Li Jpasvaneje skʼanojutik xchiʼuk oyutik ta yoʼonton
1. JAʼ CHAKʼ LOKʼUK TAL LI KʼAKʼALE
¿Kʼu van yelan xanaʼ li kuxlejal ti muʼyukuk li kʼakʼale? Li kʼakʼale jaʼ chakʼ ti xlokʼ tal yanal li teʼetike, ti xakʼ xniche, ti xakʼ sate xchiʼuk ti xakʼ sbekʼtake. Jech xtok, jaʼ chakʼ ti stokʼ muyel voʼ li yibel teʼetike, chbat kʼalal to ta yanal, vaʼun te chjobinaj batel.
2. JAʼ CHAKʼ TALUK VOʼ
Li voʼe jaʼ jmotontik yakʼoj Dios ti jtunel tajek kuʼuntike. Jaʼ chakʼ ti lekuk xchʼi li kʼusi ta jtsʼuntike. Li Diose chakʼbutik voʼ, ti epuk xlokʼ li kʼusi ta jtsʼuntike, ti epuk jveʼeltike xchiʼuk ti xijmuyubajuk noʼox tajeke.
3. JAʼ CHAKʼ JVEʼELTIK XCHIʼUK JKʼUʼ JPOKʼTIK
Epal totil meʼiletike tsvul yoʼontonik ti bu tstabeik sveʼel xchiʼuk skʼuʼ spokʼik li yutsʼ yalalike. Li Vivliae xi chale: «Kʼelo lek avilik li mutetik ta vinajele; leʼe mu snaʼ x-ovolajik, mu snaʼ stsob sveʼelik mi jaʼuk bu tskʼej ta snail li sveʼelike. Manchuk mi jech, chmakʼlinat yuʼun li Atotik ta vinajele. ¿Mi mu jaʼuk mas tsots akʼoplalik kʼuchaʼal li stukike?» (Mateo 6:25, 26).
«Nopik kʼuxi chchʼi li nichimetike [...,] pe chkalboxuk avaʼiik ti mi jaʼuk sta jech yutsil skʼuʼ spokʼ la slap [li pʼijil ajvalil] Salomon ta sjunul smukʼulal kʼuchaʼal li nichimetik taje. Jaʼ yuʼun, mi jaʼ jech chakʼbe skʼuʼ spokʼ tsʼiʼleletik ta osiltik li Diose, [...] pe ti chichʼ tikʼel ta orno okʼome, ¿mi mu masuk oy srasonal ti chakʼ akʼuʼ apokʼik li voʼoxuke?» (Lukas 12:27, 28).
Mi x-akʼ yuʼun jveʼeltik xchiʼuk jkʼuʼ jpokʼtik li Diose, ta me xakʼbutik li kʼusi yan chtun kuʼuntike. Kʼalal chkakʼtik persa spasel li kʼusi tskʼanbutik Diose, ta me xakʼbutik bendision sventa jta li jveʼeltike xchiʼuk xuʼ skoltautik stael kabteltik sventa jmantik li kʼusi chtun kuʼuntike (Mateo 6:32, 33).
Kʼalal ta jnopbetik skʼoplal li kʼakʼal, li voʼe, li mutetike xchiʼuk li nichimetike, ¿mi mu oyuk lek srasonal kuʼuntik sventa jkʼantik li Diose? Li ta yan mantal chtale, te chkiltik kʼusitik akʼbat snaʼik yuʼun Dios li krixchanoetike.
