Mi maʼuk ta smul Dios ti chkil jvokoltike, ¿kʼusi o buchʼu ta smul chaʼa? ¿Kʼu yuʼun oy epal krixchanoetik ti chchamik ta viʼnal o ti povreik ta jyalele? ¿Kʼu yuʼun oy epal paskʼop, chameletik, nojelal ta voʼ, nikel o yan kʼusitik? Li Skʼop Dios ti jaʼ li Vivliae chal ti oy oxtos srasonal ti kʼu yuʼun chkil jvokoltike.

1.  Li saʼel kʼusitik tskʼanike, ti tskʼan ep kʼusitik yuʼunike xchiʼuk li pʼajbaile. «Laj quil noxtoc ti oy bu ta xpechʼ ta teqʼuel xchiʼil li cristianoe, pero leʼe toj vocol» (Eclesiastés 8:9). Li krixchanoetike chichʼik ilbajinel yuʼun li buchʼutik jaʼ noʼox tspas li kʼusi tskʼan yoʼontonike.

2.  Li yorail xchiʼuk li kʼusitik muʼyuk malabil chkʼot ta pasele. Li Vivlia xtoke chal ti chil svokol li krixchanoetik ta skoj «li yorail xchiʼuk li kʼusitik muʼyuk malabil chkʼot ta pasele» (Eclesiastés 9:11, TNM). Jaʼ xkaltik, ti xuʼ van oy kʼusi tsots jnuptantik kʼalal muʼyuk malabil kuʼuntike o ta skoj ti muʼyuk chkichʼ jmeloltike xchiʼuk ti oy kʼusi muʼyuk lek chbat kuʼuntik ta pasele.

3.  Li chopol ajvalil ta balumile. Li Vivliae jamal chal buchʼu ta smul ti chkil jvokoltike, yuʼun xi chale: «Pe skotol li krixchanoetike oyik ta sjuʼel li buchʼu toj chopole» (1 Juan 5:19). «Li buchʼu toj chopole» jaʼ li Satanas ti toj ep sjuʼel ti jaʼ toʼox jun lekil anjele, pe «muʼyuk onoʼox bu tukʼ laj yakʼ sba ta stojolal li kʼusi melele» (Juan 8:44). Oy yantik anjeletik ti lik stoy sbaik jech kʼuchaʼal li Satanase yoʼ jaʼuk spas li kʼusi tskʼan yoʼonton stukike, taje kʼatajik ta pukujetik (Génesis 6:1-5). Kʼalal lik stoy sbaik ta stojolal Dios li Satanas xchiʼuk spukujtake solel puk batel li xchopolilike, pe mas to li avie. Li Satanase solel ilinem tajek xchiʼuk «yakal tsloʼla skotol li jnaklejetik ta spʼejel balumile», jaʼ yuʼun xi to chal li Vivliae: «¡Abol sba li balumil xchiʼuk li nabe!» (Apokalipsis 12:9, 12). Li Satanase toj echʼ xa noʼox chopol stalelal, toj kʼaʼ chopol, mu sventauk-o li jvokoltike xchiʼuk xmuyubaj-o kʼalal chil ti yakal chkil jvokoltike. Jaʼ yuʼun jaʼ ta smul ti chkil jvokoltike, maʼuk ta smul li Diose.

NOPO TA SVENTA LIʼE: Jaʼ noʼox jun chopol krixchano o li buchʼu muʼyuk xkʼuxul yoʼonton ti chakʼbe svokol li buchʼu muʼyuk smule. Pe li Vivliae chal ti «jaʼ kʼanelal li Diose» (1 Juan 4:8). Jaʼ yuʼun mu stakʼ jnoptik ti chopol kʼusi tspas li melel Diose o ti muʼyuk tukʼ kʼusi tspase (Job 34:10).

Jaʼ yuʼun chaʼa, toj lek tajek ti xi chajakʼbe abae: «¿Bakʼin to tslajesbe skʼoplal Dios li xchopolil Satanase?». Jech kʼuchaʼal laj xa kiltik tale, li Diose solel spʼajoj li choplejale xchiʼuk kʼux chaʼi ti kʼalal chkil jvokoltike. Jech xtok, li Skʼop ti jaʼ li Vivliae tstij koʼontontik ti akʼo xkalbetik Jeova li kʼusi ta jvul-o koʼontontike, yuʼun li Stuke oyutik ta yoʼonton (1 Pedro 5:7). Li ta yan mantal chtale ta jkʼelbetik sprevailtak ti skʼanojutik tajek li Diose xchiʼuk ti oy sjuʼel sventa xakʼbe slajeb li vokoliletike xchiʼuk li kʼusitik muʼyuk tukʼ chichʼ pasele. *