Li Diose toj labal sba ti kʼu yelan la spas li jbekʼtaltike, yuʼun chpoxta sba stuk o chkʼexta sba stuk. Kʼalal ta jtuchʼ jbatik o kʼalal chijyayije, li jbekʼtaltike tspajes ta anil kʼalal toj ep chmal jchʼichʼeltike, chpoxta li bu yayijeme xchiʼuk tsnupʼ li jnukuliltike.

NOPO TA SVENTA LIʼE: Mi jaʼ la spas li Jpasvanej kuʼuntik ti kʼu yelan chpoxta sba stuk o chkʼexta sba stuk li jbekʼtaltike, ¿mi te to van xijnopnun mi xpoxtaj yuʼun li syayijemal jol koʼontontike? Li jtsʼibajom yuʼun salmoe xchʼunoj ta stojolal Dios ti chpoxta li buchʼutik oy svokol yoʼontonike xchiʼuk chpixbe li xtuchʼemalike (Salmo 147:3). Pe mi ta abikʼtal onoʼox aviloj talel avokol ti solel chavul-o avoʼonton yuʼune, ¿kʼu yuʼun xuʼ xachʼun ti xuʼ xpixbot atuchʼemal li avi xchiʼuk li ta mas jelavele?

Xi chalbutik li Diose: «Jaʼ yuʼun mu me xaxiʼ, yuʼun vuʼun chajchiʼinot; mu cʼu xal avoʼnton, yuʼun vuʼun Diosun avuʼun. Vuʼun chacacʼbot atsatsal, vuʼun chajcoltaot» (Isaías 41:10). Jaʼ yuʼun kʼalal jnaʼojtik ti skʼanojutik li Jeovae chakʼbutik jun oʼontonal xchiʼuk chakʼ kipaltik sventa xkuch batel kuʼuntik li jvokoltike. Li jun oʼontonal laj yal jtakbol Pabloe jaʼ «li jun oʼontonal yuʼun Dios ti toj echʼ xa noʼox leke, ti jaʼ mu sta li snopben krixchanoetike». Xi to laj yale: «Oy jtsatsal ta skotol ta sventa li buchʼu chakʼbun juʼele» (Filipenses 4:4-7, 9, 13).

Tstsatsubtas xchʼunel koʼontontik li Vivlia ta sventa li kʼusi yaloj ta jamal tspas Dios ta stojolal li krixchanoetike. Jech kʼuchaʼal liʼe, li ta Apokalipsis 21:4, 5 te chalbutik li kʼusi tspas Diose xchiʼuk ti kʼu yuʼun xuʼ jpat koʼontontik ta stojolale.

• Tskus skotol li yaʼlel jsatike. Li Jeovae tslajes skotol li kʼusitik chakʼ jvokoltik xchiʼuk li kʼusi ta jvul-o koʼontontik yuʼune, akʼo mi muʼyuk tsotsik yileluk.

• «Li buchʼu te chotol ta chotlebal» ta vinajel ti jaʼ li Ajvalil ti skotol xuʼ yuʼune tstunes sjuʼel xchiʼuk yabtel sventa tspajes li jvokoltike xchiʼuk tskoltautik kʼalal jaʼo chtun tajek kuʼuntike.

• Li Jeovae chalbutik ta jamal ti «tukʼ xchiʼuk melel» li kʼusitik chale. Jaʼ xkaltik, li Jeova ti jaʼ noʼox stuk melel Diose chal ta jamal ti persa chkʼot ta pasel li kʼusitik chale, yuʼun mi muʼyuk xkʼot ta pasele xuʼ la xkalbetik ti maʼuk melel Dios li stuke.

«‹Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel. Jelav xa skʼoplal skotol li kʼusitik oy toʼoxe›. Xi laj yal li buchʼu te chotol ta chotlebal sventa ajvalilale: ‹¡Kʼelo avil!, ta jpas ta achʼ skotol li kʼusitike›. Xi laj yal xtoke: ‹Tsʼibao, yuʼun tukʼ xchiʼuk melel li kʼusitik laj yichʼ alele›» (Apokalipsis 21:4, 5).

Li Vivlia xchiʼuk li kʼusitik pasbile tskoltautik sventa xkojtikintik li Jtotik ta vinajele. Akʼo mi mu xkʼopojik li kʼusitik pasbile, pe tstij koʼontontik ti akʼo xijkʼot ta slekil amigotak li Diose xchiʼuk xi chalbutik li Vivliae: «Nopajanik ta stojolal Dios, vaʼun chnopaj tal ta atojolalik ek» (Santiago 4:8). Xi chal xtok li ta Echos 17:27: «Yuʼun muʼyuk onoʼox bu nom oy ta jtojolaltik ta jujuntal».

Kʼalal mas chachʼakbe yorail sventa chavojtikin li Jeovae chavaʼibe lek smelolal o chachʼun ta melel ti oyot ta yoʼontone (1 Pedro 5:7). ¿Kʼusi sbalil ta jtatik kʼalal jpatoj koʼontontik ta stojolal li Jeovae?

Kalbetik skʼoplal li kʼusi kʼot ta stojolal li Toru ti likem ta Japone, akʼo mi ta sbikʼtal onoʼox jaʼ jchʼunolajel xchiʼuk li smeʼe, pe la stikʼ sba xchiʼuk jtsop chopol krixchanoetik (mafia) ta Japon ti yakuza sbiike. Xi chal li Torue: «Laj toʼox jnop ti spʼajojun li Diose xchiʼuk kaloj mi jaʼ sventa chakʼ jtoj jmul kʼalal oy buchʼu chchame, mas to kʼalal jaʼ chcham li buchʼu jkʼanoje». Li Torue snaʼoj ti ta skoj ti muʼyuk lek stalelal li buchʼutik chchiʼinane lik simaronibuk xchiʼuk mu xkʼuxubinvan. Xvul to ta sjol li kʼusitik tskʼan toʼoxe, xi chale: «Ta jkʼan ox ti keremun to xichame xchiʼuk ti xkichʼ lek ojtikinel ta skoj ti ta jmil li buchʼu mas tsots skʼoplal kʼuchaʼal voʼone».

Akʼo mi jech toʼox xkuxlejal li Torue, pe kʼalal lik xchanik Vivlia xchiʼuk li yajnil ti Hannah sbie, lik jeluk  li stalelale xchiʼuk ti kʼu yelan tsmeltsan sbae. Xi chal li Hannahe: «Toj labal sba ti kʼu yelan jel stalelal li jmalale». Li avie, xi chal ta sjunul yoʼonton ek li Torue: «Jnaʼoj ti oy li Diose xchiʼuk ti oyutik ta yoʼonton ta jujuntale. Li Stuke mu skʼan ti oy buchʼu xchame, chakʼbe perton li buchʼu ta sjunul yoʼonton tsutes yoʼontone xchiʼuk xuʼ xkalbetik skotol, yuʼun jaʼ noʼox stuk xuʼ xaʼibutik smelolal ti kʼu yelan chkaʼi jbatike. Li Jeovae jutuk xa skʼan slajesbe skʼoplal li vokoliletike, li kʼusitik kʼux chkʼot ta jtojolaltike xchiʼuk toj labal sba ti kʼu yelan tskoltautik li avie. Oyutik tajek ta yoʼonton xchiʼuk chchabiutik kʼalal ta jvul tajek koʼontontike» (Salmo 136:23).

Jech kʼuchaʼal kʼot ta stojolal li Torue, chakʼbutik spatobil koʼontontik xchiʼuk tskoltautik sventa lekuk xbat li jkuxlejaltik ti jnaʼojtik ti jutuk xa skʼan slajesbe skʼoplal Dios skotol li vokoliletik ti chij-okʼ-o yuʼune. Akʼo mi noj ta vokolil li balumile, pe xuʼ xatabe sbalil li kʼanelal yuʼun Diose.