Li kʼusi tsnop junantik ta sventa li orasione
«Kʼalal ta jpas orasione, chkaʼi ti te xchiʼinojun li Diose, ti tsnitbun batel jkʼobe xchiʼuk ti tsbeiltasun kʼalal mu xa jnaʼ kʼusi ta jpase» (MARÍA).
«Li kajnile cham kʼalal 13 xa ox jabil stsʼikoj talel li kansere. Xvul ta jol ti jujun kʼakʼal ta jkʼopon li Diose, laj kakʼ venta ti laj yaʼibun li xkʼuxul jvokole, yuʼun jun koʼonton laj kaʼi jba» (RAÚL).
«Ti xuʼ jpastik orasione jaʼ jun kʼupil sba matanal yakʼojbutik li Diose» (ARNE).
Li María, Raúl, Arne xchiʼuk yantike jaʼ jun mukʼta matanal chaʼiik ti xuʼ spasik orasione. Yuʼun jaʼ jech chchiʼinik ta loʼil chaʼiik li Diose, ti xuʼ stojbeik ta vokole xchiʼuk ti skʼanbeik koltaele. Jaʼ jech tsnopik kʼuchaʼal chal Vivlia kʼalal tskʼoponik Diose, ti xi chale: «Liʼe jaʼ li kʼusi jpatoj-o koʼontontik ta stojolale: yuʼun kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone» (1 Juan 5:14).
Akʼo mi jech, oy ep krixchanoetik ti vokol chaʼiik ta xchʼunel li kʼusi chal Vivlia ta sventa li orasione. Xi chalbutik kʼusi tsnop li Steve: «Kʼalal 17 toʼox jabilale, cham oxvoʼ kamigotak: li june cham ta jun aksidente ta karro, li chaʼvoʼe jikʼavik ta nab». Xi chal li kʼusi la spas li Steve: «La jpas orasion sventa jakʼbe Dios ti kʼu yuʼun jech kʼot ta pasele, pe muʼyuk la stakʼbun. Vaʼun, xi la jnope: ‹¿Mi oy sbalil ti ta jpas orasione?›». Ep buchʼutik jech chaʼi sbaik kʼuchaʼal taje xchiʼuk tsjakʼbe sbaik mi oy sbalil ti tspasik orasione.
Pe li yantike oy to yan srasonal yuʼunik ti kʼu yuʼun muʼyuk sbalil chilik ti tspasik orasione. Junantike chalik ti snaʼoj xa skotol li Diose, ti snaʼoj xa skotol li jvokoltike xchiʼuk li kʼusi chtun kuʼuntike. Jaʼ yuʼun, tsnopik ti mu xa persauk ti xalbeik li kʼusitik tsnuptanike.
Jech xtok, li jlome tsnopik ti mu skʼan xchikintabat s-orasionik yuʼun Dios ta skoj li kʼusi chopol toʼox spasojike. Xi chal li Jennie: «Li kʼusi vokol chkaʼie jaʼ ti mu kʼusi xitun-o yaʼeluke. Oy kʼusitik jpasoj ti chopol chkaʼi jba yuʼune, jaʼ yuʼun mu jta-o chkaʼi ti xchikintabun jkʼop li Diose».
Li voʼote, ¿kʼusi chanop? ¿Mi oy jech ajakʼojbe aba ek ta sventa li orasione? Mi jaʼ jeche, xuʼ me xatabe stakʼobil ta Vivlia li kʼusitik chajakʼbe abae. Xuʼ me xachʼun ti melel li kʼusi chal Vivlia ta sventa li orasione. * Tskoltaot yoʼ xavaʼibe smelolal li sjakʼobiltak liʼe:
-
¿Mi ta melel chchikinta j-orasiontik li Diose?
-
¿Kʼu yuʼun muʼyuk tstakʼ junantik orasion li Diose?
-
¿Kʼu yelan skʼan jkʼopontik Dios yoʼ xaʼibutike?
-
¿Kʼuxi xuʼ skoltaot li orasione?
^ par. 9 Li ta Vivliae, chalbe skʼoplal kʼu yelan la spasik orasion li yajtuneltak Dios ta voʼnee, ti te kapal skʼoplal junantik ek li orasion la spas Jesuse. Li ta Tsʼibetik ta Ebreo Kʼope, ti ojtikinbil xtok kʼuchaʼal Pokoʼ Testamentoe, xuʼ te jtatik mas ta 150 orasionetik.
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Mi tstakʼ j˗orasiontik li Diose?
Li kʼusitik skʼan jpastik sventa stakʼ j˗orasiontik li Diose.
LI KʼUSITIK TSJAKʼ KEREM TSEBETIKE
¿Kʼu yuʼun tsots skʼoplal ti jpastik orasione?
¿Mi jaʼ noʼox sventa junuk koʼontontik ti ta jpastik orasione?
