• Jaʼ chtʼujat yuʼun Dios. «Voʼon jvaʼanoj jtuk li ajvalil [kuʼune], chkakʼbot arextoin li mukʼtik lumetike xchiʼuk chkakʼbot sventa xavuʼunin kʼalal to spajeb balumil» (Salmos 2:6, 8).

• Jaʼ chkom ta xkʼexol li ajvalil Davide. «Vokʼ xa jun olol ta jtojolaltik, laj xa kichʼtik akʼbel jun kerem [...]. Solel muʼyuk spajeb ti bu to chkʼot li ajvalilal yuʼune xchiʼuk muʼyuk spajeb li jun oʼontonale, jaʼ chlik chotiuk li ta xchotleb ajvalil Davide xchiʼuk jaʼ ch-och ta skʼob li ajvalilale, lek nakal chkom» (Isaias 9:6, 7).

• Te chvokʼ ta Belen. «Li voʼote, Belen [...], te chlokʼ tal ta atojolal li buchʼu tspas mantal [kuʼune,] li smukʼulale chkʼot kʼalal to ta jujujot stiʼil balumil» (Mikeas 5:2, 4).

• Chichʼ pʼajel xchiʼuk chichʼ milel. «Laj yichʼ pʼajel xchiʼuk muʼyuk sbalil laj yichʼ ilel [...]. Oy kʼusi laj yichʼ pajbel ta skoj li jmultike; laj yil svokol ta skoj li jpaltailtike» (Isaias 53:3, 5).

• Chichʼ chaʼkuxesel xchiʼuk chtoybat skʼoplal yuʼun Dios. «Muʼyuk te chaviktaun li ta Mukinale. Muʼyuk chavakʼ batuk ta chʼen li buchʼu tukʼ chakʼ sba ta atojolale [...]; chakʼ muyubajel sbatel osil kʼalal teun ta abatsʼikʼobe» (Salmos 16:10, 11).

Li buchʼu lek tajek sta-o x-och ta Ajvalile jaʼ li Jesukristoe. Oy jun anjel ti xi onoʼox laj yalbe li Maria ti jaʼ smeʼ li Jesuse: «Te chchotanat yuʼun Jeova Dios li ta xchotleb ajvalil Davide, ti jaʼ stote [...], muʼyuk bu chlaj skʼoplal li Ajvalilal yuʼune» (Lukas 1:31-33).

Li Jesuse muʼyuk la spas mantal kʼalal echʼ ta balumile. Yuʼun te to ta vinajel tspas talel mantal ta stojolal li krixchanoetike, ti jaʼ tʼujbil yuʼun Diose. ¿Kʼu yuʼun ti jaʼ lek tajek sta-o x-och ta Ajvalile? Jkʼeltik avil kʼusi la spas kʼalal liʼ toʼox oy ta balumile.

•   La xkʼuxubin li krixchanoetike. La skolta vinik antsetik, mol meʼeletik, kerem tsebetik xchiʼuk ololetik, mu ventauk bu likemik talel o mi jkʼulejik o mi abol sbaik (Mateo 9:36; Markos 10:16). Kʼalal xi albat yuʼun jun vinik ti tsakbil ta leprae: «Ti xakʼanuke, xuʼ xapoxtaun» ti xie, kʼuxubaj ta yoʼonton xchiʼuk la xpoxta (Markos 1:40-42).

• La xchanubtasutik kʼusi xuʼ jpastik sventa lek xilutik li Diose. Xi laj yale: «Mu me xuʼ xatunik ta smoso Dios xchiʼuk ta smoso Kʼulejal». Jech xtok, laj yalbutik ti skʼan jech jpasbetik li krixchanoetik ti kʼu yelan ta jkʼantik pasbele. Laj yal ti Diose maʼuk noʼox tstsak ta mukʼ li kʼusi ta jpastike, tstak ta mukʼ xtok li kʼusi ta jnoptik xchiʼuk ti kʼu yelan chkaʼi jbatike. Jaʼ yuʼun, sventa lek xilutik li Diose, skʼan jnaʼtikuk spajtsanel li kʼusi oy ta koʼontontike (Mateo 5:28; 6:24; 7:12). Li Jesuse laj yalbe skʼoplal kʼusi skʼan jpastik sventa xijmuyubaj noʼoxe, jaʼ ti xkojtikintik li kʼusi tskʼanbutik Diose xchiʼuk ti xkakʼ ta jkuxlejaltike (Lukas 11:28).

• La xchanubtasutik kʼusi skʼan xal ti chijkʼanvane. Li kʼusitik la spas Jesus xchiʼuk li kʼusitik laj yale kʼot ta yoʼonton li krixchanoetike. Xi chal li Vivliae: «Batsʼi chʼayal to kom yoʼontonik li epal krixchanoetik ta sventa ti kʼu yelan chanubtasvane, yuʼun vinaj ti tsots yabtel ti kʼu yelan chanubtasvane» (Mateo 7:28, 29). Yuʼun xi laj yale: «Kʼanik-o me li avajkontratakike». Li Jesus eke la spas orasion ta stojolal li buchʼutik milate, xi laj yale: «Tot, paso ta perton skotolik, yuʼun mu snaʼ li kʼusi tspasike» (Mateo 5:44; Lukas 23:34).

Lek tajek sta-o x-och ta Ajvalil li Jesuse. Yuʼun lek xtojob, skʼanojutik xchiʼuk tskʼan tskoltautik. ¿Pe kʼusi ora chlik spas mantal?