¡TAJE TOJ KʼUPIL XA NOʼOX SBA! Li Jpasvanej kuʼuntike yalojbutik ti chijkuxiutik ta sbatel osil liʼ ta balumile. Akʼo mi jech, toj vokol chaʼiik ta chʼunel li junantike, yuʼun tsnopik ti ta onoʼox xijcham jkotoltike xchiʼuk chalik ti stalel onoʼox jeche. Yantik xtoke chalik ti xuʼ xijkuxi sbatel osile, pe jaʼ to mi lijchame, vaʼun ta la xijmuy batel ta vinajel. ¿Kʼusi chanop li voʼote?

Baʼyel jkʼeltik kʼuxi tstakʼ Vivlia liʼe: ¿kʼu sjalil xuʼ xijkuxi ta skoj ti kʼu yelan pasbilutike?, ¿kʼu yuʼun la spas balumil xchiʼuk krixchanoetik li Diose? xchiʼuk ¿kʼu yuʼun chijchamutik?

Kʼalal ta jkoʼoltas jbatik xchiʼuk li yan kuxlejaletik ti spasoj Diose, chkakʼtik venta ti jtuktik noʼox jech pasbilutike. ¿Kʼusi ti jelelutik-oe? Li Vivliae chal ti jaʼ slokʼolutik li Diose (Jenesis 1:26, 27). ¿Kʼusi skʼan xal taje? Ti xkoʼolaj jtalelaltik kʼuchaʼal li Diose, jaʼ xkaltik, ti xuʼ xijkʼanvane xchiʼuk ti jechuk xkiltik li tukʼilal kʼuchaʼal chil stuke.

Jech xtok, laj yakʼ ti xijtojobuk snopele, ti jnaʼtikuk li kʼusi lek xchiʼuk li kʼusi chopole, ti oyuk ta koʼontontik yojtikinel li Diose xchiʼuk ti xijkʼot ta yamigoe. Ta skoj ti kʼu yelan pasbilutike, xuʼ jkʼupintik skʼelel ti kʼu smukʼul li vinajel balumile, li kʼusitik pasbil ti toj alakʼik sbae, li sbonel kʼusitike, li skʼupinel musikae xchiʼuk li stsʼibael nichimal kʼopetike. Pe li kʼusi jelelutik-o ta jyalele jaʼ ti xuʼ xkichʼtik ta mukʼ li Jpasvanej kuʼuntike. Skotol li kʼusitik xuʼ kuʼuntik spasel taje jaʼ mu xijkoʼolajutik-o xchiʼuk li yan kuxlejaletike.

Nopo avaʼi liʼe: ti jaʼuk noʼox tskʼan Dios ti akʼo xijkuxi jayibuk jabile, ¿kʼu yuʼun ti ep kʼusitik xuʼ kuʼuntik spasel xchiʼuk ti ep to kʼusitik xuʼ jchantik-o batele? Yuʼun li Diose tskʼan ti akʼo jkʼupintik ta sbatel osil li jkuxlejaltik ta balumile.

Junantik krixchanoetike tsnopik ti muʼyuk onoʼox oy ta yoʼonton Dios ti xijkuxi sbatel osil ta balumile. Jech xtok, chalik ti jbalumiltike jaʼ no’ox la sventa xijkuxi k’uk sjalil yoʼ xkichʼtik akʼel ta preva sventa xvinaj buchʼu sta-o xmuy batel ta vinajel yoʼ teuk xkuxi sbatel osil xchiʼuk li Diose. Pe ti meleluk taje, ¿mi mu jaʼuk smul Dios xanaʼ ti oy choplejal li ta balumile? Mu xkʼot-o jechuk ti kʼu yelan stalelal li Diose, yuʼun li Vivliae xi chale:  «Tukʼ skotol li kʼusitik tspase. Jaʼ jun Dios ti tukʼ yoʼontone, mu spas li kʼusi muʼyuk tukʼe; melel kʼusi chal xchiʼuk tukʼ yoʼonton» (Deuteronomio 32:4).

Li Vivliae jamal chal kʼu yuʼun la spas balumil li Diose: «Jaʼ yuʼun Jeova li vinajele, pe li balumile jaʼ yakʼojbe li krixchanoetike» (Salmo 115:16). Li Diose la spas li kʼupil sba balumil sventa te xnakiik-o li krixchanoetike, lek la smeltsan sventa xkuxiik sbatel osil xchiʼuk ti oyuk sbalil xil li xkuxlejalike (Jenesis 2:8, 9).

«Jaʼ yuʼun Jeova li vinajele, pe li balumile jaʼ yakʼojbe li krixchanoetike» (Salmo 115:16).

Li Vivliae chal kʼu yuʼun la spas krixchanoetik li Diose. Xi albatik yuʼun Dios li Adan xchiʼuk Evae: «Epajanik, pʼolanik, nojesik li balumile, ventainik, pasik ta mantal [...] skotol li kʼusitik kuxajtik ta balumile» (Jenesis 1:28). ¡Jaʼ jun mukʼta matanal ti xuʼ xchabiik balumil xchiʼuk ti skʼatajesik ta jun paraisoe! Li Adan xchiʼuk Evae snaʼojik ti liʼ chkuxiik sbatel osil ta balumil xchiʼuk li yalab xnichʼnabike.

Li Vivliae chal ti la stoy sba jun spasben Dios ti mu xvinaj ta kʼelele xchiʼuk tskʼan ox ti akʼo mu xkʼot ta pasel li kʼusi oy ta yoʼonton Diose, taje Satanas la sbiin. ¿Kʼusi la spas?

Li Satanase la sloʼla li baʼyel jtot jmeʼtik ti jaʼ li Adan xchiʼuk Evae yoʼ stoy sbaik ta stojolal li Diose. Albatik ti oy kʼusitik muʼyuk ch-akʼbat skʼupinik yuʼun li Diose xchiʼuk ti muʼyuk la sderechoik ta snopel li kʼusi lek xchiʼuk li kʼusi chopole. La xchʼunik li kʼusi albatik yuʼun Satanase, jaʼ la svalopatinik komel li Diose. Pe ¿kʼusi kʼot ta stojolalik? Chamik jech kʼuchaʼal albilik onoʼox yuʼun li Diose, vaʼun muʼyuk xa la staik li kuxlejal sbatel osil ta balumile (Jenesis 2:17; 3:1-6; 5:5).

Ta skoj ti la stoy sbaik li Adan xchiʼuk Evae, jaʼ te lik talel skotol li jvokoltike. Yuʼun xi chal li Skʼop Diose: «Jech kʼuchaʼal ta jun noʼox vinik [Adan] och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik» (Romanos 5:12). Chijchamutik ta skoj ti jkuchojtik talel li mulile, maʼuk ti yuʼun oy kʼusi chopol snopoj li Diose.

Kʼalal la stoy sbaik ta Eden li Adan xchiʼuk Evae, muʼyuk jel-o li kʼusi onoʼox oy ta yoʼonton Dios ta sventa li balumile xchiʼuk ta stojolal li krixchanoetike. Ta skoj ti skʼanojutik xchiʼuk ti tukʼ li kʼusi tspas Diose, jaʼ tijbat-o yoʼonton sventa spojutik ta mulil xchiʼuk ta lajelal. Jaʼ yuʼun, xi laj yalbe smelolal li jtakbol Pabloe: «Li stojol mulile jaʼ li lajelale, yan li matanal chakʼ Diose jaʼ kuxlejal sbatel osil ta stojolal li Kristo Jesus ti jaʼ Kajvaltike» (Romanos 6:23). Ta skoj ti skʼanojutik tajek li Diose, «laj yakʼ li jun noʼox Xnichʼon [Jesukristo] sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16). Kʼalal laj yakʼ ta matanal xkuxlejal li Jesuse, jaʼ la stoj li kʼusitik chʼay yuʼun li Adane. a

Jutuk xa tajek skʼan xkʼot ta pasel li kʼusi oy ta yoʼonton Diose: ti chkʼataj ta jun paraiso li balumile. Pe sventa xuʼ xakʼupin li kʼusi chtal ta tsʼakale, skʼan xachʼun li tojobtasel yuʼun Jesus liʼe: «Jaʼ te xa-ochik batel li ta bikʼit tiʼ nae, yuʼun li sbelel lajelale lek jamal xchiʼuk lek mukʼ stiʼ xchiʼuk jaʼ mas ep ti buchʼutik te chbatike; yan li sbelel kuxlejale bikʼit stiʼ xchiʼuk bikʼit li sbelele xchiʼuk jaʼ jutuk tajek li buchʼutik te chbatike» (Mateo 7:13, 14). Voʼot me oy ta aba li kʼusi chakʼan chata ta akuxlejale. ¿Kʼusi van chanop chapas?