi muʼyuk tukʼ kʼusi tspasik li yajtuneltak akʼo mi nakʼal tspasik, jech kʼuchaʼal kʼalal laj yichʼik ta mukʼ santoetik li steklumal ta voʼnee. Kʼux tajek chaʼi Jeova kʼalal jech chichʼ pasele xchiʼuk chakʼbe kastigo li buchʼutik jech tspasike (Esek. 8:1-18).

⁷ Kapitulo 7. Li Jeovae laj yal ti chakʼbe stoj smul li lumetik ti muyubajik tajek ta slabanel li jteklum Israele (Esek. 25:6). Ti kʼu yelan laj yil sbaik xchiʼuk lumetik li Israele, chakʼ jchantik xtok ti jaʼ noʼox skʼan tukʼ xkakʼ jbatik ta stojolal li Jeovae. Mu me jpʼajbetik smantal Jeova ta skoj noʼox ti ta jkʼan lek xilutik li kutsʼ kalaltik ti muʼyuk chaʼiik mantale. Jech xtok, mu me jaʼuk xbat ta koʼontontik li jkʼulejaltike xchiʼuk mu me jaʼuk jpastik li kʼusi tskʼanbutik li ajvaliletik ti jaʼ xa muʼyuk tukʼ chkakʼ jbatik ta stojolal li Jeovae.

⁸ Kapitulo 13 xchiʼuk 14. Li templo laj yil Esekiel «ta jpʼej vits ti toyol tajeke» chakʼbutik ta ilel kʼusi tskʼanbutik Jeova yoʼ xkichʼtik ta mukʼ kʼuchaʼal tskʼane xchiʼuk chakʼ kiltik ti jaʼ mas toyol skʼoplal li Jeovae, ti jaʼ mu sta li yan diosetike (Esek. 40:1-48:35).

⁹ Kapitulo 15. Li ta albil kʼop laj yal Esekiele tskoʼoltas ta jchonbail antsetik li Israel xchiʼuk Judae, taje tsvules ta joltik ti ibal sba chil Jeova li mulivajel ta mantale (kapitulo 16 xchiʼuk 23 ta slivroal Esekiel).

10-14. ¿Kʼuxi chakʼ kiltik ti tsots skʼoplal ti jmojuk-o tsobolutik li ta melel yichʼel ta mukʼ Jeovae?

¹⁰ Kapitulo 8. Te la jchantik ta albil kʼopetik ti la stʼuj «jun jchabichij» li Jeova sventa xchabibat li steklumale. Taje chakʼ kiltik ti oy jun oʼontonal xchiʼuk ti tsobol ch-abtejik ti jaʼ beiltasbilik yuʼun li Jesuse (Esek. 34:23, 24; 37:24-28).

¹¹ Kapitulo 9. Li albil kʼop ti chal ti laj yichʼik pojel lokʼel ta skʼob Mukʼta Babilonia li steklumal Diose xchiʼuk ti sut ta slumalike, ¿kʼusi ch-akʼbat xchanik li buchʼutik tskʼan chichʼik ta mukʼ Dios kʼuchaʼal tskʼane? Jaʼ ti buchʼutik tskʼan xichʼik ta mukʼ ta melel li Diose, skʼan mu stikʼ sbaik jsetʼuk li ta jecheʼ relijione xchiʼuk ti mu skap sbaik li ta kʼusitik tspasik tee. Skʼan me lek tsobolutik jech kʼuchaʼal ojtikinbil li steklumal Jeovae, mu ventauk bu likemutik tal, kʼu yelan jpat jxokontik, mi abol noʼox jbatik o mi jkʼulejutik o mu ventauk kʼusi toʼox jrelijiontik (Esek. 11:17, 18; 12:24; Juan 17:20-23).

¹² Kapitulo 10. Li takin baketik laj yil Esekiel ti chaʼkuxiik yan veltae, chakʼ ta ilel ti xuʼ jmoj tsobolutike. Te xa jkʼoplaltik li ta jun jteklum ti bu xchaʼtaoj xa yav li melel yichʼel ta mukʼ Jeovae xchiʼuk ti jmoj tsobolutik jech kʼuchaʼal li epal soltaroetike. ¡Jaʼ jun mukʼta matanal jtaojtik! (Esek. 37:1-14).

¹³ Kapitulo 12. Li chaʼtel teʼ ti chichʼ lotel laj yil Esekiele, jaʼ chakʼ ta ilel ti jmoj xa tsobolutike. Tstsatsubtas tajek xchʼunel koʼontontik kʼalal chkiltik kʼu yelan chkʼot ta stojolalik li albil kʼop li buchʼutik tʼujbil chbatik ta vinajel xchiʼuk li yan chijetike. Akʼo mi kuxulutik ta jun balumil ti xchʼakoj sbaik ta skoj li politikae xchiʼuk li relijionetike, pe jmoj-o tsobolutik ta skoj ti jkʼanoj jbatike xchiʼuk ti tukʼ chkakʼ jbatik ta stojolal Jeovae (Esek. 37:15-23).

¹⁴ Kapitulo 16. Li kʼusi laj yil Esekiel ta sventa li vinik ti stsakoj yav tinta xchiʼuk li vakvoʼ viniketik ti yichʼoj yabtejebik sventa chlajesvanik-oe, chakʼbutik ta ilel ti jaʼ noʼox xuʼ sta smarkailik sventa kuxul xkomik li buchʼutik chichʼik ta muk’ melel Dios k’alal mi lik li «mukʼta tsatsal [vokolile]» (Mat. 24:21; Esek. 9:1-11).

15-18. ¿Kʼu yuʼun skʼan xkakʼtik-o ta ilel li kʼanelale? Xchiʼuk ¿kʼuxi xuʼ xkakʼtik ta ilel?

¹⁵ Kapitulo 4. Li chanib anjeletik laj yil Esekiele chakʼ kiltik li stalelaltak Jeova jech kʼuchaʼal li kʼanelal ti jaʼ li mas tsots skʼoplale. Kʼalal ta slekil koʼonton ta jkʼopontik li yantike, chkakʼtik ta ilel ti jaʼ Jdiostik li Jeovae (Esek. 1:5-14; 1 Juan 4:8).

¹⁶ Kapitulo 6 xchiʼuk 11. Ta skoj ti chkʼanvan li Jeovae, jaʼ tijbat-o yoʼonton sventa svaʼan jkʼel-osiletik jech kʼuchaʼal li Esekiele.  Li Diose jaʼ kʼanelal, jaʼ yuʼun «mu skʼan ti oy buchʼu xbat ta lajelal» junuk kʼalal mi laj yichʼ lajesel li sbalumil Satanase (2 Ped. 3:9). ¿Kʼuxi chkakʼtik ta ilel li kʼanelal yuʼun Diose? Jaʼo kʼalal ta jkoltatik ta spasel li kʼusitik sbainoj li jkʼel-osil ta toyol avie (Esek. 33:1-9).

¹⁷ Kapitulo 17 xchiʼuk 18. Li Jeovae snaʼoj ti ep buchʼutik tspʼajik li kʼuxubinel yuʼune xchiʼuk ti tskʼan tslajesik ta j-echʼel li yajtuneltak ti tukʼ yakʼoj sbaike. ¿Kʼusi chtijbat yoʼonton Jeova sventa spakbe skʼoplal steklumal kʼalal mi tal tsakvanuk ta kʼop «li Gog ta yosilal Magogue»? Jaʼ li kʼanelale. Taje jaʼ tstij koʼontontik ek sventa xkalbetik epal krixchanoetik ti chakʼbe slajeb Jeova li buchʼutik chilbajinik steklumale (Esek. 38:1-39:20; 2 Tes. 1:6, 7).

¹⁸ Kapitulo 19, 20 xchiʼuk 21. Li Jeovae skʼanoj tajek li krixchanoetike, taje jaʼ te laj yakʼ iluk kʼalal laj yakʼbe ta ilel Esekiel li voʼ ti chakʼ kuxlejale xchiʼuk ti kʼu yelan la xchʼak li osile. Ti bu mas laj yakʼ ta ilel kʼanelal li Jeovae, jaʼo kʼalal laj yakʼ chamuk ta jkojtik li Xnichʼone, koliyal taje xuʼ xkichʼtik akʼel ta perton, xuʼ jkʼupintik tukʼil kuxlejal xchiʼuk xuʼ te jkʼoplaltik li ta yutsʼ yalal Diose. Jtos ti kʼu yelan xuʼ xkakʼtik ta ilel ti jkʼanojtik li krixchanoetike, jaʼ ti xkalbetik li kʼusitik kʼupilik sba chakʼ tal Dios ta jelavele, pe skʼan ti xakʼ xchʼunel yoʼontonik ta stojolal li Xnichʼone (Esek. 45:1-7; 47:1-48:35; Apok. 21:1-4; 22:17).

19. ¿Kʼusi tspas Jesus kʼalal jaʼo xyaket li Ajvalilal ta Jmil Jabile? (Kʼelo li rekuadro «Li kʼusitik chkʼot ta pasel li ta slajebal prevae»).

¹⁹ Kʼalal jaʼo xyaket li Ajvalilal ta Jmil Jabile, li Jesuse chchaʼkuxes ta smiyonal noʼox krixchanoetik xchiʼuk tslajesbe skʼoplal li kajkontratik ti jaʼ li lajelal ti chakʼ jvokoltike (1 Kor. 15:26; Mar. 5:38-42; Ech. 24:15). Ti kʼu xa sjalil slikel talel li kuxlejale, naka at-oʼonton xchiʼuk ep buchʼutik chamemik. Kʼalal mi laj xa ox xchaʼkuxes animaetik li Jesuse, ta stupʼbe ta snopbenik li kʼusitik toʼox chopol la snuptanike, vaʼun jaʼ xa noʼox chlik skʼupinik li lekil kuxlejale. Koliyal li pojelale, ta xakʼbe slajeb li kʼusitik chopol laj yikta li chameletike, li paskʼopetike xchiʼuk li viʼnale. ¿Mi oy to kʼuxi tskoltautik? Oy, yuʼun chakʼbe slajeb li kʼusi chakʼ-o jvokoltike: li mulil ti la slikes Adane (Rom. 5:18, 19). Li Jesuse tslilinbe ta j-echʼel li yabteltak Diabloe (1 Juan 3:8).

20. Li Jesus xchiʼuk li 144 mile, ¿kʼu yuʼun chkaltik ti chakʼik ta ilel ti bikʼit chakʼ sbaike? (Kʼelo li lokʼol ta slikebal kapituloe).

²⁰ (Kʼelo 1 Korintios 15:24-28). ¿Kʼusi chkʼot ta pasel kʼalal mi tukʼil krixchanoetik xa ox li jnaklejetike xchiʼuk mi kʼataj xa ox ta paraiso li balumil jech kʼuchaʼal tskʼan Jeovae? Li Jesus xchiʼuk li 144 mil ti koʼol ch-ajvalilajike chakʼik ta ilel ti bikʼit tajek chakʼ sbaik kʼalal mi laj yakʼbeik ta skʼob Jeova li Ajvalilal yuʼune.  Chiktaik li abtelal la spasik ta jmil jabile xchiʼuk ta sjunul yoʼonton jech tspasik. Skotol li kʼusi la spas li Ajvalilale ta xichʼ tabel sbalil ta sbatel osil.

21, 22. 1) Mi tsʼaki li jmil jabile, ¿kʼu yelan li kuxlejale? 2) Li Jeovae, ¿kʼu yuʼun tskolta lokʼel li Satanas xchiʼuk spukujtake?

²¹ Li Jeovae oy kʼusi labal sba tspas, yuʼun chakʼ ta ilel ti spatoj yoʼonton ta stojolal li jnaklejetik ta balumile. Ta xal mantal ti akʼo xichʼ lokʼesel li Satanas xchiʼuk li spukujtak ti te toʼox tikʼajtik jmil jabil li ta xabe (kʼelo Apokalipsis 20:1-3). Mi kolik lokʼele, jelel tajek tstaik li balumil xchiʼuk li krixchanoetike. ¿Kʼu toʼox yelan li kuxlejal kʼalal skʼan toʼox xtal li Armajedone? Li Satanase xchʼakoj toʼox li krixchanoetike xchiʼuk tskontrain sbaik ta skoj ti spʼajoj sbaike xchiʼuk ti muʼyuk skʼanoj sbaike (Apok. 12:9). Mi tsʼaki li jmil jabile, skotol li jnaklejetike jmoj xa tsobol chichʼik ta mukʼ li Jeovae xchiʼuk chkʼotik ta jun utsʼ alalil ti skʼanoj sbaike. ¡Li balumile tspas ta jun paraiso!

 ²² Mi lek xa ox li balumile, ¿kʼu yuʼun tskolta lokʼel Jeova li jmilvanejetik ti jaʼik li Satanas xchiʼuk li spukujtake? Yuʼun skotol li krixchanoetik ti kuxiik li ta jmil jabile, muʼyuk bu yichʼojik-o akʼel ta preva sventa xakʼik ta ilel ti tukʼ yakʼoj sbaik ta stojolal li Jeovae. Yuʼun ep li buchʼutik chchaʼkuxiik talel ta Paraisoe, muʼyuk laj yojtikinik li Jeovae. Maʼuk noʼox chakʼbe xkuxlejalik, yuʼun chakʼbe xtok li kʼusitik chtun yuʼunik xchiʼuk li kʼusitik ta sventa mantale. Li stukike muʼyuk yaʼiojik-o ti kʼu yelan chkichʼtik sujel sventa jpastik kʼusitik chopole, yuʼun naka lekil krixchanoetik te xchiʼukik ti skʼanojik Jeova xchiʼuk ti chtunik ta stojolale. Xuʼ van jech xichʼik albel yuʼun Satanas jech kʼuchaʼal laj yalbe li Jobe: «Yakʼojbot bendision xchiʼuk sjoyojot lek ta mok sventa xchabiot» (Job 1:9, 10). Kʼalal skʼan toʼox stsʼiba jbitik ta slivroal kuxlejal li Jeovae, chakʼbutik to yorail sventa xkakʼbetik yil ti tukʼ chkakʼ jbatik ta stojolale, ti jaʼ Jtotik chkiltike xchiʼuk ti jaʼ Mukʼul Jpasmantal kuʼuntike (Apok. 20:12, 15).

23. ¿Kʼusi chkʼot ta stojolal li jujun krixchanoe?

 ²³ Mu ta sjaliluke, li Satanase tsnamajes krixchanoetik ta stojolal li Diose. Taje jaʼ me li slajeb prevae. ¿Kʼusitik chkʼot ta pasel li ta slajebal prevae? Jech kʼuchaʼal kʼot ta stojolalik li Adan xchiʼuk Evae, ta jujuntal skʼan xi jnoptike: «¿Mi jaʼ ta jpas li kʼusi tskʼanbun Jeova xchiʼuk mi ta jkolta jba li ta Ajvalilal yuʼune? O ¿mi jaʼ ta jtoy jba ta stojolal li Diose xchiʼuk ti jaʼ xa chkakʼ jba ta stojolal li Diabloe?».

24. Li buchʼutik chlik stoy sbaike, ¿kʼu yuʼun ti tsbiinik Gog xchiʼuk Magogue?

²⁴ (Kʼelo Apokalipsis 20:7-10). Toj labal sba ti jaʼ tsbiinik Gog xchiʼuk Magog li buchʼutik chlik stoy sbaik mi tsʼaki xa ox li jmil jabile, yuʼun xkoʼolajik xchiʼuk li Gog ta yosilal Magog ti laj yal ta albil kʼop li Esekiele (Esek. 38:2). Li vaʼ jtsop jtoybaetike jaʼik li jteklumetik ti tskontrainik li Ajvalilal yuʼun Jeovae, yuʼun jaʼ tstsakik ta kʼop li steklumal Dios kʼalal jaʼo yakal li mukʼta tsatsal vokolile. Li buchʼutik tstoy sbaik mi tsuts xa ox li Ajvalilal ta Jmil Jabil yuʼun Kristoe jaʼ tsbiinik lumetik, taje ep kʼusi chakʼ kaʼitik. ¿Kʼu yuʼun? Yuʼun kʼalal jaʼo yakal li Ajvalilal ta Jmil Jabile, muʼyuk xa jchʼakoj jbatik ta skoj jlumaltik; jkotoltik jun xa noʼox ajvalil kuʼuntik ti jaʼ li Ajvalilal yuʼun Diose. Jun xa noʼox jteklum  chijkʼotutik. Kʼalaluk tsbiinik Gog xchiʼuk Magog li buchʼutik tstoy sbaike xchiʼuk ti chkaltik ti jaʼik lumetike, li albil kʼope chal ti oy kʼusi tspas Satanas sventa xchʼak sbaik lokʼel junantik li ta steklumal Diose. Muʼyuk me buchʼu tsujatik sventa xakʼ sbaik ta stojolal li Diabloe, yuʼun ta jujuntal tsnop stukik ta skoj ti tukʼil krixchanoetik xa oxe.

25, 26. 1) ¿Jayvoʼ chakʼ sbaik ta stojolal li Satanase? 2) ¿Kʼuxi chichʼik lajesel li jtoybaetike?

²⁵ ¿Jayvoʼ chakʼ sbaik ta stojolal li Satanase? Li buchʼutik tstoy sbaike xkoʼolajik «kʼuchaʼal li jiʼ ti oy ta tiʼ nabe». Taje maʼuk skʼan xal ti solel ep tajek buchʼutik chlik stoy sbaike. ¿Kʼu yuʼun ti jech chkaltike? Jnopbetik skʼoplal li kʼusi jamal albat yuʼun Dios li Abraane. Yuʼun xi albate: «Jech yepal chbat kʼuchaʼal li jiʼ ti oy ta tiʼ [nab] li anitilulale» (Jen. 22:17, 18). Pe li snitilulale kʼotik ta 144,001 (Gal. 3:16, 29). Akʼo mi epik yaʼeluk, mi la jkoʼoltastik xchiʼuk li krixchanoetik oy ta balumile, uni jutebik noʼox. Jaʼ jech chkʼot ta stojolalik ek li buchʼutik tskoʼoltas sjolik xchiʼuk li Satanase, yuʼun akʼo mi epik yileluk, pe uni jutebik tajek. Jaʼ yuʼun, li jtoybaetike muʼyuk kʼusi xuʼ spasbeik li yajtuneltak Jeova ti tukʼ yakʼoj sbaike.

 ²⁶ Mu me jaluk chkuxiik li buchʼutik chlik stoy sbaike. Koʼol chichʼik lajesel xchiʼuk li Satanas xchiʼuk li spukujtake, yuʼun muʼyuk xa spatobil yoʼontonik ti xuʼ to xchaʼkuxiik tale. Jaʼ xa noʼox ta jvules ta joltik li kʼusitik chopol kʼot ta nopel yuʼunike xchiʼuk ti la stoj smulike (Apok. 20:10).

27-29. ¿Kʼusi tskʼupinik li buchʼutik chkuch yuʼunik li slajebal prevae?

²⁷ Pe jaʼuk li buchʼutik chkuch yuʼunik li slajebal prevae te tsʼibabil chkom sbiik ta sbatel osil «li ta slivroal kuxlejale» (Apok. 20:15). Vaʼun, xkoʼolajik xa ta jun utsʼ alalil ti jmoj tsobolike, jaʼik xa tukʼil nichʼnabiletik ti chichʼik ta mukʼ Jeova ti stuk noʼox jech sta-oe.

²⁸ Nopo noʼox avaʼi ti chakʼupin jun alakʼ sba kuxlejal ta jelavele: muʼyuk xa chavil avokol mi jaʼuk li avutsʼ avalale. Chakʼupin tajek li abtelal chapase xchiʼuk naka xa avamigotak te achiʼukan. Vaʼun, tukʼil krixchanoot xa chilot li Jeovae, yuʼun lakol xa lokʼel ta skʼob li mulile. Skotol li krixchanoetike lek xa chil sbaik xchiʼuk Dios. Li kʼusi mas tsots skʼoplale jaʼ ti xichʼ ichʼel ta mukʼ Jeova ta vinajel xchiʼuk ta balumil kʼuchaʼal tskʼane. ¡Chchaʼta yav li melel yichʼel ta mukʼ Diose!

²⁹ ¿Mi te van oyot sventa xavil taje? Xuʼ xakuxi sbatel osil jaʼ noʼox venta mi la achʼun li oxtos kʼusitik chakʼ jchantik li slivroal Esekiele: skʼan jaʼ noʼox xkichʼtik ta mukʼ li Jeovae, ti jmojuk-o  tsobolutik li ta melel yichʼel ta mukʼe xchiʼuk ti xkakʼtik ta ilel ti jkʼanojtik li yantike. Li albil kʼop laj yal Esekiele oy to kʼusi tsots skʼoplal chakʼ jchantik. ¿Kʼusi jaʼ?

30, 31. 1) Kʼalal «jech tsnaʼik ti voʼon Jeovaune» xie, ¿kʼusi skʼan xal ta stojolal li yajkontratak Diose? 2) ¿Kʼusi skʼan xal ta stojolal li yajtuneltak Diose?

³⁰ Li ta sjunul slivroal Esekiele ep ta velta xi chale: «Jech tsnaʼik ti voʼon Jeovaune» (Esek. 6:10; 39:28). Taje jaʼ skʼan xal paskʼop xchiʼuk lajelal ta stojolal li yajkontratak Diose. Maʼuk noʼox chakʼik venta ti oy ta melel li Jeovae, yuʼun persa tsnaʼik ti xi smelolal li sbie: «Jaʼ Tspas Akʼo Kʼotuk ta Pasel». Li «Jeova ti jaʼ bankilal yuʼun soltaroetike» chkʼot kʼuchaʼal «jun tsatsal jpaskʼop» sventa chakʼbe slajeb li yajkontratake (1 Sam. 17:45; Eks. 15:3). Mu xa me kʼusi stakʼ spasik, yuʼun jaʼ to te chakʼik venta ti muʼyuk kʼusi xuʼ xmakat-o Jeova sventa xkʼot ta pasel li kʼusi tskʼane.

³¹ Yan li yajtuneltak Jeovae jaʼ kuxlejal xchiʼuk jun oʼontonal chaʼiik kʼalal xi chal li Jeovae: «Jech tsnaʼik ti voʼon Jeovaune». Li Jeovae tspas li kʼusi onoʼox snopoj tspas ta jtojolaltike: ti xijkʼot ta xnichʼnabtak sventa xkakʼtik iluk li stalelaltake (Jen. 1:26). Li Jeovae jaʼ xa jkʼanvanej Totil kuʼuntik xchiʼuk Jchabichij kuʼuntik, pe jutuk xa skʼan xkʼot ta jun Ajvalil ti tspas kanale. Pe yoʼ to mu xkʼot ta pasel taje, skʼan me tsotsuk skʼoplal xkiltik li kʼusi laj yal Esekiele. Kakʼtik ta ilel skotol velta ta jkʼopojeltik xchiʼuk ta kʼusitik ta jpastik ti xkojtikintik li Jeovae xchiʼuk ti kʼu yelan stalelaltake. Muʼyuk me chijxiʼ kʼalal mi kol tal li ikʼ ti chlajesvan li ta mukʼta tsatsal vokolile. Jaʼ noʼox tukʼ chijvaʼi xchiʼuk ta jtoy muyel jsatik, yuʼun nopol xa li jkolebaltike (Luk. 21:28). Yoʼ to mu xkʼot ta pasele, jkoltatik skotol li krixchanoetik sventa xojtikinik xchiʼuk skʼanike li jun noʼox melel Dios ti sta-o ichʼel ta mukʼe xchiʼuk ti tsots skʼoplal li sbie, li Jeovae (Esek. 28:26).