¡Chlaj skʼoplal li pʼajbaile!
Akʼo mi jlokʼes ta koʼontontik li pʼajvaneje, pe mu xuʼ jeltik li kʼusi tsnopik xchiʼuk tspasik li yantike. Li avie, ep buchʼutik chil svokolik ta skoj ti pʼajbilike. Jaʼ yuʼun, ¿mi oy van buchʼu xuʼ tslajesbe skʼoplal ta sbatel osil?
Jaʼ noʼox Jeova xuʼ slajesbe skʼoplal ta sbatel osil li pʼajbaile. Li Vivliae chal ti ta onoʼox spase (Proverbios 20:22).
LI DIOSE TSLAJESBE SKʼOPLAL TI BU CHLIK TAL LI PʼAJBAILE
-
1. LI DIABLOE. Li Satanase jaʼ ta smul ti oy tajek pʼajbail avie. Jaʼ yuʼun, li Diose ta xakʼbe slajeb li Satanase xchiʼuk li buchʼu jech stalelalike (Salmo 37:38; Romanos 16:20).
-
2. LI BALUMIL TI VENTAINBIL YUʼUN SATANASE. Li Diose tslajes li buchʼutik tslikes li pʼajbaile, jech kʼuchaʼal li jpolitikoetike xchiʼuk li jnitvanejetik ta relijione. Jech xtok, tslajes li mukʼta pʼolmajebaletik ti jaʼ noʼox tsaʼ li kʼusi tskʼan stukike xchiʼuk ti tsloʼlaik li krixchanoetike (2 Pedro 3:13).
-
3. TI JPASMULILUTIKE. Li Vivliae chal ti jkotoltik jkuchojtik li mulile. Ta skoj taje, jkotoltik oy kʼusi chopol ta jnopbentik, ta koʼontontik, oy kʼusi chopol ta jpastik, jaʼ yuʼun chijpʼajvan (Romanos 5:12). Pe li Diose tskoltautik lokʼel li ta mulile xchiʼuk tslokʼes ta koʼontontik ti chijpʼajvane (Isaias 54:13).
LI VIVLIAE CHAL TI CHIJKUXI TA JUN BALUMIL TI BU MUʼYUK XA PʼAJBAILE
-
1. OY TUKʼILAL. Li Ajvalilal yuʼun Diose tey to ta vinajel tsventain tal li balumile. Li Ajvalilal taje, tukʼ xchiʼuk te oy˗o sbatel osil (Daniel 2:44). Chlaj skʼoplal li pʼajbail xchiʼuk ti muʼyuk lek xil sbaik li krixchanoetike. Li Diose tspakbe skʼoplal skotol li buchʼutik chil svokolik avie (Lukas 18:7).
-
2. JUN XA KOʼONTONTIK CHIJKUXI. Muʼyuk xa buchʼu chil svokol ta skoj paskʼop xchiʼuk majbail (Salmo 46:9). Oy xa jun oʼontonal li ta balumile, yuʼun jaʼ xa noʼox te chkuxiik li lekil krixchanoetike (Salmo 72:7).
-
3. CHKILTIK LEKILAL. Skotol li krixchanoetike tskʼan sbaik ta melel (Mateo 22:39). Muʼyuk xa chkil jvokoltik xchiʼuk muʼyuk xa chvul ta joltik li kʼusitik la jnuptantike (Isaias 65:17). Kʼalal mi laj skʼoplal li pʼajbaile, li krixchanoetike «tskʼupinik tajek li jun oʼontonal ti muʼyuk spajebe» (Salmo 37:11).
¿Mi chakʼan chanaki ta jun balumil kʼuchaʼal taje? Avie, ta smiyonal xa noʼox krixchanoetik yakal tstsalik li pʼajbaile, taje jaʼik li stestigotak Jeovae. ¿Kʼuxi tspas yuʼunik? Jaʼo kʼalal chakʼ ta xkuxlejalik li beiltaseletik ta Vivliae (Salmo 37:8). Manchuk mi jelel stsʼunbalik, stalel xkuxlejalik, jmoj xa tsobolik kʼuchaʼal jun utsʼ alalil ta skoj ti skʼanoj sbaike (Isaias 2:2-4).
Li stestigotak Jeovae ta sjunul me yoʼontonik chchanubtasoxuk sventa xkuch avuʼunik li kʼusi chopol chavichʼik pasbele xchiʼuk ti chavichʼik pʼajele. Li kʼusi chachane tskoltaot sventa xakʼanvan xchiʼuk xalokʼes ta avoʼonton li pʼajvaneje. Te chavakʼ venta xtok kʼuxi xuʼ lek xavil aba xchiʼuk yantik manchuk mi chavichʼ pʼajel o mi oy kʼusi chopol tspasboxuk. Vaʼun, mas me jun avoʼonton xchiʼuk lek me chavil aba xchiʼuk li yantike. Li kʼusi mas tsots skʼoplale jaʼ ti chachan li kʼusi xuʼ xapas sventa xakʼupin akuxlejal mi laj xa ox slajes pʼajbail li Ajvalilal yuʼun Diose (Salmo 37:29).
Xuʼ van chakʼupin skʼelel xtok liʼe
LI JKʼEL˗OSIL TA TOYOLE
¿Kʼusi tspas ta jtojolaltik li Ajvalilal yuʼun Diose?
Li Jesuse snaʼoj xa onoʼox ti jaʼ noʼox li Ajvalilal yuʼun Dios xuʼ xakʼbe slajeb li vokoliletik oy ta balumile. ¿Kʼusi xa spasoj li Ajvalil taje sventa jpat koʼontontik ta stojolale?
KʼUSITIK TSJAKʼIK TA SVENTA VIVLIA
¿Bu xuʼ jtatik spatobil koʼontontik?
Li Vivliae xuʼ xakʼbot spatobil avoʼonton avi xchiʼuk li ta jelavele.
XCHʼUNEL OʼONTONAL TA STOJOLAL DIOS
¿Mi chkʼot van skʼakʼalil ti tukʼ xa kʼusitik chichʼ pasele?
Li Vivlia chal ti chakʼ talel tukʼilal li Diose, yuʼun koʼol sbalil chil li krixchanoetike.
¡VIK'ILUK ME JSATIK!
Chopol kʼusi chichʼ nopel ta stojolal yantik: Chakʼbe slajeb
¿Kʼusi chantos tspas sventa xakʼbe slajeb li kʼusitik chopol ta jnoptik ta stojolal yantik li Ajvalilal yuʼun Diose?
