KʼALAL tstakbot tal jlikuk karta junuk avamigo ti lek tajek tsʼibabil xchiʼuk ti spat oʼontonale, ¿kʼu yelan chavaʼi aba yuʼun? Li jtakbol Pabloe jaʼ jech la stakbe batel jlik karta li Timoteoe. Li karta taje te tsʼibabil kom ta Vivlia, jaʼ li 2 Timoteoe. Li Timoteoe tskʼan tsnaʼ li kʼusi la stsʼiba talel li yamigoe, jaʼ yuʼun xuʼ van oy ta yoʼonton xbat ti bu lek noʼox tsʼijile. Xuʼ van xi tsjakʼbe sba li Timoteoe: «¿Kʼu van yelan oy li Pabloe? ¿Mi oy van junuk tojobtasel xuʼ xalbun sventa xkʼel kuʼun li kʼusi jbainoje? Li skartae, ¿mi tskoltaun van sventa mas to lek jpasbe li yabtel Diose xchiʼuk sventa jkolta li yantike?». Li kʼusitik tsjakʼbe sbae te la stabe stakʼobil li ta kartae xchiʼuk stakʼobil yan kʼusitik. Jkʼeltik batel junchibuk li kʼusitik lekik laj yal li jtakbol Pabloe.

Kʼalal lik skʼel karta li Timoteoe, te laj yakʼ venta ti lek kʼuxubinbil yuʼun li Pabloe. Albat «ti jaʼ jun kʼanbil nichʼonile» (2 Tim. 1:2). Akʼo mi mas xa ox jutuk ta 30 sjabilal Timoteo kʼalal laj yichʼ li kartae, ti tetik van ta sjabilal 65, jal xa ox tunem talel kʼuchaʼal mol ta tsobobbail. Mas ta lajuneb jabil jmoj abtejik xchiʼuk ep kʼusi la xchan ta stojolal li jtakbol Pabloe.

Ta skoj ti kuch batel yuʼun prevaetik li Pabloe, xuʼ jchʼuntik ti patbat-o yoʼonton li Timoteoe. Yuʼun te tikʼil ta chukel ta Roma li jtakbole xchiʼuk poʼot xa ox xichʼ milel (2 Tim. 1:15, 16; 4:6-8). Li Timoteoe laj yakʼ venta ti tsots lek yoʼonton li Pabloe, yuʼun xi la stsʼibae: «Yakal ta jtsʼik-o skotol» (2 Tim. 2:8-13). Ti kʼu yelan kuch batel yuʼun li Pabloe la stsatsubtas li Timoteoe xchiʼuk jaʼ jech xuʼ stsatsubtasutik ek.

Li Pabloe la stijbe yoʼonton Timoteo sventa tsotsuk skʼoplal xil li spasbel yabtel Diose. Xi laj yalbee: «Ta jvules ta ajol ti ta sjunuluk avoʼonton xatunes li matanal yakʼoj Dios ti la [atae]» (2 Tim. 1:6). Kʼalal «matanal» xie, li Pabloe la stunes jpʼel kʼop ta griego ti khárisma skʼan xale. Li jpʼel kʼop taje jaʼ skʼan xal kʼalal oy kʼusi chkichʼtik akʼbel ta motone, ti mu jtatik-oe xchiʼuk ti mu kʼusi jpasojtik sventa xkichʼtik akʼbele. Taje jaʼ jech kʼot ta stojolal Timoteo kʼalal laj yichʼ tʼujel sventa xichʼ akʼbel jtos moton li ta tsobobbaile (1 Tim. 4:14).

¿Kʼu yelan skʼan stunes li matanal akʼbat Timoteoe? Kʼalal chal «xatunes li matanal yakʼoj Dios» xie, li ta griegoe, xi ta xichʼ alele: «Tileso kʼuchaʼal  kʼokʼ li matanal yakʼojbot Diose». Kʼalal mi la skʼel Timoteo li kʼusi la stsʼiba Pabloe, xuʼ van jaʼ chtal ta sjol li kʼokʼ tstsanik ta jujupʼej naetike, ti kʼunkʼun ta xtupʼ batel xchiʼuk ti kʼajomal xa noʼox xupetal ta xkome. Sventa tsakem lek li kʼokʼe xchiʼuk ti xakʼ xkʼixnale, skʼan chuchel. Jun diksionario chal ti jpʼel kʼop ta griego la stunes li Pabloe (anazōpyréō) jaʼ skʼan xal «stsanel yan velta, xchaʼkuxesel», jaʼ xkaltik, li Pabloe yakal chalbe Timoteo ti akʼo yakʼbe yipal li yabtele xchiʼuk ti xmuyubajuk noʼox ta spasele. Xkoʼolaj ti xi albate: «Akʼo ta avoʼonton li avabtele». Jaʼ jech skʼan jpastik li avi eke, skʼan xkakʼbetik yipal sventa xijmuyubaj noʼox ta spasbel li yabtel Jeovae.

Kʼalal la skʼel-o batel skarta Pablo li Timoteoe, te albat li kʼusi xuʼ spas sventa lekuk xbat ta pasel yuʼun li yabtel Diose. Xi la stsʼiba li Pabloe: «Chabio me lek li lekil kʼulejal akʼbil abain ti jaʼ tskoltaot li chʼul espiritu ti oy ta jtojolaltike» (2 Tim. 1:14). ¿Kʼusi jaʼ li kʼulejal oy yuʼun Timoteoe? Ta yan versikuloe, laj xa onoʼox yalbe skʼoplal Pablo li lekil chanubtasele, jaʼ xkaltik, li kʼusitik melel ta jtatik ta Vivliae (2 Tim. 1:13). Ta skoj ti jaʼ jun yajtsʼaklom Kristo li Timoteoe, skʼan xakʼ ta chanel kʼusitik melel, ta spat xchiʼuk ta yut tsobobbail (2 Tim. 4:1-5). Jech xtok, yichʼoj biiltasel kʼuchaʼal mol ta tsobobbail sventa skʼel li xchijtak Diose (1 Ped. 5:2). ¿Kʼuxi xuʼ xchabi li kʼulejal oy yuʼune, jaʼ xkaltik, li kʼusi melel xchanoj ti skʼan xakʼ ta ojtikinele? Jaʼ chkoltaat tal yuʼun li xchʼul espiritu Jeovae xchiʼuk li Skʼope (2 Tim. 3:14-17).

Li voʼotik eke kichʼojtik akʼbel jun kʼulejal, jaʼ li kʼusitik melel jchanojtik ti chkakʼbetik snaʼ li yan krixchanoetike (Mat. 28:19, 20). Skʼan me mu xchʼay ta joltik ti ep tajek sbalil li kʼusitik melel chkakʼtik ta chanele. Sventa taje, skʼan nopoltik noʼox jpastik orasion xchiʼuk jchanilantik-o li Skʼop Diose (Rom. 12:11, 12; 1 Tim. 4:13, 15, 16). Jech xtok, xuʼ van ataoj yan akʼulejal, xuʼ van chatun kʼuchaʼal mol ta tsobobbail o chatun ta tsʼakal ora. Mi jech taje, skʼan me xvinaj ti bikʼit kakʼoj jbatike xchiʼuk ti jpatoj koʼontontik ta stojolal Diose. Jech oxal, sventa jchabitik li jkʼulejaltik taje, skʼan ep sbalil xkiltik xchiʼuk jkʼanbetik koltael li Jeovae.

Li Timoteoe oy to yan smoton staoj: jaʼ ti xchanubtas li yantike. Jech oxal, xi laj yal li Pabloe: «Li kʼusitik laj avaʼi ta jtojolale [...] kʼubanbo tukʼil viniketik, vaʼun jaʼ jech lek chapalik sventa xchanubtasik batel li yantike» (2 Tim. 2:2). Li Pabloe la svulesbe ta sjol Timoteo ti akʼo xchanubtas yantik ta sventa li kʼusi laj xa xchan talele. Li moletik avi eke tsots skʼoplal ti xakʼbeik yipal sventa jechuk spasik li ta tsobobbaile. Jun lekil mol ta tsobobbaile ta xakʼbe yil yantik kʼuxi ta pasel jtosuk abtelal sventa xtojobik spasele. Muʼyuk tsvul yoʼonton mi jaʼ la xchan mas li buchʼu yakal chchanubtase o ti mas to lek xtojob ta spasel jtosuk abtelale. Jaʼ yuʼun, maʼuk noʼox jsetʼ juteb ta xchanubtasvan ta spasel jtosuk abtelal, yuʼun skʼan ti x-ayan spʼijilik xchiʼuk xtojobik snopel stukik li buchʼutik ta xchanubtasane, ti xkʼotik ta yajtsʼaklom Kristo ti yijik ta mantale. Jaʼ jech mas jtunelik ta tsobobbail li «tukʼil viniketik» taje.

Mu ta naʼeteluk ti ep tajek sbalil laj yil Timoteo li karta takbat talel yuʼun Pabloe. Jnopbetik skʼoplal liʼe: li Timoteoe xuʼ van jujulikel xa tskʼel li karta takbat talel yuʼun yamigoe xchiʼuk tsnopilan kʼuxi xuʼ xakʼ ta xkuxlejal li lekil tojobtasel akʼbate.

¿Kʼuxi xuʼ jech jpastik ek? Jaʼ mi ta jchuchbetik siʼil xkaltik li jmotontik yakʼojbutik Diose, ti jchabitik lek li jkʼulejaltike xchiʼuk ti xkakʼbetik yil yantik li kʼusi xijtojob spasele. Kʼalal jech taje, lek tsʼakal ta jpas batel kabteltik jech kʼuchaʼal albat yuʼun Pablo li Timoteoe (2 Tim. 4:5).