Nopo avaʼi ti kʼu yelan lek tajek xil sbaik li chaʼvoʼ vachetik ti jmojik tajeke xchiʼuk ti jmoj kʼusi tsnopike. Jun direktora ti jaʼ sbi Nancy Segal ti jaʼ vachetike xchiʼuk ti jaʼ te ch-abtej yoʼ bu tskʼelbeik skʼoplal li vachetike, xi chale: «Oy vachetik ti toj lek xaʼibe sbaik ta jujuntal ti mu persauk skʼan xchapbe sbaik smelolal li kʼusi chalike». Xi chal jun ants ti jaʼ vachetik eke: «Lek tajek xkaʼibe jba jloʼilkutik xchiʼuk li jmuke».

¿Kʼuxi ti lek xaʼibe sbaik li kʼusi tsnopike? Jaʼ ta skoj ti jmoj kʼusitik la spasik tale xchiʼuk ti jmoj kʼu yelan laj yichʼik tsʼitesele. Pe li buchʼutik chchanbeik skʼoplale chalik ti jmoj li kʼusi oy ta yut sbekʼtalike o xkoʼolaj tajek li ADN yuʼunike.

NOPO TA SVENTA LIʼE: Li Diose toj labal sba ti kʼu yelan la spas li gen ch-abtej ta sbekʼtal krixchanoetike (ADN), jaʼ yuʼun chaʼa, stuk noʼox xaʼibe smelolal ti kʼu yelan chkaʼi jbatike. Xi la stsʼiba li Davide: «Voʼot laj achapanun tal ta yut xchʼut li jmeʼe. Muʼyuc mucul ta asat cʼu xʼelan ichapaj tal li jbecʼtale [...]. Aviloj cʼu xʼelan ilic nabuc tal li jbecʼtale; chapal onoʼox avuʼun ti cʼu yepal cʼacʼal chicuxie; tsacal ta vun avuʼun scotol ti cʼalal muʼyuc toʼox chcʼot ta pasele» (Salmo 139:13, 15, 16). Li Diose stuk noʼox xojtikin xchiʼuk maʼuk noʼox xaʼibe smelol ti kʼu yelan ch-abtej ta jbekʼtaltik li gene, yuʼun xaʼibe smelolal skotol li kʼusitik jkuxlebinojtik talel ti jelem yuʼun li jtalelaltike. Jaʼ yuʼun chaʼa, jpat koʼontontik ti jaʼ noʼox stuk xaʼibutik smelolal li Diose.

Xi la spas orasion li ajvalil Davide: «Mucʼul Dios, voʼot laj aqʼuel lec cʼu xiʼelan, xchiʼuc lec xavotquinun. Voʼot xavotquinun cʼalal chichoti, xchiʼuc cʼalal chivaʼi aqʼueloj tal ta nom scotol li cʼusitic ta jnope. Acʼo me muʼyuc toʼox chlocʼ ta que li cʼusi chcale, pero li voʼote, Mucʼul Dios, avotquinoj xa onoʼox» (Salmo 139:1, 2, 4). Jech xtok, lek tajek xojtikin Jeova ti kʼu yelan chkaʼi jbatike xchiʼuk ti kʼusi oy ta yut koʼontontike (1 Crónicas 28:9; 1 Samuel 16:6, 7). ¿Kʼusi chchanubtasutik ta sventa Dios taje?

Akʼo mi mu jnaʼtik lek kʼusi chkalbetik o ti kʼu yelan chkaʼi jbatik kʼalal ta jkʼopontik li Diose, li stuke snaʼoj xa onoʼox ta skoj ti jaʼ Jpasvanej kuʼuntike. Yuʼun chakʼ venta li kʼusi ta jpastike xchiʼuk xaʼibe smelolal ti kʼu yuʼun jech ta jpastike. Pe maʼuk noʼox, yuʼun li Diose snaʼoj kʼusi xuʼ jpastik ti mi jelel li kʼusi chkʼot ta jtojolaltike. Ta skoj ti jaʼ jech la spasutik Dios ti xuʼ xijkʼanvane, xuʼ jchʼuntik ti oy tajek ta yoʼonton chojtikin xchiʼuk tskʼan chaʼibe lek smelolal li kʼusi ta jnoptik xchiʼuk ti kʼu yelan chkaʼi jbatike (1 Juan 4:7-10).

 Xi jamal chal li Vivliae:

• «Yakʼoj sat Jeova ta stojolal li buchʼutik tukʼike xchiʼuk chchikintabe kʼalal xvokoletike» (1 PEDRO 3:12).

• Xi jamal chal li Diose: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat; scotol cʼacʼal te oy o jsat ta atojol» (SALMO 32:8).

¿Mi ta van skoltautik kʼalal jnaʼojtik ti xaʼibe smelolal jvokoltik li Diose? Jnoptik li kʼusi kʼot ta stojolal li Anna, ti likem ta Nigeriae. Xi chale: «Chamem xa ox jmalal kʼalal laj yalbeikun ti oy kanser ta jchuʼe xchiʼuk jaʼo te tikʼil ta ospital li kuni tseb ti ip ta hidrocefalia (tstsʼan sba voʼ ta xchinab). Solel muʼyuk xa jbalil laj kaʼi, la jnop ti jecheʼ xa kuxulune. Toj vokol laj kaʼi ti jmoj te tikʼilunkutik ta ospital xchiʼuk li jtsebe xchiʼuk ti chkichʼ operasion, quimioterapia xchiʼuk radioterapia».

¿Kʼusi koltaat-o Anna sventa xkuch yuʼun li svokole? Xi chale: «Toj lek chkaʼi snopbel skʼoplal li tekstoetike, june jaʼ li Filipenses 4:6, 7, ti te chal ‹li jun oʼontonal yuʼun Dios ti toj echʼ xa noʼox leke, ti jaʼ mu sta li snopben krixchanoetike, chchabi avoʼontonik xchiʼuk anopbenik›. Kʼalaluk ta jnopbe skʼoplal jujun velta li tekstoe, nopol oyun ta stojolal Jeova chkaʼi yuʼun jnaʼoj ti jaʼ mas lek xaʼibun li stuke ti jaʼ mu sta li voʼone. Jech xtok, la spatbeikun tajek koʼonton li kermanotake».

«Akʼo mi ip to chkaʼi, pe mas xa lek oyunkutik xchiʼuk ximuyubajkutik yuʼun jchʼunojkutik ta melel ti te oy-o ta jtojolalkutik Jeova akʼo mi chkil-o jvokolkutike. Xi chal li Santiago 5:11: ‹Chkalbetik skʼoplal ti xmuyubajik noʼox li buchʼutik kuchem yuʼunike. Li voʼoxuke avaʼiojbeik skʼoplal ti kʼu yelan kuch yuʼun li Jobe xchiʼuk laj avilik ti kʼu yelan akʼbat bendision yuʼun Jeovae, ti toj echʼ xa noʼox kʼuxutik ta yoʼonton li Jeovae xchiʼuk ti chkʼuxubinutike›». Li Jeovae laj yaʼibe lek smelolal ti kʼu yelan laj yil svokol li Jobe, jaʼ yuʼun chaʼa, skʼan jpat koʼontontik ti xaʼibutik smelolal ek li Diose.