¿Mi lek chbat akuxlejal mi lek atalelale?
Ta epal jabil, li krixchanoetike xchʼunojik ti lek chbat xkuxlejalik mi lek stalelalike. Jun skʼelobile jaʼ li kʼusi laj yal li Confucio ti jaʼ jun jchanubtasvanej xchiʼuk filosofo ti kuxi ta sjabilaltik 551 xchiʼuk 479 kʼalal muʼyuk toʼox talem Jesuse, xi laj yale: «Mu xapas li kʼusi mu xakʼan spasboxuk li yantik eke». * Jaʼ jech ep tsnopik li buchʼutik likemik ta Asiae.
LI KʼUSITIK TSPASIKE
Epal krixchanoetik xtoke, chalik ti mas la lek chbat xkuxlejalik mi lek kʼusitik tspasike. Jaʼ yuʼun, chakʼik persa sventa x˗ichʼvanik ta mukʼ, lekuk stalelalik, tspasik li kʼusi sbainojike xchiʼuk ti junuk noʼox yoʼontonike. Linh, jun ants ti te nakal ta Vietname, xi chale: «Kaloj ti mi melel jnaʼ xikʼopoje, jech˗o lek chbat li jkuxlejale».
Junantike lek kʼusitik tspasik ta skoj ti jech chchanubtasatik li ta srelijionike. Jun vinik ti nakal ta Taiwán ti Hsu-Yun sbie xi chale: «La xchanubtasikun ti kʼalal chcham jun krixchanoe xuʼ xmuyubaj o xuʼ xil svokol sbatel osil ta skoj ti kʼusi la spas kʼalal kuxul toʼoxe».
¿MI OY VAN SBALIL TA MELEL?
Melel onoʼox ti mas lek chbat jkuxlejaltik kʼalal oy kʼusi lek ta jpastik ta stojolal li yantike. Akʼo mi jech, epal krixchanoetik yakʼojik venta ti kʼalal tskoltaik li yantike mu skotoluk velta jech lek chbat xkuxlejalik kʼuchaʼal tskʼanike. Shiu Ping, jun ants ti nakal ta Hong Kong, xi chale: «Kiloj ta jkuxlejal jtuk ti mu skotoluk velta lek kʼusi tstaik li buchʼutik lek kʼusitik tspasike. Laj kakʼ tajek ta koʼonton xchabiel li kutsʼ kalale xchiʼuk ti lekuk kʼusitik jpase, pe muʼyuk lek xbat li jnupunele, laj yiktaunkutik xchiʼuk jkerem li jmalale».
Ep buchʼutik yakʼojik venta ti mu skotoluk velta chlekub yuʼun stalelal jun krixchano li relijione. Etsuko jun ants ti nakal ta Japóne xi chale: «Te toʼox oyun ta jun relijion xchiʼuk voʼon toʼox jbainoj stsobel li kerem tsebetike. Chopol tajek laj kil ti muʼyuk lek stalelalik li buchʼu te chkʼotik ta jrelijione, chut sbaik ta skoj ti tskʼan tsots skʼoplalike xchiʼuk muʼyuk lek tstunesik li takʼin ta temploe».
«Laj kakʼ tajek ta koʼonton xchabiel li kutsʼ kalale xchiʼuk ti lekuk kʼusitik jpase, pe muʼyuk lek xbat li jnupunele, laj yiktaunkutik xchiʼuk jkerem li jmalale» (SHIU PING, HONG KONG).
Epal krixchanoetik ti oy srelijionike chopol chaʼiik kʼalal chakʼik venta ti muʼyuk sbalil li kʼusitik lek la spasike. Jaʼ jech laj yaʼi sba Van, jun ants ti nakal ta Vietnam, xi chale: «Skotol kʼakʼal chkakʼ sat teʼetik, nichimetik xchiʼuk veʼlil sventa xkakʼbe ta smoton li anima jmoltotake, yuʼun jpatoj koʼonton ti chakʼbeikun bendisione. Akʼo mi epal jabil jech la jpas li kʼusitik taje xchiʼuk ti oy kʼusitik yan lekik la jpase, ta tsʼakale tsots ipaj li jmalale. Ta jelavele, li jtseb ti yakal toʼox chchanunaj ta yan lume cham kʼalal 20 toʼox sjabilale».
Mi mu baluk noʼox ti lek jtalelaltik sventa lekuk xbat li jkuxlejaltike, ¿kʼusi skʼan jpastik chaʼa? Sventa jnaʼtike, ¿bu xuʼ jtatik lekil beiltasel ti xuʼ jpat koʼontontik yuʼune, ti tstakʼbutik li kʼusitik ta jakʼtike xchiʼuk ti chalbutik kʼuxi xuʼ lek xbat li jkuxlejaltike?
^ par. 2 Mi chakʼan chanabe mas yaʼyejal li kʼusi laj yal li Confucioe, kʼelo ta kapitulo 7, parafo 31 kʼalal ta 35 li ta livro El hombre en busca de Dios, ti pasbil yuʼun stestigotak Jeovae. Xuʼ xayales ta www.pr418.com.
Xuʼ van chakʼupin skʼelel xtok liʼe
¡VIK'ILUK ME JSATIK!
Ti lekuk jtalelaltike
Mi la achanubtas ti skʼan lekuk stalelalik li avalab anichʼnabe, lek me chbat li ta xkuxlejalike.
KʼUSITIK TSJAKʼIK TA SVENTA VIVLIA
¿Kʼusi jaʼ li Mukʼul Lekil Mantale?
Kʼalal laj yalbe skʼoplal Jesus li Mukʼul Lekil Mantale, jaʼ laj yalbe skʼoplal ti skʼan lekuk kʼusi jpasbetik li kajkontratike, maʼuk noʼox skotol li krixchanoetike.
LI JKʼEL˗OSIL TA TOYOLE
¿Kʼu yuʼun oy kʼusi chopol tsnuptan li lekil krixchanoetike?
Li Vivliae chalbe oxtos srasonal ti kʼu yuʼun chkil jvokoltike.
