¿Kʼu yuʼun ti oy tajek pʼajbaile?
¿Kʼu yuʼun mu xlaj skʼoplal li pʼajbaile? Sventa xkaʼibetik smelolale, baʼyel skʼan jnaʼtik kʼusi jaʼ li pʼajbaile, kʼuxi chlik xchiʼuk kʼuxi chpuk batel.
¿Kʼusi jaʼ li pʼajbaile?
Li pʼajbaile jaʼ kʼalal oy buchʼu chopol tajek chkiltike, ti mi jsetʼuk jkʼantike. Maʼuk noʼox ti muʼyuk lek chkiltik kʼuk sjalile.
¿KʼUXI CHLIK LI PʼAJBAILE?
Ep srasonaltak ti kʼu yuʼun chlik pʼajvanuk li krixchanoetike. Li buchʼutik chichʼik pʼajele maʼuk ta skoj li kʼusi tspasike, jaʼ ta skoj li stalelalike. Yikʼaluk van tsnopik ti chopol krixchanoetike xchiʼuk ti xibalik sbae o tsnopik ti mu xa xjel stalelalike. O xuʼ van tsnopik ti muʼyuk tsots skʼoplalike, ti oy kʼusi chopol xuʼ spasike o ti jaʼ noʼox tslikesik kʼope. Jech xtok, ep buchʼutik chpʼajvanik ta skoj ti oy kʼusi chopol laj yichʼik pasbele o ti oy kʼusi tsots la snuptan ta xkuxlejalike.
¿KʼUXI CHPUK BATEL LI PʼAJBAILE?
Bateltike, li krixchanoetike tspʼajik li buchʼutik mu xojtikinike. Kʼalal oy junuk kamigotik o junuk kutsʼ kalaltik ti chlik xchopol kʼoptaik li yantike, xuʼ me xlik jpastik jech ek. Kʼalal jech xa tsnopik li yantik eke, mas to chlik spʼaj-o sbaik.
Kʼalal jnaʼojtik xa ti toj anil chpuk li pʼajbaile, xkaʼibetik smelolal kʼu yuʼun ti chlik pʼajvanikuk li yantik eke. Sventa xlaj skʼoplal li pʼajbaile, baʼyel skʼan jnaʼtik kʼuxi lik tal. Li Vivliae chalbe smelolal.
LI VIVLIAE CHAL KʼUXI LIK TAL LI PʼAJBAILE
MAʼUK TE LIK TAL TA STOJOLAL KRIXCHANOETIK LI PʼAJBAILE. Te lik tal ta vinajel, yuʼun oy jun anjel la stoy sba ta stojolal Dios ti laj yichʼ ojtikinel kʼuchaʼal Diablo Satanase. Kʼalal la stoy sbae, pas ta jmilvanej. Ta skoj ti jaʼ jun «jutkʼop xchiʼuk jaʼ totil yuʼun li jutbil kʼope» jech-o stij oʼontonal sventa oyuk pʼajbail xchiʼuk saʼkʼop (Juan 8:44; 1 Juan 3:11, 12). Li Vivliae chal ti muʼyuk xkʼuxul yoʼontone, ti toj chopole xchiʼuk ti ilinem tajeke (Job 2:7; Apokalipsis 12:9, 12, 17).
TA SKOJ TI JPASMULILUTIKE JKUCHOJTIK LI PʼAJVANEJE. Li baʼyel vinik, Adane, la xchanbe stalel li Satanase. Ta skoj taje, la jkuchintik li mulile xchiʼuk maʼuk xa tukʼil krixchanoutik (Romanos 5:12). Li Kain ti jaʼ sbankilal kerem li Adane, la spʼaj li Abele xchiʼuk la smil akʼo mi jaʼ yitsʼin (1 Juan 3:12). Akʼo mi skotol krixchanoetik snaʼ xkʼanvanik xchiʼuk oy xkʼuxul yoʼontonik, pe ta skoj ti jkuchojtik mulile ep buchʼutik jaʼ noʼox tsaʼik li kʼusi lek chaʼi stukike, chkontrainvanik xchiʼuk tstoy sbaik. Li talelaletik taje, jaʼ tslikes li pʼajbaile (2 Timoteo 3:1-5).
CHLIK PʼAJVANIKUK TA SKOJ TI OY KʼUSI MUʼYUK LEK CHILIKE. Li krixchanoetik avie muʼyuk xa lek stalelalik xchiʼuk muʼyuk xa xkʼuxul yoʼontonik, jaʼ yuʼun yantik ch˗epaj li pʼajbaile. Ta skoj ti «skotol li krixchanoetike oyik ta sjuʼel li Satanase», muʼyuk xa noʼox kʼusi lek chilik, chpʼajvanik, chchopol kʼoptavanik, ch˗ilbajinvanik xchiʼuk tsaʼik kʼop (1 Juan 5:19).
Li Vivliae maʼuk noʼox chalbe skʼoplal ti kʼuxi lik tal li pʼajbaile, yuʼun chal xtok li kʼusi xuʼ jpastik sventa jtsaltik li pʼajbaile.
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Mi jaʼ la spas Diablo li Diose?
¿Kʼu yuʼun laj yal Jesus ti «muʼyuk onoʼox bu tukʼ laj yakʼ sba ta stojolal» kʼusi melel li Diabloe?
