Li Diose chakʼbe bendision li buchʼu chkoltavane
Epal krixchanoetik ta spʼejel balumile muʼyuk lek sveʼelik xchiʼuk muʼyuk snaik. Junantike jaʼ xa noʼox spatoj-o yoʼontonik ta sventa li kʼusi chtal ta tsʼakale. Mi chkakʼtik persa skoltael li yantike, jaʼ me jech chakʼbutik sbendision li Diose.
LI KʼUSI CHAL LI SKʼOP DIOSE
«Li buchʼu tskolta li povree oy kʼusi chakʼbe ta chʼom li Jeovae xchiʼuk jaʼ chtojbat sutel yuʼun Dios ta skoj li kʼusi tspase» (PROVERBIOS 19:17).
¿KʼUSI XUʼ JPASTIK SVENTA JKOLTATIK LI YANTIKE?
Li Jesuse laj yalbe skʼoplal jun vinik ti laj ta j-elekʼe xchiʼuk ti chamem xa kom yuʼunik yileluke (Lukas 10:29-37). Kʼalal echʼ jun jyanlum vinike, ta slekil yoʼonton la skolta akʼo mi mu xojtikin sbaik.
Li vinik taje maʼuk noʼox la xpoxtabe li syayijemaltake xchiʼuk ti la skolta ta takʼine, yuʼun oy to kʼusitik la spas sventa xkol.
¿Kʼusi chakʼ jchantik li loʼil taje? Li Jesuse laj yakʼ kiltik ti jpastik bu kʼalal xuʼ kuʼuntik sventa jkoltatik li yantike (Proverbios 14:31). Li Skʼop Diose chal ti jutuk xa skʼan slajesbe skʼoplal povreal xchiʼuk vokolil li Diose. Pe ¿kʼuxi tslajesbe skʼoplal xchiʼuk bakʼin ta spas? Li ta yan mantal chtale, te chalbe skʼoplal li bendisionetik xchapanojbot li Jpasvaneje.
