Ta smilal xa noʼox jabil echʼ talele chamik epal krixchanoetik ta skoj ti mu toʼox snaʼik kʼuxi chpuk talel li chameletike. Ta mas tsʼakale, li sientifikoetike laj yakʼik venta ti kʼuxi chpuk batel li chamele. Laj yakʼik venta ti jaʼ ta skoj li bikʼtal chonetik ti chakʼ chamele, li bakteriaetike xchiʼuk li virusetike. Kʼalal laj yakʼik venta taje, jaʼ te laj yichʼ naʼel kʼusi xuʼ jpastik sventa mu masuk xij-ipajutik xchiʼuk ti xichʼ sabel xpoxile, jech noxtok, jaʼ koltavanem ti ta smiyonal xa noʼox krixchanoetik xuʼ mas jal xkuxiik xchiʼuk ti mu masuk x-ipajike.

¿Kʼusi xuʼ xkaltik li ta yan sjakʼobiltak ti tsotsik skʼoplale? ¿Mi xuʼ van sjel jkuxlejaltik mi laj kaʼibetik smelolal li sjakʼobiltak liʼe?

• ¿Buchʼu jaʼ li Diose?

• ¿Buchʼu jaʼ li Jesukristoe?

• ¿Kʼusi jaʼ li Ajvalilal yuʼun Diose?

• ¿Kʼusi chkʼot ta jtojolaltik li ta mas tsʼakale?

Ta smiyonal xa noʼox krixchanoetik staojbeik xa li stakʼobiltak taje, jaʼ yuʼun mas xa lek li xkuxlejalike. Taje xuʼ me jech sjelbot li akuxlejal eke.

Li voʼote xuʼ van chajakʼbe aba mi xuʼ xata li kʼusi melele. Yuʼun li avie mas xa vokol ta naʼel mi melel li kʼusi chalike o mi jaʼ jun loʼlael. ¿Kʼu yuʼun?

Epal krixchanoetike mu xa xchʼunik li kʼusi chal li ajvaliletike, li yajval empresaetike o li kʼusi chalik ta notisiaetike. Mu xa snaʼik mi melel li kʼusi chalike o mi jaʼ noʼox chalik li kʼusi tsnopike o mi yolbaj xa tsjutik kʼop. Ta skoj ti mu xa snaʼik bu tspat yoʼonton li krixchanoetike, mu xa snaʼik li kʼusi stakʼ chʼunele xchiʼuk mu xa snaʼik li kʼusi kʼot ta pasel ta melele.

Akʼo mi jech chkʼot ta pasel taje, li voʼote xuʼ me xatabe stakʼobiltak li kʼusi tsotsik skʼoplal skʼan naʼel ta sventa li jkuxlejaltike. ¿Kʼuxi ta tael taje? Jaʼ jech kʼuchaʼal ta jsabetik stakʼobil li kʼusitik ta jakʼbe jbatik ti mu masuk tsotsik skʼoplale.

Jujun kʼakʼale oy onoʼox kʼusi ta jsabetik skʼoplal. Jech kʼuchaʼal li Jessicae, kʼalal chbat sman talel li kʼusi tslajesike persa onoʼox tskʼel mi muʼyuk kapal ta maniachenekʼ (cacahuate) li kʼusi tsmane. Xi chal kaʼitike: «Li jtsebe ta ora ch-ipaj-o mi la sta ta lajesel jutuk maniachenekʼe, yuʼun xuʼ xcham-o. Jaʼ yuʼun, kʼalal mu to ta jman jtosuk veʼlile, baʼyel ta jkʼel lek li kʼusi yichʼoje. Ta to jsabe mas skʼoplal, ta xikʼopoj batel li ta empresa sventa jakʼ mi muʼyuk van la skap sba xchiʼuk li maniachenekʼe. Maʼuk noʼox taje, yuʼun ta jsabe skʼoplal ti bu xuʼ xalbeikun ta jamal mi lek ti kʼu yelan tspasik veʼlil li empresae».

Xuʼ van li voʼote muʼyuk chasaʼ jujun kʼakʼal li kʼusitik tsotsik skʼoplal kʼuchaʼal tspas li Jessicae, pe xuʼ me jech xapas li kʼusi la spase:

• Jsabetik smelolal.

• Jsabetik mas skʼoplal.

• Jkʼelbetik skʼoplal mi stakʼ jpat koʼontontik li bu ta jakʼtike.

Mi jech ta xichʼ pasele, xuʼ me skoltaot ta stabel stakʼobiltak li kʼusi tsotsik skʼoplal ta jakʼbe jbatik ta jkuxlejaltike. Jkʼeltik kʼuxi ta pasel.

Sventa jnaʼtik li kʼusi mas tsotsik skʼoplal ta jakʼbe jbatik li ta jkuxlejaltike, jechuk jpastik kʼuchaʼal la spas Jessica ti la tskʼelbe lek skʼoplal ta sventa mi yichʼoj maniachenekʼ li veʼliletike. Xi chale: «Kʼalal lek ta jsabe batel smelolale xchiʼuk ti ta jsabe mas skʼoplale, jaʼ skoltaojun ta stael li kʼusi melel chakʼ ta chanel li Vivliae». Ta smiyonal xa noʼox krixchanoetik jech spasojik kʼuchaʼal li Jessicae, vaʼun staojik ta Vivlia li kʼusi chal ta sventa li sjakʼobiltak liʼe:

• ¿Kʼu yuʼun ti kuxulutike?

• ¿Kʼusi chkʼot ta jtojolaltik kʼalal chijchame?

• ¿Kʼu yuʼun oy tajek vokolil?

• ¿Kʼusi yakal tspas Dios sventa xakʼbe slajeb li vokoliletike?

• ¿Kʼuxi xuʼ xijmuyubaj li ta kutsʼ kalaltike?

Li voʼot eke xuʼ me xatabe li melel stakʼobiltak taje xchiʼuk yan sjakʼobiltak mi laj achan li Vivliae xchiʼuk mi laj asabe mas skʼoplal li ta Internet ta www.pr418.com.