Li j-alkʼopetike, ¿kʼusi chalik ta stojolal li Diose?
Oy xa ta sjayibal jabile, li Diose la stunes j-alkʼopetik sventa xalbe jun aʼyej ti toj tsots skʼoplal li krixchanoetike. Li aʼyej laj yal Diose, ¿mi te chalbutik li kʼusi skʼan jpastik sventa xakʼbutik sbendisione? Te chalbutik. Jkʼeltik kʼusi chakʼ jchantik li kʼusi laj yalik li oxvoʼ tukʼil j-alkʼopetike.
LI J-ALKʼOP ABRAANE (IBRAHIM)
Li Diose mu snaʼ xtʼujvan xchiʼuk chakʼbe bendision skotol li krixchanoetike.
Li Diose xi jamal laj yalbe li Abraane: «Voʼot ta atojolal tstaik bendision skotol li utsʼ alaliletik ta balumile» (Jenesis 12:3).
¿Kʼusi chakʼ jchantik? Jaʼ ti solel skʼanojutik tajek li Diose xchiʼuk chakʼbe bendision skotol li utsʼ alaliletik (viniketik, antsetik xchiʼuk ololetik) ti chchʼunik mantale.
LI J-ALKʼOP MOISES (MUSA)
Li Diose oy xkʼuxul yoʼonton xchiʼuk chakʼbe bendision li buchʼutik tskʼan chojtikinik leke.
Li Buchʼu skotol xuʼ yuʼune laj yakʼbe sjuʼel li j-alkʼop Moises sventa spas skʼelobiltak juʼelale. Akʼo mi jech, xi la skʼanbe Dios li Moisese: «Akʼbun kil li beetik avuʼune sventa xkojtikinot xchiʼuk sventa jechuk-o lek xavilune» (Eksodo 33:13). Li Diose lek tajek laj yaʼi li kʼusi la skʼan li Moisese, jaʼ yuʼun laj yakʼbe spʼijil sventa x-ojtikinat ti kʼu yelan stalelale xchiʼuk li kʼusi tspase. Jech kʼuchaʼal liʼe, li Moisese la xchan ti oy xkʼuxul yoʼonton xchiʼuk slekil yoʼonton li Jpasvaneje (Eksodo 34:6, 7).
¿Kʼusi chakʼ jchantik? Jaʼ ti jkotoltik (viniketik, antsetik xchiʼuk ololetik) chakʼbutik bendision li Dios mi chkakʼ kipaltik sventa xkojtikintik leke. Li ta Skʼope, te chalbutik kʼuxi xuʼ xkichʼtik ta mukʼ xchiʼuk ti oy tajek ta yoʼonton chakʼbutik bendisione.
LI J-ALKʼOP JESUS (ISA)
Li Jesuse laj ya’ibe xkʼuxul svokol li krixchanoetike xchiʼuk la xpoxtaan.
Li Diose chakʼbutik bendision sbatel osil mi ta jchantik li kʼusi la spas Jesus xchiʼuk li kʼusi laj yakʼ ta chanele.
Li ta Skʼop Diose, ep kʼusi chalbutik ta sventa xkuxlejal li Jesuse xchiʼuk li kʼusi laj yakʼ ta chanele. Li Diose laj yakʼbe sjuʼel Jesus sventa tspas skʼelobiltak juʼelal, yuʼun la xpoxta maʼsatetik, li buchʼutik makal xchikinik xchiʼuk li koxoetike. Jech xtok, la xchaʼkuxes junantik animaetik. Jaʼ jech laj yakʼ ta ilel Jesus li kʼusitik tspas Dios ta stojolal li krixchanoetik ta jelavele. Jaʼ yuʼun, sventa jkʼupintik li bendisionetik taje, xi laj yalbutik li kʼusi skʼan jpastike: «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3).
Li Jesuse toj lek yoʼonton echʼ, xaʼibe svokol li krixchanoetike xchiʼuk skʼanojan tajek. Epal krixchanoetik ti jelajtik sjabilalike la xchʼamik li takel ta ikʼel liʼe: «Chanbeikun jtalelal, yuʼun manxoun xchiʼuk bikʼit kakʼoj jba, vaʼun chata siketel avoʼontonik» (Mateo 11:29). Li Jesuse mu jechuk la spas stalelal jech kʼuchaʼal li viniketik ta skʼakʼalil ti muʼyuk chichʼik ta mukʼ li antsetike, yuʼun li stuke laj yakʼbe ta ilel slekil yoʼonton, laj yichʼanan ta mukʼ xchiʼuk la stsakanan ta venta.
¿Kʼusi chakʼ jchantik? Jaʼ ti skʼanojan tajek krixchanoetik li Jesuse xchiʼuk laj yak’butik ta ilel k’u yelan skʼan xkil jbatik xchiʼuk li yantike.
MA’UK DIOS LI JESUSE
Li Skʼop Diose chal ti «jun noʼox Dios» oye xchiʼuk ti jaʼ yaj-almantal li Jesukristoe (1 Korintios 8:6). Li Jesuse jamal laj yal ti jaʼ mas mukʼ skʼoplal li Diose xchiʼuk ti jaʼ takat talel ta balumile (Juan 11:41, 42; 14:28). *
^ par. 17 Mi chakʼanbe to mas yaʼyejal ta sventa li Jesukristoe, kʼelo li xchanobil 4 li ta foyeto Lekil aʼyejetik yakʼoj Dios ti te chata ta www.pr418.com.
