¿MI TA MELEL XUʼ XAVAL LI KʼUSI CHKʼOT TA PASEL TA ATOJOLALE? Jlom krixchanoetike xchʼunojik ti nabil xa onoʼox li kʼusi chkʼot ta stojolalike o chalik ti jaʼ la chal Dios li kʼusi chkʼot ta pasele. Jaʼ yuʼun, xi chalik kʼalal muʼyuk chkʼot ta pasel li kʼusi tskʼanike: «Jech xa onoʼox albil».

Jlome tsvul yoʼontonik kʼalal chilik ti jech-o li ilbajinele xchiʼuk ti muʼyuk tukʼ li kʼusitik chichʼ pasele. Xuʼ van chakʼik persa ti lekuk noʼox xbat li xkuxlejalike, pe ta skoj ti oy paskʼopetik, kʼusitik xibalik sba, chameletik, nikel, nojelal ta voʼ o yan kʼusitike mu xa xkʼot ta pasel li kʼusi tskʼanike. Jaʼ yuʼun, chkʼot ta nopel yuʼunik ti jaʼ lek ti muʼyuk xa kʼusi tspasike.

Ta skoj li kʼusitik chkʼotanuk ta pasele, xuʼ xjel li kʼusi jnopoj ta jpastike (Eklesiastes 9:11). Akʼo mi jech, xuʼ me jtʼuj jtuktik li kʼusi ta jkʼan ta jtatik ta sbatel osile. Li Vivliae chal ti voʼotik oy ta jbatik li kʼusi ta jkʼan chkʼot ta pasel ta jkuxlejaltike. ¿Kʼu chaʼal ti jech chkaltike?

Kʼalal jutuk xa ox skʼan x-ochik ta Albil Balumil li j-israeletike, li Diose xi laj yalbe Moises ti akʼo xalbe li steklumale: «Chkakʼ atʼuj li kuxlejal o lajelale; li bendision o li chopol kʼoptaele. Skʼan xatʼuj li kuxlejale sventa xakuxi xchiʼuk li anitilulale. Jaʼ yuʼun, kʼano li Jeova Dios avuʼune, chikintabo li kʼusi chale xchiʼuk napʼano aba ta stojolal» (Deuteronomio 30:15, 19, 20).

«Chkakʼ atʼuj li kuxlejal o lajelale; li bendision o li chopol kʼoptaele. Skʼan xatʼuj li kuxlejale» (Deuteronomio 30:19).

Li Diose la skolta lokʼel ta mosoil ta Ejipto li j-israeletike, laj yakʼ ti akʼo snop stukik li kʼusi tspasike xchiʼuk ti skʼupinik li kuxlejal ta Albil Balumile. Pe li bendisionetik taje mu ta jechuk noʼox tstaik, yuʼun skʼan jaʼuk stʼujik li kuxlejale. ¿Kʼuxi xuʼ spasik taje? Jaʼ ti skʼanik li Diose, ti xchʼunbeik li smantale xchiʼuk ti xnopajik ta stojolale.

Jaʼ jech skʼan xapas ek, li kʼusi chkʼot ta nopel avuʼune jaʼ me te chakʼ ta ilel li kʼusi chata ta mas tsʼakale. Mi jaʼ chakʼan li Diose, mi chachʼunbe li smantaltake xchiʼuk mi chanopaj ta stojolale, jaʼ me yakalot stʼujel li kuxlejal sbatel osil ta jun paraiso balumile. Pe ¿kʼusitik smakoj jujutos taje?

Li jtakbol Juane laj yichʼ akʼbel snaʼ ti «jaʼ kʼanelal li Diose», yuʼun jaʼ li stalelal ti mas xvinaj ta kʼelele (1 Juan 4:8). Ta skoj ti snaʼoj lek li Jesuse, xi la stakʼ kʼalal jakʼbat kʼusi jaʼ li mantal ti mas tsots skʼoplale: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal xchiʼuk ta sjunul anopben» (Mateo 22:37). Lek xkil jbatik xchiʼuk Dios ta skoj ti jkʼanojtike, maʼuk ta skoj ti ta xiʼel ta jpastike o ti ta jech noʼox ta jvovil chʼunbetik li smantale. Pe ¿kʼu yuʼun skʼan jkʼantik li Diose?

Ti kʼu yelan skʼanoj krixchanoetik li Jeovae xkoʼolaj ti kʼu yelan skʼanoj yalab xnichʼnab li totil meʼiletike. Akʼo mi jmulavil li totil meʼiletike, chakʼik persa ta xchanubtasel, spatbel yoʼonton, skoltael xchiʼuk ta kʼanelal tstukʼibtasik li yalab xnichʼnabike, yuʼun tskʼanik ti akʼo xmuyubajike xchiʼuk ti lekuk xbat li ta xkuxlejalike. Pe ¿kʼuxi tskʼanik tojbel ta vokol li totil meʼiletike? Jaʼ ti xkʼanatik yuʼun li yalab xnichʼnabike, ti xchʼunbat smantalike xchiʼuk ti xaʼibeikuk smelolal ti jaʼ sventa slekilalik li kʼusi ch-albatike. ¿Mi mu jechuk ti oy lek srasonal yuʼun Jeova ti tskʼan akʼo jkʼantik xchiʼuk ti jtojbetik ta vokol skotol li kʼusitik spasoj ta jtojolaltike?

Li jpʼel kʼop chikintaik chal ta Vivliae ep ta velta jaʼ skʼan xal «chʼunik». Kʼalal chalbe yalab xnichʼnab li totil meʼil ti akʼo xchikintaike, jaʼ yakal chalbeik ti  xchʼunik mantale. Jaʼ yuʼun, kʼalal ta jchikintabetik li kʼusi chal Diose, te smakojbe skʼoplal ti skʼan jnaʼtik li kʼusi yakal chalbutike xchiʼuk ti jpastike. Ta skoj ti muʼyuk xa bu chchiʼinutik ta loʼil stuk li Diose, skʼan jchantik li Vivliae xchiʼuk jpastik li kʼusi chale (1 Juan 5:3).

Sventa xkaʼitik ti tsots skʼoplal skʼan jchʼunbetik smantal Diose, xi laj yal jun velta li Jesuse: «Maʼuk noʼox ta pan kuxul li krixchanoe, yuʼun jaʼ kuxul-o skotol li kʼusitik chlokʼ ta ye Jeovae» (Mateo 4:4). Tsots onoʼox skʼoplal ti xijveʼe, pe jaʼ mas tsots skʼoplal ti xkojtikintik lek li Diose. ¿Kʼu yuʼun? Yuʼun xi laj yalbe smelolal li pʼijil ajvalil Salomone: «Yuʼun li pʼijilale chpojvan jech kʼuchaʼal chpojvan li takʼine, pe li sbalil li yojtikinobile xchiʼuk li pʼijilale jaʼ ti kuxul chkom yuʼun li yajvale» (Eklesiastes 7:12). Li pʼijilal xchiʼuk li yojtikinel Diose xuʼ xchabiutik li avie xchiʼuk xuʼ skoltautik yoʼ jaʼuk jtamtik li be ti ch-ikʼvan batel ta kuxlejal sbatel osile.

Li ta mantal echʼe, te laj kalbetik skʼoplal ti xi laj yal li Jesuse: «Li sbelel kuxlejale bikʼit stiʼ xchiʼuk bikʼit li sbelele xchiʼuk jaʼ jutuk tajek li buchʼutik te chbatike» (Mateo 7:13, 14). Sventa teuk xijxanav li ta be taje, ta jtojtik tajek ta vokol ti oyuk buchʼu sbeiltasutik sventa jtatik li kuxlejal sbatel osile. Jaʼ yuʼun, skʼan xijnopaj ta stojolal li Diose (Salmo 16:8). Pe ¿kʼuxi xuʼ xijnopajutik ta stojolal?

Skotol kʼakʼal ep kʼusitik ta jpastik xchiʼuk ep to kʼusitik ta jkʼan ta jpastik batel. Ta skoj ti mu no’ox xijxokobe, muʼyuk xa yorail kuʼuntik sventa jnopbetik skʼoplal li kʼusi tskʼan Dios akʼo jpastike. Jaʼ yuʼun, xi tsvules ta joltik li Vivliae: «Kʼelik me lek ti mu me bol krixchanouk ti kʼu yelan chapas abaike, jaʼ lek pʼij xapas abaik, lek me xatunesik li jujun kʼakʼal chjelav avuʼunike, yuʼun sok xa tajek li kʼakʼale» (Efesios 5:15, 16). Kʼalal chijnopajutik ta stojolal Diose jaʼ skʼan xal ti jaʼ mas tsots skʼoplal chkaʼitik ti lekuk xkil jbatik xchiʼuke (Mateo 6:33).

Akʼo mi mu xa stakʼ xajel li kʼusitik kʼotem ta atojolale, oy me kʼusi stakʼ xapas sventa lekuk kʼusi xkʼot ta atojolal xchiʼuk li avutsʼ avalale. Li Vivliae chal ti skʼanojutik tajek li Jtotik ta vinajel ti jaʼ li Jeovae xchiʼuk chalbutik li kʼusi tskʼan akʼo jpastike. K’elo avil li kʼusi laj yal li j-alkʼop Mikease:

«Krixchano, yalojbot Dios li kʼusi lek ta pasele. ¿Kʼusi tskʼanbot ti akʼo xapas li Jeovae? ¡Jaʼ ti xapas li kʼusi tukʼe, ti tukʼuk-o xavakʼ abae xchiʼuk ti bikʼituk xavakʼ aba kʼalal chaxanav xchiʼuk li Adiose» (Mikeas 6:8).

Li voʼote, ¿mi chak’an chaxanav xchiʼuk Dios? Mi la achʼam li takel ta ikʼele, ta me xakʼbot li bendisionetik ta sbatel osil ti jaʼ xchapanojbe li yamigotake. Voʼot me oy ta aba snopel.