Sventa xkojtikintik lek junuk krixchanoe tsots skʼoplal skʼan jnaʼtik li kʼusitik spasoje. Jaʼ jech ek, mi chakʼan chavojtikin lek li Diose skʼan xanaʼ li kʼusitik spasoje. Toj labal van sba chavaʼi ti ep tajek ta jtabetik sbalil li kʼusitik spasoje xchiʼuk ti te tsakal skʼoplal li kʼusi chkʼot ta jtojolaltik ta jelavele.

Jaʼ Mukʼta Jpasvanej kuʼuntik li Jeovae xchiʼuk li stalelaltak ti mu xvinaje «jamal xvinaj kʼalal laj yichʼ pasel tal li balumile, yuʼun te xvinaj ta skoj li kʼusitik pasbile» (Romanos 1:20). «Li Mucʼul Diose ta svuʼel la spas li banamile; ta sbijil la xchapan, la snacan lec li osil banamile, xchiʼuc ta sventa sbijil la xlichʼan batel li vinajele» (Jeremías 10:12). Ta sventa li kʼusitik alakʼik sba spasoj li Diose jaʼ te chakʼ kiltik ti skʼanojutik tajeke.

Nopo noʼox kʼu to yepal chakʼ jmuyubajeltik ti «jaʼ la slocʼta sba jech cʼu chaʼal stuc» ti kʼu yelan la spasutike (Génesis 1:27). Jaʼ yuʼun xuʼ jechuk jtalelaltik kʼuchaʼal li Stuke. Jech xtok, laj yakʼ ti akʼo xkaʼibetik smelolal ti kʼu yelan tsnope xchiʼuk li smantaltake. Kʼalal ta jchʼuntik li beiltaseletik taje, mas me xkuxet koʼontontik xchiʼuk oy me sbalil li jkuxlejaltike. Maʼuk noʼox, yuʼun xuʼ xijkʼot ta yamigo.

Jaʼ jech laj yakʼ ta ilel ti skʼanojutik li Jeova kʼalal laj yakʼbutik li balumile, jech kʼuchaʼal laj yal li jtakbol Pabloe, «akʼbat onoʼox yilik [yuʼun Dios] li kʼusitik lek spasoje, yuʼun akʼbatik talel voʼ ta vinajel xchiʼuk lek laj yakʼ sat li kʼusitik tstsʼunike, akʼbat lek sveʼelik xchiʼuk xkuxet tajek yoʼontonik» (Echos 14:17). Kʼalal la spas balumil li Diose maʼuk noʼox laj yakʼbutik li kʼusitik chtun kuʼuntik jujun kʼakʼale, yuʼun laj yakʼbutik skotol sventa jkʼupin li jkuxlejaltike. Taje jaʼ noʼox jun senyail ti kʼu to yepal chakʼbutik li ta jelavele.

Li Jeovae la spas li balumil sventa te xijnakiutik sbatel osile, yuʼun xi chal li Vivliae: «Li banamile jaʼ laj yacʼbe sventain li cristianoetique» xchiʼuk «ti la xchapan leque, ti lec nacal icom yuʼun sventa acʼo oyuc bochʼotic te chnaquie» (Salmo 115:16; Isaías 45:18). ¿Buchʼu van te chnaki xchiʼuk kʼu sjalil? Xi tstakʼ li Vivliae: «Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (Salmo 37:29).

 Li Jeovae la spas Adan xchiʼuk Eva sventa xkuxiik sbatel osil. Yuʼun te laj yakʼ ta jun alakʼ sba balumil sventa «xchabi, xchiʼuc ta xabtelan» (Génesis 2:8, 15). Xchiʼuk oy kʼusi akʼbat sbainik yuʼun li Diose, xi albatike: «Bolanic; epajanic. Nojesic li banamile; ventainic o» (Génesis 1:28). Jaʼ yuʼun chaʼa, xuʼ ox skʼupin xkuxlejalik sbatel osil ta balumil jechuk li Adan xchiʼuk Evae. Pe maʼuk jech kʼot ta pasel, yuʼun muʼyuk la xchʼunbeik smantal li Diose, jaʼ yuʼun chʼay yuʼunik ti xuʼ ox xkuxiik xchiʼuk «li bochʼo tucʼ yoʼntonique» ti «jaʼ chuʼuninic o li yosilique». Pe jech kʼuchaʼal ta jkʼeltik batele, li kʼusi la spasik li Adan xchiʼuk Evae muʼyuk bu la sjel li kʼusi yaloj onoʼox tspas ta stojolal krixchanoetik li Diose xchiʼuk ta sventa li balumile. Pe yoʼ to mu jkʼeltike, baʼyel jkʼeltik batel li kʼusitik to spasoj li Diose.

¿Kʼu yuʼun yakʼojbutik Vivlia li Jeovae? Li baʼyele jaʼ ti oy ta yoʼonton ti xkojtikintike (Proverbios 2:1-5). Melel onoʼox ti muʼyuk tstakʼbutik Vivlia skotol li kʼusitik ta jakʼbe jbatik ta stojolal Diose, muʼyuk onoʼox bu ta jtatik yan livro ti xuʼ stakʼbutik xtoke (Eclesiastés 3:11). Pe skotol li kʼusitik chal li Vivliae tskoltautik sventa xkojtikintik li Diose. Xuʼ jnaʼtik kʼu yelan stalelal kʼalal chkiltik ti kʼu yelan tstsak ta venta li krixchanoetike xchiʼuk te chkakʼtik venta ti kʼu yelan skʼan stalelal jun krixchano sventa lekuk x-ilat yuʼun li Diose (Salmo 15:1-5). Ta jchantik ti kʼu yelan tskʼan chkichʼtik ta mukʼe, li mantaletik yuʼune xchiʼuk ti kʼu yelan chil ta sventa li saʼel takʼine. Jech noxtok, li Vivliae tskoltautik sventa xkojtikintik lek li Jpasvanej kuʼuntik kʼalal ta jchantik ti kʼu yelan skʼopojel echʼ li Jesukristoe xchiʼuk li kʼusitik la spase (Juan 14:9).

Jech xtok, li Jeovae laj yakʼbutik li Skʼop sventa jnaʼtik kʼuxi xuʼ lek xijmuyubaj xchiʼuk ti oyuk sbalil li jkuxlejaltike. Jaʼ te chalbutik kʼusi skʼan jpastik sventa xijmuyubajuk noʼox xchiʼuk li kutsʼ kalaltike, ti junuk noʼox koʼontontike xchiʼuk ti kʼuxi xuʼ xkuch batel kuʼuntik li kʼusi chakʼbutik vul oʼontonale. Jech kʼuchaʼal chkiltik ta jelavele, tstakʼbutik Vivlia li kʼusi mas tsotsik skʼoplal ta jakʼbe jbatik li ta jkuxlejaltike, jech kʼuchaʼal ti kʼu yuʼun epajem li vokolile xchiʼuk li kʼusi xuʼ jtatik ta mas jelavele. Xchiʼuk chalbutik li kʼusi spasoj Dios sventa xkʼot ta pasel yuʼun li kʼusi yaloj tspase.

Oy to yan kʼusitik ti chakʼ kiltik ti toj labal sba li Vivliae xchiʼuk ti jaʼ yakʼoj ta naʼel li Diose. Akʼo mi te van 40 viniketik la stsʼibaik li Vivlia ti jalij van 1,600 jabile, koʼol li kʼusi chalbe skʼoplale, yuʼun jaʼ yajval Vivlia li Diose (2 Timoteo 3:16). Jelel tajek kʼuchaʼal li yantik voʼneal livroetike, yuʼun muʼyuk jelem li kʼusi chal Vivlia jech kʼuchaʼal chvinaj li ta voʼneal tsʼibetike. Jech xtok, akʼo mi ep laj yichʼ kontrainel, pe kuchem tal yuʼun sventa xichʼ jelubtasel, ti xpuk batele xchiʼuk ti xichʼuk chanele. Li avie jaʼ jlik livro ti mas ep chonbil xchiʼuk ti yichʼoj jelubtasel ta spʼejel balumile. Jaʼ yuʼun chaʼa, ta skoj ti oy-o kuʼuntik li Vivliae chakʼ ta ilel ti «mu snaʼ xlaj o sbatel osil» li Skʼop Diose (Isaías 40:8).

Yan ti kʼusi spasoj li Diose jaʼ ti yaloj ta jamal ti chkʼot ta pasel yuʼun li kʼusi tskʼane, jaʼ yuʼun laj yakʼ jun matanal ti stuk noʼox jeche. Jech kʼuchaʼal laj xa kaltik talele, tskʼan ox ti xkuxiik sbatel osil liʼ ta balumil li krixchanoetike. Pe kʼalal la snop Adan ti muʼyuk chchʼunbe smantal li Diose xchiʼuk ti la saʼ smule, chʼay yuʼun ti xuʼ ox xkuxi sbatel osil liʼ ta balumile, pe maʼuk noʼox chʼay yuʼun stukik, yuʼun jech kʼot ta stojolalik ek li yalab xnichʼnabike: «Ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike» (Romanos 5:12). Ta skoj ti la stoy sbaik li Adan xchiʼuk Evae, mu xa xkʼot ta pasel yilel li kʼusi tskʼan yoʼonton Diose, pe ¿kʼusi la spas li Jeovae?

Ti kʼu yelan laj yaʼi sbae jaʼ te chvinaj ta melel ti kʼu yelan stalelale. Tukʼ li kʼusi la spase xchiʼuk laj yakʼbe kastigo li Adan xchiʼuk Eva ta skoj ti muʼyuk la xchʼunik mantale. Pe li kʼanelal yuʼune jaʼ tijbat-o yoʼonton sventa oyuk kʼusi spas yoʼ xkʼot ta pasel li kʼusi yaloj ta jamal ta stojolal li krixchanoetik ta tsʼakale. Li Jeovae la stunes spʼijil sventa snop lek kʼusi tspas ta sventa li kʼusi kʼot ta pasele xchiʼuk ta anil noʼox oy kʼusi laj yal sventa xchapan (Génesis  3:15). Tspojutik ta mulil xchiʼuk ta lajelal li Xnichʼon ti jaʼ li Jesukristoe, ¿kʼusi smakoj taje?

Sventa xchapan li stoyobbailik li Adan xchiʼuk Evae, li Diose la stak talel li Xnichʼon liʼ ta balumil sventa tal yakʼbe yil krixchanoetik li be sventa kuxlejale xchiʼuk tal «yakʼ xkuxlejal kʼuchaʼal pojelal sventa tspoj epal krixchanoetik» a (Mateo 20:28; Juan 14:6). Ta skoj ti jaʼ tukʼil krixchano li Jesus jech kʼuchaʼal toʼox li Adane, la spojutik lokʼel li ta mulil xchiʼuk ta lajelale, pe li stuke laj onoʼox xchʼunbe-o smantal Dios jaʼ to ti kʼuxi chame. Pe ta skoj ti mu sta-o xchame, li Jeovae la xchaʼkuxes xchiʼuk laj yikʼ sutel ta vinajel. Jaʼ jech la spas Jesus li kʼusi muʼyuk spas yuʼun li Adane: ti xuʼ xkuxiik sbatel osil li krixchanoetik ti chchʼunik mantale. «Jech kʼuchaʼal li Xnichʼon krixchanoe muʼyuk bu tal sventa xtunik ta stojolal, yuʼun tal tunuk xchiʼuk tal yakʼ xkuxlejal kʼuchaʼal pojelal sventa tspoj epal krixchanoetik» (Romanos 5:19). Ta skoj ti laj yakʼ xkuxlejal li Jesuse, chkʼot ta pasel yuʼun Dios ti xuʼ xkuxiik sbatel osil liʼ ta balumil li krixchanoetike.

Xuʼ xkojtikintik-o lek Jeova ti kʼusi la spas kʼalal la stoy sba li Adane. La jchantik ti mu kʼusi xuʼ xmakat-o Dios sventa «chcʼot ta pasel» yuʼun li kʼusi yaloje (Isaías 55:11). Xchiʼuk chakʼ kiltik ti skʼanojutik tajek li Jeovae. «Jaʼ yuʼun laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon sventa jtatik li kuxlejal ta stojolale. Xi yelan li kʼanelale, mu yuʼunuk voʼotik la jkʼantik li Diose, moʼoj, yuʼun jaʼ la skʼanutik xchiʼuk la stakbutik talel Xnichʼon kʼuchaʼal milbil matanal sventa jmultik yoʼ lek xkil jbatik xchiʼuk li Diose» (1 Juan 4:9, 10).

Li Diose laj yakʼ Xnichʼon sventa xakʼ xkuxlejal ta jtojolaltik, jaʼ yuʼun xuʼ jchʼuntik ta melel ti «chakʼbutik ta slekil yoʼonton xchiʼuk Xnichʼon skotol li yan [kʼusitik]» yaloj chakʼbutike (Romanos 8:32). ¿Kʼusitik yan yaloj tspas ta jtojolaltik li Diose? Jkʼeltik batel.