Li Diana ti laj xa kalbetik tal skʼoplal li ta xchanobil echʼe jaʼ tsujat-o ta yuchʼel tajek pox kʼalal chat yoʼontone. Li Vivliae muʼyuk chal ti mu stakʼ uchʼel li pox mi ta smelol noʼox chichʼ uchʼele, pe xi chpʼijubtasvane: «Mu me xachiʼin li jyacubeletique» (Proverbios 23:20). Kʼalal ep chichʼ uchʼel poxe xuʼ jaʼ te xichʼ tael tsatsal chamel, xuʼ me muʼyuk xa lek chkil-o jbatik xchiʼuk li yantike xchiʼuk ta smiyonal noʼox krixchanoetik chchamik-o ta anil. Ti skotoluk krixchanoetik xchʼunik li lekil tojobtaseletik ta Vivliae, muʼyuk bu jech chkʼot ta pasel ti jechuke.

Jaʼ jech la spas li Dianae, yuʼun xi laj yale: «Laj kakʼ venta ti maʼuk chakʼbun jun oʼontonal kʼalal chkuchʼ poxe. Laj kakʼ ta jkuxlejal li lekil tojobtasel ta Filipenses 4:6, 7 ti xi chale: ‹Mu me kʼusi xavul-o avoʼontonik jsetʼuk, jaʼ lek [...] akʼbeik snaʼ Dios li kʼusi chakʼanike›. Skotol akʼobal kʼalal ep kʼusitik chtal ta jnopbene, ta jkʼopon Jeova xchiʼuk chkalbe ti kʼu yelan chkaʼi jbae: ti oy skʼakʼal koʼontone, ti kʼux chkaʼi li kʼusi kʼot ta jtojolale, ti mu xa jnaʼ kʼusi ta jpase xchiʼuk la jkʼanbe ti akʼo lekuk li kʼusitik ta jnope o ti ximuyubajuk noʼoxe. Ta yokʼomale chkakʼ persa ti muʼyukuk xa ta jnop li kʼusitik muʼyuk toʼox lek chkaʼi jba yuʼune. Li spasel orasione jaʼ la skoltaun yoʼ jaʼ uk xkakʼ ta koʼonton li kʼusitik oy kuʼune maʼuk li kʼusitik muʼyuk kuʼune. La jnop ti muʼyuk xa chkuchʼ-o li poxe, yuʼun oy tajek sbalil chkil li jun  oʼontonal jtaoje xchiʼuk ta jkʼan ti jechuk-o jun koʼontone».

Li mulivajele jaʼ mas chakʼ vokolil ti jaʼ mu sta jech kʼalal oy kʼusitik yan ta jnuptantike. Pe li beiltaseletik ta Vivliae tskoltautik yoʼ mu jpastik li kʼusitik chakʼ-o jvokoltike, jech kʼuchaʼal li sloʼlael jolil o li skʼelel pornografiae. Xi laj yal jun kerem ti Samuel sbie: «Li sloʼlael jolile toj kʼun ta pasel, yuʼun akʼo mi muʼyuk bu lek chkil li jun tsebe pe kʼalal chkakʼ venta ti lek chilune, taje jaʼ toj kʼupil sba». Ta tsʼakale, albat skʼoplal ti toj echʼem sloʼla jolile akʼo mi mu yolbajuk jech tspas, pe ta skoj ti jech ch-albat skʼoplale lik xa spas ta melel, li sjol yoʼontone ch-albat ti muʼyuk lek ti jech tspase. Xi to chal li Samuele: «Li sloʼlael jolile toj ven chopol yuʼun jaʼ xa noʼox chbat ta koʼontontik saʼel li kʼusi ta jkʼan jtuktike».

Li Samuele la xchan jun mantal ta Internet ta jw.org ta sventa li kerem tsebetike. Xchiʼuk la snopbe skʼoplal li Proverbios 20:11 ti xi chale: «Li jun quereme xuʼ chichʼ otquinel ta sventa cʼusitic tspas, me lec me mu lecuc stalel». ¿Kʼuxi koltaat-o li tojobtasel taje? Li Samuele laj yakʼ venta ti muʼyuk lek ti kʼalal chichʼ loʼlael jolile. Xi to laj yale: «La kakʼ venta ti kʼalal oy buchʼu jech tspase muʼyuk chkʼot ta jun lekil malalil xchiʼuk la jnop ti kʼu van yelan chaʼi sba kajnil mi la jsaʼ ta tsʼakal ti mi chilun ta jloʼlabe sjol yan tsebe, taje toj echʼ noʼox chopol. Akʼo mi kʼun ta pasel li sloʼlael jolile, maʼuk jaʼ skʼan xal ti toj leke». La sjel stalelal li Samuele, taje jaʼ koltae-o yoʼ mu spas li tsatsal mulile.

Li kʼusi tsnuptan Antonioe mas to toj vokol yuʼun nopem xaʼi skʼelel pornografia. Akʼo mi skʼanoj tajek li yajnile, jech-o tskʼel batel li pornografiae. Xvul to ta sjol ti jaʼ koltaat li tojobtasel ta jtatik ta 1 Pedro 5:8 ti xi chale: «¡Oyuk-o me lek achʼulelik, vikʼiluk me lek asatik! Li avajkontraik, ti jaʼ li Diabloe, te xjoyet kʼuchaʼal jkot leon ti x-avete, yuʼun tskʼan oy buchʼu tsbikʼ». Xi chal li Antonioe: «Ta buyuk xa noʼox xuʼ jkʼeltik li lokʼoletik sventa pornografiae, ti xuʼ van te chkom-o ta joltike. Li versikulo taje jaʼ la skoltaun ta snopel ti bu likem tal li loʼlaele. Skʼan xkakʼ persa yoʼ mu xa jvules ta jol li lokʼoletik ti toj ibalik sbae. Li avie jnaʼoj ti jaʼ noʼox Jeova xuʼ skoltaun yoʼ xkichʼ jpʼijil xchiʼuk ti vikʼiluk jsat yoʼ jchabi li jnopbene, li koʼontone xchiʼuk li jnupunele». Ta skoj ti laj yichʼ koltael li Antonioe la skomtsan li kʼusi nopem toʼox xaʼi skʼelele, koliyal taje muʼyuk bu la stikʼ sba ta vokolil.

Jamal lek ta kʼelel ti yichʼoj lekil tojobtaseletik li Vivlia ti toj jtunel kuʼuntik sventa mu jtikʼ jbatik ta kʼopetike. Pe, ¿mi yantik stsatsaj li jvokoltike xchiʼuk ti mu jtabetik xchapanobile? Jkʼeltik batel kʼuxi xuʼ skoltautik li Skʼop Dios kʼalal jech ta jnuptantike.