¿MI OY jech anuptanoj kʼuchaʼal taje? Mi oye, xavaʼibe smelolal kʼu yelan chaʼi sbaik li buchʼutik kuxul komike, yuʼun chʼayal chkom yoʼontonik, tsvul yoʼontonik, muʼyuk sbalil chaʼi sbaik, mu xa snaʼ kʼusi tspasik xchiʼuk oy kʼusitik chopol chvaychintaik. Li buchʼutik jech yiloj svokolike solel chopol tajek chaʼi sbaik xchiʼuk lubem tajek chkomik, vaʼun muʼyuk xa sbalil chaʼi li xkuxlejalike.

Mi oy kʼusitik lajem avuʼun ta skoj li tsatsal ikʼaloʼe, xuʼ van muʼyuk xa avipal chavaʼi aba ek. Xuʼ van chanop ti muʼyuk xa sbalil li akuxlejale. Pe li Vivliae chalbe smelolal ti oy sbalil li jkuxlejaltike xchiʼuk ti xuʼ jchʼuntik ti oy kʼusi lek xuʼ jtatik ta mas jelavele.

Xi chal Eklesiastes 7:8: «Jaʼ mas lek kʼalal oy xa kʼusi tstsutse, jaʼ mu sta mi naka to chlike». Kʼalal chavil avokol ta skoj nikel, nojelal ta voʼ o yan kʼusitike, xuʼ van vokol xa chavaʼi chavakʼbe-o echʼel yipal. Pe mi oy smalael avuʼun xchiʼuk mi chavakʼbe yipale, ta kʼunkʼun chlekub batel li akuxlejale.

Li Vivliae chal ti chkʼot skʼakʼalil ti «muʼyuk xa chichʼ aʼiel ti oy buchʼu te xviket ta okʼele mi jaʼuk ti oy buchʼu te x-avet ta skoj svokole» (Isaias 65:19). Li kʼusi chal li teksto liʼe jaʼo chkʼot ta pasel kʼalaluk mi la spas ta Paraiso spʼejel balumil li Ajvalilal yuʼun Diose (Salmo 37:11, 29). Muʼyuk xa me ch-echʼ nikel, nojelal ta voʼ o yan kʼusitik. Skotol li kʼusitik yakʼoj jvokoltik ti mu xchʼay-o ta joltike, ta me xlaj-o skʼoplal. Yuʼun xi chal ta jamal li Dios ti skotol xuʼ yuʼune: «Muʼyuk xa chichʼ tael ta naʼel li kʼusitik kʼotemik ta pasel ta voʼnee xchiʼuk muʼyuk te chkom-o ta oʼontonal» (Isaias 65:17).

Nopo avaʼi liʼe: li Jpasvanej kuʼuntike oy kʼusitik spasoj sventa oyuk spatobil koʼontontik. Yuʼun tskʼan ti jun koʼonton xijkuxi mi yakal xa ox tspas mantal li Ajvalilal yuʼune (Jeremias 29:11). ¿Mi xuʼ van xakʼbe sbalil jkuxlejaltik li spatobil oʼontonal taje? Li Saly ti laj kalbetik skʼoplal li ta baʼyel mantale xi chale: «Mi ta jnopbetik skʼoplal li kʼupil sba kuxlejal kʼalal mi jaʼ xa ox ch-ajvalilaj li Ajvalilal yuʼun Diose, ta me skoltautik sventa mu jvules ta joltik li kʼusitik kʼotem ta jtojolaltike xchiʼuk ti xkuch batel kuʼuntike».

¿Kʼusi to yan tspas li Ajvalilal yuʼun Dios ta tsʼakale? Ta jtijkutik avoʼonton yoʼ xakʼel batel. Akʼo mi ep kʼusitik kʼotem ta atojolal, te chavakʼ venta ti oy sbalil li akuxlejale xchiʼuk ti jutuk xa skʼan xlaj skʼoplal li nikel, nojelal ta voʼ o yan kʼusitike. Yoʼ to mu xkʼot ta pasel taje, jaʼ tskoltautik li beiltaseletik ta Vivlia sventa xkuch batel kuʼuntike.