TSABEIK SMELOLAL KʼANALETIK. Ep buchʼutik tsnopik ti sventa snaʼik li kʼusi chkʼot ta stojolalike jaʼ tstsakik ta venta ti kʼu yelan cholol li kʼanaletik kʼalal vokʼike. Jaʼ yuʼun, tskʼelik oroskopoetik sventa snaʼik kʼusi chkʼot ta stojolalik xchiʼuk oy kʼusitik tspasik sventa mu kʼusi snuptanik o sventa lekuk xbat xkuxlejalik.

JTʼUNOLETIK. Junantike, tsjakʼbeik jtʼunoletik ti kʼu yuʼun oy kʼusitik chopol kʼot ta stojolalike o tsjakʼbeik kʼusitik xuʼ spasik sventa lekuk xbat xkuxlejalik. Kʼalal mi albatike, xuʼ snaik kʼusi xuʼ spasik yoʼ mu kʼusi snuptanik, vaʼun xuʼ lek chbat xkuxlejalik.

YICHʼEL TA MUKʼ MOLTOTILETIK. Yantike chichʼik ta mukʼ smoltotakik ti chamemik xae o yan diosetik sventa xchabiatik xchiʼuk x-akʼbatik bendision. Jun ants ti te nakal ta Vietnam ti Van * sbie, xi chale: «Kaloj mi mas chlekub jkuxlejal xchiʼuk kalab ti mi laj kichʼ ta mukʼ li jmoltotakutik ti chamem xae».

CHCHAʼVOKʼIK TA YAN BEKʼTALIL. Ep buchʼutik xchʼunojik ti kʼalal mi li jchame chijchaʼvokʼ yan velta xchiʼuk ti jech˗o la chijchaʼvokʼe. Jaʼ yuʼun, kʼalal oy kʼusi lek o chopol kʼusi chkʼot ta stojolalike, tsnopik ti jaʼ ta skoj li kʼusi la spasik li ta yan xkuxlejalik toʼoxe.

Akʼo mi oy buchʼutik snaʼojik ti mu meleluke xchiʼuk ti snaʼojik ti jaʼ jtos metsʼtaele ta onoʼox skʼelik li oroskopoe, li tavla ouija^®, li svarajail tarot, chkʼelbat yut skʼobik o yan kʼusitik. Taje jaʼ sventa snaʼik li kʼusi xuʼ xkʼot ta stojolalik ta tsʼakale.

¿Mi mas xa van xmuyubajik xchiʼuk mas lek xkuxlejalik li buchʼutik jech xchʼunojik taje?

Jkʼeltik kʼusi kʼot ta stojolal Hào ti te nakal ta Vietname. Li stuke la stunes li sabel smelolal kʼanaletik, tʼunolajel xchiʼuk li yichʼel ta mukʼ moltotiletik ti chamemik xae. Pe ¿kʼusi kʼot ta stojolal? Xi chal li Hàoe: «Ep chʼay jtakʼin li ta jpʼolmale, kajtsaj kil, laj kil jvokol ta kutsʼ kalal xchiʼuk li ipaj ta at˗oʼonton».

Li Qiuming ti likem ta Taiwáne xchʼunoj toʼox ta sventa li sabel smelolal kʼanaletike, ti chijchaʼvokʼ ta yan bekʼtalile, ti akʼbil xa onoʼox korailtike, li tʼunole xchiʼuk li yichʼel ta mukʼ moltotiletik ti chamemik xae. Pe kʼalal laj xa ox skʼelbe lek skʼoplal taje, xi laj yale: «Laj kakʼ venta ti mu stakʼ aʼibel smelolal li kʼusitik chʼunbile xchiʼuk li kʼusitik nopem chichʼ pasele. Ep ta velta mu xkʼot ta pasel li kʼusitik chichʼ sabel smelolal ta kʼanaletike. Ta sventa ti chijchaʼvokʼ ta yan bekʼtalile, mi mu xvul ta joltik li kʼusi la jpastik tal ta yan jkuxlejaltike, ¿kʼuxi xa noʼox chlekub jkuxlejaltik mi lijchaʼvokʼe?».

Li Hào, Qiuming xchiʼuk li yantik krixchanoetike yakʼojik venta ti muʼyuk chalbutik kʼusi chkʼot ta jtojolaltik ta tsʼakal li kʼusitik laj xa kalbetik skʼoplale. Pe ¿mi jaʼ van skʼan xal ti mu stakʼ naʼel kʼusi chkʼot ta jtojolaltike?

Sventa la lek xbat jkuxlejaltike ep buchʼutik tsnopik ti skʼan la lek chanunajemutik o jkʼulejutike. Pe ¿kʼu van yelan yaʼioj sbaik li buchʼutik jkʼulejik xchiʼuk li buchʼu lek chanunajemike?