Li avie xkoʼolaj ti jutuk xa skʼan stautik li jun tsatsal ikʼaloʼe. Li Jesuse laj yal ti jaʼ li «mukʼta tsatsal [vokolile]» (Mateo 24:21). Akʼo mi muʼyuk kʼusi stakʼ jpastik sventa mu xvul ta jtojolaltik li tsatsal ikʼaloʼe, xuʼ onoʼox jsaʼtik bu jnakʼ jbatik. ¿Kʼusi van skʼan jpastik?

Kʼalal laj yal Mantaletik ta Vits li Jesuse, xi laj yalbutike: «Saʼilanik me baʼyel li Ajvalilal yuʼun Diose xchiʼuk li stukʼilale» (Mateo 6:33). ¿Kʼusi skʼan xal taje?

«Saʼilanik me baʼyel li Ajvalilal yuʼun Diose». Taje jaʼ skʼan xal ti skʼan baʼyel xkakʼ ta jkuxlejaltike (Mateo 6:25, 32, 33). ¿Kʼu yuʼun skʼan jech jpastik? Jaʼ ta skoj ti mu xchapaj kuʼuntik li vokoliletik oy ta spʼejel balumile. Yuʼun jaʼ noʼox xchapaj yuʼun li Diose.

Saʼilanik me «li stukʼilale». Taje jaʼ skʼan xal ti skʼan xkakʼ kipaltik ta xchʼunel li mantaletik xchiʼuk li beiltaseletik yuʼun Diose. ¿Kʼu yuʼun skʼan jech jpastik? Yuʼun mi jaʼ noʼox ta jnop jtuktik li kʼusi ta jpastike, muʼyuk me kʼusi lek ta jtatik (Proverbios 16:25). Pe mi jaʼ ta jchʼunbetik smantal li Jeovae, xmuyubaj kuʼuntik xchiʼuk lek chbat li jkuxlejaltike (Isaias 48:17, 18).

¿Kʼu yuʼun xi laj yal li Jesuse: «Saʼilanik me baʼyel li Ajvalilal yuʼun Diose xchiʼuk li stukʼilale»? Ti jech laj yale, jaʼ ta skoj ti oy buchʼutik chchʼay xaʼiik li kʼusi mas tsots skʼoplale xchiʼuk tsnopik ti muʼyuk xa kʼusi tsvul-o yoʼontonik mi oy xa ep stakʼinike. Li yan xtoke, jaʼ ti oy buchʼutik jaʼ chbat ta yoʼontonik  saʼel li kʼusi chtun yuʼunike, ti jaʼ xa muʼyuk yorail yuʼunik sventa saʼik li Ajvalilal yuʼun Diose (Mateo 6:19-21, 25-32).

Li Jesuse laj yal ta jamal ti buchʼutik tskoltaik li Ajvalilal yuʼun Diose ep kʼusitik ch-akʼbatik li avie xchiʼuk ch-akʼbatik epal bendision li ta jelavele (Mateo 6:33).

Akʼo mi baʼyel onoʼox la saʼik li Ajvalilal xchiʼuk li tukʼilal yuʼun Dios li baʼyel yajchankʼoptak Jesuse, muʼyuk laj yilbeik slajeb li vokolile. Pe laj onoʼox staik jun melel nakʼobbail. ¿Kʼuxi laj yutik taje?

Jaʼ ti la xchʼunik li tukʼil beiltaseletik chakʼ Diose, vaʼun muʼyuk jech laj yil svokolik jech kʼuchaʼal li buchʼutik muʼyuk la xchʼunbeik smantal li Jeovae. Yan xtoke, jaʼ ti laj yakʼ xchʼunel yoʼontonik ti chtal onoʼox li Ajvalilal yuʼun Diose, taje jaʼ koltaatik-o sventa stsal yuʼunik li tsatsal vokoliletik la snuptan ta xkuxlejalike. Xchiʼuk akʼbatik yuʼun Dios «li juʼelal ti mu kʼusi [xkoʼolaj-o]» sventa xkuch yuʼunike (2 Korintios 4:7-9).

Li yajtsʼaklomtak Kristo ta baʼyel sigloe la xchʼunik li kʼusi albatik ti skʼan baʼyel saʼik li Ajvalilal yuʼun Diose. Laj yalbeik batel skʼoplal li Ajvalilal ti bu nakalike (Kolosenses 1:23). ¿Mi oy van buchʼu jech yakal tspasik li avi eke?

¡Oy! Li stestigotak Jeovae snaʼojik ti jutuk xa skʼan xtal li Ajvalilal yuʼun Dios sventa xtal yakʼbe slajeb li chopol kuxlejale. Jaʼ yuʼun chakʼik persa ta spasel li kʼusi laj yal komel Jesus liʼe: «Li lekil aʼyejetik ta sventa li Ajvalilale ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mateo 24:14).

¿Kʼusi van chapas mi laj avaʼi li lekil aʼyejetike? Ta jtijkutik avoʼonton ti xachanbe stalelal li jnaklejetik ta Berea ta Masedonia ti kuxiik ta baʼyel sigloe. Kʼalal laj yaʼiik li lekil aʼyej laj yalbe skʼoplal li jtakbol Pabloe, kʼot «tajek ta yoʼontonik», «tskʼelbeik lek smelolal» li Tsʼibetik sventa tskʼelik mi jech ta melel li kʼusi laj yaʼiike xchiʼuk laj yakʼ ta xkuxlejalik li kʼusi la xchanike (Echos 17:11, 12).

Taje xuʼ me jech xapas ek. Mi baʼyel chasaʼ li Ajvalilal yuʼun Dios xchiʼuk li stukʼilale, ta me xata anakʼobbail xchiʼuk chavichʼ chabiel li avie, jech xtok, li ta jelavele chata jun oʼontonal xchiʼuk muʼyuk kʼusi chaxiʼo ta sbatel osil.