¿Mi chchikinta j-orasiontik li Diose?
¿Mi oy jech ajakʼojbe aba liʼe: «Mi chchikinta j-orasion li Diose»? Mu atukuk mi jech chajakʼbe abae. Ep buchʼutik tskʼanbeik koltael Dios kʼalal tsnuptan svokolike. Akʼo mi jech, muʼyuk chʼayem li svokolike. ¿Mi jaʼ skʼan xal ti muʼyuk tstsak ta venta j-orasiontik li Diose? Mu jechuk. Li Vivliae chal ti chchikinta j-orasiontik mi jech ta jkʼopontik kʼuchaʼal tskʼan yoʼontone. Jkʼeltik batel kʼusi chal.
CHCHIKINTA KAʼYEJTIK LI DIOSE
«Voʼot ti chachikinta orasione, buchʼuuk noʼox krixchanoal chtal ta atojolal» (Salmo 65:2).
Junantik krixchanoetike tspasik orasion sventa junuk yoʼonton xaʼi sbaik akʼo mi tsnopik ti muʼyuk buchʼu chchikintabatike. Pe li orasione maʼuk noʼox sventa jun koʼontontik yuʼun kʼalal chkil jvokoltike. Xi tspat koʼontontik li Vivliae: «Li Jeovae * nopol oy ta stojolal skotol li buchʼutik tskʼanbeik vokole, skotol li buchʼutik tskʼanbeik vokol ta melele [...]; chchikintabe kʼalal xvokolet tskʼanik koltaele» (Salmo 145:18, 19).
Jaʼ yuʼun, li buchʼutik chichʼik ta mukʼ li Jeovae xuʼ spat yoʼontonik ti ch-aʼibat li s-orasionike. Xi chalbutik ta slekil yoʼontone: «Chatalik, chakʼanbeikun vokol xchiʼuk chataikun ta kʼoponel, vaʼun ta jchikintaboxuk» (Jeremias 29:12).
LI DIOSE TSKʼAN TI XAKʼOPONE
«Pasilanik-o me orasion» (Romanos 12:12).
Li Vivliae tstij koʼontontik ti jpasilantik orasion skotol orae. Ta melel, li Jeovae tskʼan ti jkʼopontike (Mateo 26:41; Efesios 6:18).
¿Kʼu yuʼun tskʼan ti xakʼopon li Diose? Nopbo skʼoplal liʼe: ¿kʼu yelan chaʼi sba jun totil kʼalal xi ch-albat yuʼun jun yuni tseb o yuni kereme: «Koltaun, tot»? Li totile xuʼ van snaʼoj xa li kʼusi chtun yuʼun li yuni nichʼone o ti kʼu yelan chaʼi sbae, pe kʼalal chaʼi li kʼusi chlokʼ ta yee, li totile chakʼ venta ti spatoj yoʼonton ta stojolale xchiʼuk ti kʼanbile. Jaʼ jech ek kʼalal ta jkʼopontik li Jeovae, yuʼun chkakʼbetik yil ti jpatoj koʼontontik ta stojolale xchiʼuk ti ta jkʼan chijnopaj ta stojolale (Proverbios 15:8; Santiago 4:8).
OYOT TA YOʼONTON LI DIOSE
«Akʼbeik me sbain skotol li kʼusi chavul-o avoʼontonike, yuʼun oyoxuk ta yoʼonton» (1 Pedro 5:7).
Li Diose tskʼan ti jkʼopontike, yuʼun skʼanojutik xchiʼuk oyutik ta yoʼonton. Yakʼoj venta ti oy jvokoltike xchiʼuk tskʼan tskoltautik.
Li ajvalil Davide la skʼanbe koltael Jeova ta sjunul xkuxlejal, la xchapbe li kʼusi tsnope xchiʼuk ti kʼu yelan chaʼi sbae (Salmo 23:1-6). Li Diose, ¿kʼu yelan laj yil li Davide? Skʼanoj tajek xchiʼuk la xchikintabe skotol li s-orasione (Echos 13:22). Li Dios eke chchikintabutik kʼalal ta jkʼopontike, yuʼun oyutik ta yoʼonton.
«JKʼANOJ LI JEOVAE, YUʼUN CHCHIKINTA LI YECHʼOMAL KEE»
Taje jaʼ jech chal jun salmo ta Vivlia. Li jtsʼibajome spatoj yoʼonton ti ch-aʼibat s-orasion yuʼun li Jeovae, taje jaʼ koltaat-o. Mas nopol laj yaʼi sba ta stojolal Dios xchiʼuk akʼbat yipal sventa stsal li kʼusi toj tsots la snuptan ta xkuxlejale (Salmo 116:1-9).
Mi jpatoj koʼontontik ti chchikintabutik j-orasiontik li Diose, muʼyuk chkikta jbatik ta spasel. Jkʼeltik kʼusi la snuptan jun vinik ta snorteal España ti Pedro sbie. Li skerem ti 19 sjabilale cham ta jun aksidente. Kʼalal jech la snuptane, li Pedroe laj yalbe Dios ti kʼu yelan chaʼi sbae xchiʼuk ep ta velta laj yalbe ti xpatbat yoʼontone xchiʼuk ti xkoltaate. ¿Kʼusi kʼot ta pasel? Xi chal li Pedroe: «La stakʼbun j-orasion li Jeovae. Yuʼun la stunes yan jchʼunolajeletik sventa spat koʼontonkutik xchiʼuk li kajnile xchiʼuk ti skoltaunkutike».
Ep ta veltae, li stakʼobil j-orasiontike jaʼ te chlik talel ta stojolal li kamigotaktike.
Akʼo mi muʼyuk chaʼkuxi li skeremike, li Pedro xchiʼuk yutsʼ yalale toj ep koltaatik kʼalal la spasik orasione. Li yajnil ti María del Carmen sbie xi chvul ta sjole: «Li orasione jaʼ la skoltaun sventa mu slajesun li at-oʼontone. Jnaʼoj ti xaʼibe smelolal li Jeovae, yuʼun kʼalal ta jkʼopone, jun koʼonton chikom yuʼun».
Li kʼusi chal Vivlia xchiʼuk li kʼusi yiloj ta xkuxlejal junantike chakʼ ta ilel ti chchikinta j-orasiontik li Diose. Akʼo mi jech, muʼyuk tstakʼ skotol orasion li Diose. ¿Kʼu yuʼun mu skotoluk velta chchikinta orasion li Diose?
^ par. 5 Li sbi Diose jaʼ Jeova (Salmo 83:18).
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Mi tstakʼ j˗orasiontik li Diose?
Li kʼusitik skʼan jpastik sventa stakʼ j˗orasiontik li Diose.
LI KʼUSI BAʼYEL SKʼAN JCHANTIK TA VIVLIAE
¿Mi ta xaʼi skotol orasionetik li Diose?
¿Mi lek van ti jaʼ noʼox tskʼan ta s-orasion li kʼusi tskʼan yoʼonton stuk li jun krixchanoe? ¿Mi chchikintabat yuʼun Dios li jun vinik ti chilbajin yajnile?
KʼUSITIK TSJAKʼIK TA SVENTA VIVLIA
¿Mi chaʼibutik Dios kʼalal ta jkʼanbetik koltaele?
¿Mi ta melel tskʼan tskoltautik Dios kʼalal chkil jvokoltike?
