1. ¿Kʼusi ti stuk xa noʼox jech jtaojtike?

¡STUK xa noʼox jech ti liʼ oyutik ta steklumal Jeovae! Xkoʼolaj ti ta paraiso xa oyutike, yuʼun jun noʼox koʼontontik jkotoltik xchiʼuk xijmuyubaj noʼox. Pe ¿kʼuxi xuʼ xijkoltavan ta jujuntal li ta tsobobbaile?

2. ¿Kʼusi skoʼoltasobil la stunes Pablo li ta skartatake?

² Li ta skartatak la stsʼiba li jtakbol Pabloe, la stunes jun skoʼoltasobil ti oy kʼusitik chakʼ jchantik ta sventa taje. Laj yal ti xkoʼolaj ta bekʼtalil li tsobobbaile xchiʼuk ti jaʼik sts’akbenaltak bekʼtalil li buchʼutik te chkʼotike (Rom. 12:4-8; 1 Kor. 12:12-27; Efes. 4:16).

3. ¿Kʼusi oxtos ta jkʼelbetik skʼoplal li ta xchanobil liʼe?

³ Li ta xchanobil liʼe, ta jkʼeltik oxtos kʼusi chakʼ jchantik li skoʼoltasobil laj yal Pabloe. Baʼyel, ta jkʼeltik ti oy jbaliltik ta jujuntal li ta tsobobbaile. * Xchibal, ta jkʼeltik kʼusi xuʼ jpastik mi muʼyuk jbalil chkaʼitik li ta tsobobbaile. Yoxibal, ta jkʼeltik kʼu yuʼun skʼan xkakʼ ta koʼontontik spasel li kʼusi yakʼoj ta jbatik Jeovae.

4. ¿Kʼusi chakʼ kiltik li kʼusi chal Romanos 12:4 xchiʼuk 5?

⁴ ¿Kʼusi chakʼ jchantik li skoʼoltasobil laj yal Pabloe? Jaʼ ti oy jbaliltik ta jujuntal li ta yutsʼ yalal Jeovae. Xi laj yalbe  skʼoplal li Pabloe: «Ep ta tos stsʼakalul li jbekʼtaltike, akʼo mi jech, mu parejouk yabtelik jujutos, jaʼ jechutik ek, akʼo mi eputik, jun noʼox jbekʼtaltik ta skoj ti jmoj oyutik xchiʼuk Kristoe, jmoj jtsʼakoj jbatik ta jujuntal» (Rom. 12:4, 5). ¿Kʼusi smelolal li kʼusi laj yal Pabloe? Jaʼ ti jkotoltik oy jbaliltik mu ventauk li kʼusitik ta jpastik ta tsobobbaile.

5. ¿Kʼusi «matanal» yakʼoj Jeova li ta tsobobbaile?

⁵ Kʼalal ta jnopbetik skʼoplal li buchʼutik oy sbalil ta tsobobbaile, ta anil noʼox van chtal ta joltik ti jaʼik li ermanoetik ti tsbeiltasutike (1 Tes. 5:12; Ebr. 13:17). Li Jeovae stunesoj tal Jesus sventa svaʼan «viniketik jech kʼuchaʼal matanal» li ta tsobobbaile (Efes. 4:8). Taje jaʼik li buchʼutik chtunik ta Jtsop Jbeiltasvanej xchiʼuk li yajkoltaobbatake, li buchʼutik chtunik ta Komite sventa Betel, jkʼelvanejetik ta sirkuito, jchanubtasvanejetik ta chanob vunetik sventa Vivlia, moletik xchiʼuk li siervo ministerialetike. Li ermanoetik taje yichʼojik tʼujel ta chʼul espiritu sventa xchabibeik li yuni chijtak Jeovae xchiʼuk ti stsatsubtasik li tsobobbaile (1 Ped. 5:2, 3).

6. Jech kʼuchaʼal chal 1 Tesalonisenses 2:6 kʼalal ta 8, ¿kʼusi yakʼoj yipik spasel li buchʼutik tsbeiltasutike?

⁶ Li ermanoetike chichʼik tʼujel ta chʼul espiritu sventa sbainik spasel jeltos abtelaletik. Li kok jkʼobtik xchiʼuk li junantik stsʼakbenaltak jbekʼtaltike oy kʼusitik tspas ti tstabe sbalil sjunul li jbekʼtaltike. Jaʼ jech ek li ermanoetik ti yichʼojik tʼujele, yuʼun oy kʼusitik tspasik ti tstabeik sbalil sjunul li tsobobbaile. Pe mu skʼanik ichʼel ta mukʼ, yuʼun chakʼ yipik sventa spatbeik yoʼonton li ermanoetike xchiʼuk ti stsatsubtasike (kʼelo 1 Tesalonisenses 2:6-8). Ta jtojbetik tajek ta vokol Jeova ti yakʼoj ta yoʼontonik skoltael yantik li vaʼ ermanoetike.

7. ¿Kʼusitik lek tskʼupinik li prekursoretik xchiʼuk misioneroetike?

⁷ Xuʼ van oy misioneroetik, prekursor espesialetik o prekursor regularetik li ta jtsobobbailtike. Li ta spʼejel balumile, oy ermanoetik xchiʼuk ermanaetik ti chtunik ta tsʼakal ora sventa xcholik mantal xchiʼuk ti spasik ta yajtsʼaklom Kristo li krixchanoetike. Ta skoj taje, ep buchʼutik skoltaojik yoʼ x-ochik ta mantal. Akʼo mi jutuk kʼusi x-ayan yuʼunik li ermanoetik taje, li Jeovae ep kʼusitik yakʼojbe skʼupinik (Mar. 10:29, 30). Ep tajek sbalil chkaʼitik xchiʼuk kichʼojtik ta kʼux ti te jchiʼuktik li vaʼ ermanoetike.

8. ¿Kʼu yuʼun ep sbalil chil Jeova li jcholmantaletike?

⁸ Pe ¿mi jaʼ noʼox oy sbalilik ta tsobobbail li ermanoetik ti yichʼojik tʼujel ta chʼul espiritu xchiʼuk li buchʼutik chtunik ta tsʼakal orae? Mu jechuk. Ep sbalilik ta tsobobbail ek li jcholmantaletike xchiʼuk tsots skʼoplal ch-ilatik yuʼun li Jeovae (Rom. 10:15; 1 Kor. 3:6-9). ¿Kʼu yuʼun? Yuʼun jtos abtelal chichʼ pasel ta tsobobbail ti tsots skʼoplale jaʼ ti jpastik ta yajtsʼaklom Kristo li krixchanoetike (Mat. 28:19, 20; 1 Tim. 2:4). Jaʼ jech yakʼoj ta yoʼontonik spasel skotol li jcholmantaletike akʼo mi yichʼojik voʼ o mi muʼyuk (Mat. 24:14).

9. ¿Kʼu yuʼun ep sbalil chkiltik li ermanaetike?

⁹ Li ermanaetik eke ep sbalil ch-ilatik yuʼun Jeova li ta tsobobbaile. Kʼux ta yoʼonton li ajnilaletike, li meʼiletike, li buchʼutik chamem smalalike xchiʼuk li tojol tsebetik ti tukʼ chtunik ta stojolale. Li Vivliae chalbe skʼoplal jayvoʼuk antsetik  ti lek ilatik yuʼun Dios ta skoj ti laj yakʼ ta ilel spʼijilik, xchʼunel yoʼontonik, lek baxbolik, tsots yoʼontonik, lek snaʼ xtʼolbijik xchiʼuk ti la skoltaik yantike (Luk. 8:2, 3; Ech. 16:14, 15; Rom. 16:3, 6; Filip. 4:3; Ebr. 11:11, 31, 35). Ta jtojbetik tajek ta vokol Jeova ti oy ermanaetik ti jaʼ jech chakʼ ta ilel stalelalik xchiʼuk ti te jchiʼuktik ta tsobobbaile.

10. ¿Kʼu yuʼun ep sbalil chkiltik li ermanoetik ti ep xa sjabilalike?

¹⁰ Xijmuyubaj tajek xtok ti te jchiʼuktik ta tsobobbail ermanoetik ti ep xa sjabilalike. Junantike ta sbikʼtalik onoʼox ti tukʼ tunemik tal ta stojolal Jeovae. Yantik xtoke jaʼtik to van ochik tal ta mantal. Pe xuʼ van muʼyuk xa yipalik, xlik xkaj noʼox xchamelik xchiʼuk mu xa van epuk kʼusi spas yuʼunik li ta tsobobbail xchiʼuk ta cholmantale. Akʼo mi jech, chakʼik persa sventa xcholik mantal, ti spatbeik yoʼonton yantik xchiʼuk ti xchanubtasike. ¡Toj ep kʼusi xuʼ jchantik ta stojolalik! Ep tajek sbalil chkiltik li ermanoetik taje xchiʼuk jaʼ jech ch-ilatik yuʼun li Jeova eke (Prov. 16:31).

11, 12. ¿Kʼu yelan chavil li kʼusi tspas kerem tsebetik ta atsobobbaile?

¹¹ Kalbetik skʼoplal ek li kerem tsebetike. Ta skoj ti jaʼ sventainoj balumil li Satanase xchiʼuk ti oy kʼusitik chopol tspukbe skʼoplale, mu kʼunuk chaʼiik li kuxlejale (1 Juan 5:19). Pe kʼupil sba ta kʼelel ti chakʼ sloʼilik ta tsobajeletik, ti chlokʼik ta cholmantal xchiʼuk ti ta sjunul yoʼonton tspakbeik skʼoplal li kʼusi xchʼunojike. Kerem tsebetik, toj ep abalilik li ta tsobobbaile (Sal. 8:2).

¹² Junantik ermanoetik xchiʼuk ermanaetike vokol chaʼiik xchʼunel ti oy sbalilik li ta tsobobbaile. ¿Kʼusi xuʼ skoltautik mi jaʼ jech chkaʼi jbatike? Jkʼeltik batel.

13, 14. ¿Kʼu yuʼun xuʼ van muʼyuk sbalil chaʼiik junantik li ta tsobobbaile?

¹³ ¿Kʼusi yan chakʼ jchantik li skoʼoltasobil laj yal Pabloe? Chakʼ kiltik ti ep buchʼutik  vokol chaʼiik xchʼunel ti oy sbalilik li ta tsobobbaile. Xi laj yal li Pabloe: «Ti xiuk chal li kakantike: ‹Muʼyuk bu te tsakal jkʼoplal ta bekʼtalil ta skoj ti maʼuk kʼobilune›, taje maʼuk skʼan xal ti mu xa bu te tsakal li ta jbekʼtaltike. Xchiʼuk ti xiuk chal li jchikintike: ‹Muʼyuk bu te tsakal jkʼoplal ta bekʼtalil ta skoj ti maʼuk satilune›, taje maʼuk skʼan xal ti mu xa bu te tsakal li ta jbekʼtaltike» (1 Kor. 12:15, 16). ¿Kʼusi chakʼ jchantik taje?

¹⁴ Mi ta jkoʼoltas jbatik xchiʼuk yan ermanoetike, xuʼ xlik jnoptik ti muʼyuk jbaliltike. Junantik ermanoetike lek xtojobik ta chanubtasvanej, ta xchapanel li kʼusitik chichʼ pasele o ta spatbel yoʼonton yantik. Xuʼ van xi ta jnoptike: «Yaʼ, mu spas kuʼun jech leʼe». Taje chakʼ ta ilel ti bikʼit kakʼoj jbatike xchiʼuk ti jnaʼojtik ti oy kʼusi mu spas kuʼuntike (Filip. 2:3). Pe skʼan me xkichʼ jpʼijiltik, yuʼun mi jaʼ noʼox ta jkoʼoltas jbatik xchiʼuk yantik ta skoj li kʼusi xtojobik spasele, chijchibaj-o. Jech kʼuchaʼal laj yal li Pabloe, xuʼ van xi ta jnoptike: «Jecheʼ noʼox chimakvan li ta tsobobbaile». ¿Kʼusi xuʼ skoltautik sventa mu jechuk jnoptike?

15. ¿Kʼusi chakʼ kiltik 1 Korintios 12:4 kʼalal ta 11 mi oy kʼusi xijtojob spasele?

¹⁵ Kalbetik skʼoplal li ermanoetik ta baʼyel sigloe. Junantike akʼbatik chʼul espiritu sventa oyuk kʼusi spasik, pe mu parejouk li kʼusi akʼbat spasike (kʼelo 1 Korintios 12:4-11). Akʼo mi jeltos kʼusi akʼbat spasik yuʼun li Jeovae, oy sbalilik ta jujuntal. Avie, muʼyuk xa kʼusi ta jpastik ta skʼelobil juʼelal, pe oy kʼusi ti muʼyuk jelem-oe: akʼo mi mu van koʼoluk kʼusi xijtojob spasel, jkotoltik oy jbaliltik ta sat li Jeovae.

16. ¿Kʼusi laj yal Pablo ti skʼan jtsaktik ta ventae?

¹⁶ Mu jkoʼoltas jbatik xchiʼuk li ermanoetike, jaʼ lek jtsaktik ta venta li kʼusi laj yal Pablo liʼe: «Ta jujuntal kʼelo abaik ta skoj li kʼusi chapasike, vaʼun oy srasonal sventa xkuxet noʼox avoʼontonik atukik, maʼuk xamuyubajik ta skoj ti  chakoʼoltas abaik xchiʼuk li yantike» (Gal. 6:4).

17. ¿Kʼuxi tskoltautik mi la jchʼuntik li kʼusi laj yal Pabloe?

¹⁷ Mi ta jchʼuntik li kʼusi laj yal Pabloe xchiʼuk mi ta jkʼeltik li kʼusitik ta jpastike, xuʼ van xkakʼtik venta ti oy kʼusi xijtojob spasel eke. Jech kʼuchaʼal liʼe, xuʼ van jun mol ta tsobobbaile mu xtojob lek ta yetʼesel mantal li ta tsobajeletike, pe xtojob lek ta xchanubtasel li yan krixchanoetike. O xuʼ van mu xtojob lek xchapanel li kʼusitik chichʼ pasel kʼuchaʼal li yan moletik ta stsobobbaile, pe toj lek yoʼonton, jaʼ yuʼun li ermanoetike muʼyuk chiʼik ta skʼanbel koltael. O xuʼ van ojtikinbil ti toj lek snaʼ xchʼamvane (Ebr. 13:2, 16). Kʼalal chkakʼtik venta li kʼusi xijtojob spasele, xijmuyubaj noʼox ta jkolta jbatik li ta tsobobbaile. Jech xtok, muʼyuk ta xkitʼixtatik li ermanoetik ti oy kʼusi yan xtojobik spasele.

18. ¿Kuxi xuʼ xijtojob mas ta spasel li kabteltike?

¹⁸ Mu ventauk kʼusi jbainojtik li ta tsobobbaile, jkotoltik skʼan xkakʼtik persa sventa xijtojob mas ta cholmantal xchiʼuk ta chanubtasvanej. Jaʼ yuʼun, li Jeovae tstunes s-organisasion sventa xchanubtasutik. Jech kʼuchaʼal li ta tsobajeletik ta xokol kʼakʼale, chkichʼtik chanubtasel kʼuxi xuʼ xijtojob mas ta spasel li kabteltike. ¿Mi yakal xa ta jpastik li kʼusi chkichʼtik chanubtasel ta tsobajele?

19. ¿Kʼusi xuʼ jpastik sventa xijbat li ta chanob vun sventa j-al lekil aʼyejetike?

¹⁹ Yan xtok ti bu xuʼ xkichʼtik chanubtasele jaʼ li ta Chanob vun sventa j-al lekil aʼyejetik yuʼun Ajvalilal yuʼun Diose. Xuʼ xbatik ermanoetik xchiʼuk ermanaetik ti yakal chtunik ta tsʼakal ora xchiʼuk ti yichʼojik 23 jabil kʼalal ta 65 jabile. Pe xuʼ van chkaltik ti mu jtatike. Mu jcholtik ta alel ti kʼu yuʼun mu xuʼ jtatike, jaʼ lek jcholbetik srasonal ti kʼu yuʼun ta jkʼan chijbatutike. Laje, jkʼeltik kʼusitik xuʼ jpastik sventa jtatik xchiʼuk kakʼtik persa spasel. Vaʼun, tskoltautik Jeova yoʼ jtatik li kʼusi mu toʼox spas kuʼuntik yilele.

20. ¿Kʼusi chakʼ jchantik li Romanos 12:6 kʼalal ta 8?

²⁰ Li yoxtosal kʼusi chakʼ jchantik li skoʼoltasobil laj yal Pabloe te ta jtatik ta Romanos 12:6 kʼalal ta 8 (kʼelo). Li jtakbole chchaʼal ti jelajtik kʼusi xijtojob spasel li ta tsobobbaile. Pe jaʼ xa mas chal ti jtunestik li kʼusi xijtojob spasel sventa jpatbetik yoʼonton li ermanoetik xchiʼuk ti jtsatsubtastike.

21, 22. ¿Kʼusi chakʼ jchantik li kʼusi kʼot ta stojolal Robert xchiʼuk Felice?

²¹ Kalbetik skʼoplal kʼusi kʼot ta stojolal jun mol ta tsobobbail ti Robert * sbie. Chtun toʼox ta yan lum, pe laj yichʼ takel sutel ta slumal sventa xtun ta Betel. Akʼo mi laj yichʼ albel ti maʼuk ta skoj ti oy kʼusi chopol la spase, xi laj yale: «Oy jayibuk u laj kat tajek koʼonton, yuʼun la jnop ti muʼyuk lek la jpas kabtele. Oy jayibuk velta ti ta jkʼan ox chkikta komel li Betele». ¿Kʼusi koltaat yoʼ xmuyubaj yan veltae? Xi albat yuʼun jun mol ta tsobobbaile: «Li kʼusi yakʼoj xa jchantik Jeova ti bu tunemutike jaʼ tskoltautik sventa masuk to lek jpas kabteltik ti bu chijtun avie». Li Roberte laj yaʼibe smelolal ti skʼan mu xa snopbe skʼoplal li kʼusi tspas  toʼoxe xchiʼuk ti jaʼuk xa xakʼ ta yoʼonton li kʼusi xuʼ spas ta orae.

²² Jaʼtik jech la snuptan ek li ermano Felice Epíscopo. Li ta 1956, nel xchanunik ta Galaad xchiʼuk li yajnile xchiʼuk tunik ta jkʼelvanej ta sirkuito li ta Boliviae. Li ta 1964, vokʼ jun skeremik. Xi laj yal li Felice: «Vokol tajek laj kaʼikutik ti xkiktakutik komel ti bu toʼox chitunkutike. Jamal chkal ti la jvul tajek koʼonton te van junuk jabile. Pe la skoltaun Jeova sventa jel ti kʼu yelan chkaʼi jbae xchiʼuk jaʼ xa laj kakʼ ta koʼonton li kʼusi yan la jbain ta skoj ti oy xa jun jkereme». ¿Mi jaʼ jech chkaʼi jbatik kʼuchaʼal li Robert o Felice? ¿Mi ta jvul koʼontontik ta skoj ti maʼuk xa ta jpastik li kʼusi jbainojtik toʼoxe? Mi jaʼ jech chkaʼi jbatike, jaʼuk jnopbetik skʼoplal li kʼusi xuʼ jpastik avi sventa xijtun ta stojolal Jeova xchiʼuk ta stojolal li kermanotaktike, vaʼun xijmuyubaj noʼox. Oyuk noʼox kʼusi jpastik xchiʼuk jtunestik li kʼusi xijtojob spasel sventa jkoltatik li yantike. Vaʼun, xkuxet noʼox koʼontontik kʼalal ta jpatbetik yoʼonton li ermanoetike.

23. 1) ¿Kʼusi skʼan jchʼakbetik yorail? 2) ¿Kʼusi ta jkʼeltik li ta yan xchanobile?

²³ Li Jeovae toj ep sbalil chil ta jujuntal li yajtuneltake. Oy ta yoʼonton ti xijkʼot ta yutsʼ yalale. Mi la jchʼakbetik yorail sventa jnopbetik skʼoplal kʼusi xuʼ jpastik yoʼ jpatbetik yoʼonton li ermanoetike xchiʼuk mi laj kakʼtik persa spasele, ta van xkiltik ti ep jbaliltik li ta tsobobbaile. Pe ¿kʼu yelan chkiltik li yantike? ¿Kʼuxi xuʼ xkakʼtik ta ilel ti chkichʼtik ta mukʼe? Jaʼ chkalbetik skʼoplal li ta yan xchanobile.