¿Kʼuxi chvinaj ti jkʼanojtik li yantike?
Jkotoltik te lik talel jtsʼunbaltik ta stojolal li Adan, li baʼyel vinike. Jaʼ yuʼun, kutsʼ kalal jbatik. Li kʼusi ta jkʼantike jaʼ ti xichʼ sbaik ta mukʼ xchiʼuk ti skʼan sbaik li utsʼ alaliletike, taje mu xa masuk jech chkiltik tspasik li krixchanoetike. Pe li Diose mu jechuk oy ta yoʼonton.
¿KʼUSI CHAL LI SKʼOP DIOS TA SVENTA LI KʼANELALE?
«Skʼan me xakʼan achiʼil jech kʼuchaʼal akʼanoj aba atuke» (LEVITIKO 19:18).
«Kʼanik-o me li avajkontratakike» (MATEO 5:44).
¿KʼUXI CHKAKʼTIK TA ILEL TI JKʼANOJTIK LI YANTIKE?
Li ta 1 Korintios 13:4-7 te chalbutik Dios ti kʼu yelan li kʼanelale.
«Li kʼanelale xmalaj yuʼun xchiʼuk lek yoʼonton».
Nopo ta sventa liʼe: ¿Kʼu yelan chavaʼi aba kʼalal oy buchʼu xmalaj lek yuʼun, ti oy slekil yoʼontone xchiʼuk ti muʼyuk chkap kʼalal oy kʼusi muʼyuk lek chbat ta pasel avuʼune?
«Li kʼanelale mu snaʼ x-itʼixaj».
Nopo ta sventa liʼe: ¿K’u yelan chavaʼi aba kʼalal oy buchʼu mu spat yoʼonton ta atojolale o ti chitʼixtaote?
Li kʼanelale «maʼuk tsaʼ li kʼusi lek chaʼi stuke».
Nopo ta sventa liʼe: ¿Kʼu yelan chavaʼi kʼalal oy buchʼu tstsak ta venta li kʼusi chanope xchiʼuk ti maʼuk tskʼan ti akʼo xichʼ pasel li kʼusi chale?
Li kʼanelale «muʼyuk chchap batel li kʼusi chopol tspasbate».
Nopo ta sventa liʼe: Li Diose chakʼ ta perton li buchʼutik tsutes yoʼontonike. «Mu teuk-o ta sjol sbatel osil li jpaltailtike, mu teuk-o tsnakʼ skʼakʼal yoʼonton sbatel osil» (Salmo 103:9). Ta jtojtik tajek ta vokol kʼalal chakʼutik ta perton li buchʼu oy kʼusi chopol la jpasbetike. Skʼan xkakʼtik ta perton li buchʼu oy kʼusi chopol la spasbutike (Salmo 86:5).
Li kʼanelale «maʼuk xkuxet-o yoʼonton li kʼusi muʼyuk tukʼe».
Nopo ta sventa liʼe: Kʼalal oy kʼusi chopol ta jnuptantike, mu lekuk chkaʼitik ti xmuyubaj-o li yantike. Jaʼ yuʼun, muʼyuk xijmuyubaj xa yuʼun kʼalal chil svokol li yantike akʼo mi oy kʼusi chopol la spasbutik.
Mi ta jkʼantik ti akʼo xakʼbutik sbendision li Diose, skʼan me jkʼantik li yantike mu ventauk li sjabilalike, ti bu likemik tale o li srelijionike. Kʼalal ta jkoltatik li buchʼutik chtun yuʼunike, jaʼ me te chvinaj ti jkʼanojtik li yantike.
